ໂຄວິດ ຖ່ວງເສດຖະກິດສະຫວັນ ຫຼຸດແຜນ

ສະພາບການລະບາດຂອງພະຍາດໂຄວິດ-19 ຖ່ວງດຶງການຂັບເຄື່ອນເສດຖະກິດຂອງແຂວງສະຫວັນນະເຂດ, ຊຶ່ງເມື່ອປີ 2021 ມີການຂະຫຍາຍຕົວໃນລະດັບ 7,10% ຫຼຸດແຜນການ 0,4%.

ໂດຍທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງສະຫວັນນະເຂດຊຸດທີ 2 ໃນຄັ້ງວັນທີ 12 ມັງກອນ 2022 ທີ່ຫໍວັດທະນະທຳໄກສອນພົມວິຫານ.

ທັງນີ້, ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງສະຫວັນນະເຂດ ປະຈຳປີ 2021 ແລະ ທິດທາງແຜນການ ປະຈຳປີ 2022 ໂດຍທ່ານເຈົ້າແຂວງ, ໄດ້ຍົກໃຫ້ເຫັນສະພາບເງື່ອນໄຂພາຍໃນຫຼາຍດ້ານຍັງບໍ່ທັນເອື້ອອໍານວຍ, ເປັນຕົ້ນແມ່ນຄວາມຫຍຸ້ງຍາກທາງດ້ານເສດຖະກິດ-ການເງິນ, ການຈັດເກັບລາຍຮັບພາຍໃນບໍ່ໄດ້ຕາມຄາດໝາຍ, ສະພາບການລະບາດຂອງພະຍາດໂຄວິດ-19, ແຮງງານຈໍານວນຫຼາຍກັບຈາກຕ່າງປະເທດ ແລະ ບັນຫາປາກົດການຫຍໍ້ທໍ້ໃນສັງຄົມທີ່ຍັງບໍ່ທັນໄດ້ຮັບການແກ້ໄຂຢ່າງຂາດຕົວ; ຊຶ່ງໄດ້ສົ່ງຜົນກະທົບທັງທາງກົງ ແລະ ທາງອ້ອມຕໍ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈຳປີ 2021; ຕໍ່ໜ້າສະພາບການດັ່ງກ່າວ, ອົງການປົກຄອງແຂວງ ກໍໄດ້ບຸກບືນ, ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານປະຈຳປີ 2021 ບົນຈິດໃຈສ້າງການຫັນປ່ຽນຢ່າງແຂງແຮງເລິກເຊິ່ງ ແລະ ຮອບດ້ານ, ໃນນັ້ນ, ໄດ້ຫັນເນື້ອໃນທັງສອງວາລະແຫ່ງຊາດເປັນອັນລະອຽດ, ພ້ອມທັງລະດົມທຸກພາກສ່ວນໃນທົ່ວສັງຄົມເຂົ້າຮ່ວມຢ່າງເປັນຂະບວນ, ແນໃສ່ໃຫ້ມີການຫັນປ່ຽນຢ່າງເປັນຮູບປະທຳ.

ໂດຍລວມແລ້ວ, ການພັດທະນາເສດຖະກິດ-ສັງຄົມແຂວງສະຫວັນນະເຂດ ຍັງສືບຕໍ່ຂະຫຍາຍຕົວຕໍ່ເນື່ອງ ແລະມີຄວາມຄືບໜ້າດີພໍສົມຄວນ, ປີ 2021 ຂະຫຍາຍຕົວໃນລະດັບ 7,10% ຊຶ່ງຫຼຸດແຜນການ 0,4%, ຄິດເປັນມູນຄ່າ 22.203 ຕື້ກວ່າກີບ, ໂຄງປະກອບເສດຖະກິດໄດ້ໄປຕາມທິດຫັນເປັນອຸດສາຫະກໍາ ແລະ ທັນສະໄໝເທື່ອລະກ້າວ, ການຈັດຕັ້ງປະຕິບັດໂຄງການລົງທຶນຂອງລັດ ໃນຕົ້ນປີ 2021 ຮອດປະຈຸບັນ, ປະຕິບັດໄດ້ 258 ໂຄງການ, ມູນຄ່າ 69,92 ຕື້ກີບ, ເທົ່າກັບ 76% (ຕາມແຜນການ 336 ໂຄງການ, ມູນຄ່າ 91,99 ຕື້ກີບ); ບັນຍາກາດການລົງທຶນພາກເອກະຊົນທັງພາຍໃນ ແລະ ຕ່າງປະເທດ ໂດຍລວມເຫັນວ່າຍັງມີທ່າອ່ຽງເພີ່ມຂຶ້ນ, ຊຶ່ງໃນປີ 2021 ສາມາດສົ່ງເສີມການລົງທຶນຈາກພາກເອກະຊົນພາຍໃນ ແລະ ຕ່າງປະເທດໄດ້ທັງໝົດ 229 ວິສາຫະກິດ, ມີມູນຄ່າການລົງທຶນ 908 ຕື້ກວ່າກີບ, ຫຼຸດແຜນການ 57,25% ແລະ ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 20% ກວມ 4% ຂອງມູນຄ່າລວມຍອດຜະລິດຕະພັນພາຍໃນຂອງແຂວງ, ແຕ່ເຖິງແມ່ນວ່າມູນຄ່າການລົງທຶນຂອງເອກະຊົນພາຍໃນ ແລະ ຕ່າງປະເທດຫຼຸດລົງ ຖ້າທຽບໃສ່ແຜນການປີ, ແຕ່ຖ້າທຽບໃສ່ຈໍານວນວິສາຫະກິດກໍເຫັນວ່າເພີ່ມຂຶ້ນ.

แชร์