ເມົາຢາເສບຕິດປ່ວງບ້າອາລະວາດ ດວງເຖິງຄາດຖືກລູກປືນຟົ້ງໃສ່ ຕາຍຄາທີ່

ໃນລະຫວ່າງທີ່ ປກສ ບ້ານ ເຂົ້າແກ້ໄຂເຫດຮ້າຍ, ຈາກຊາຍເມົາຢາເສບຕິດຈົນປ່ວງບ້າອາລະບາດທຳຮ້າຍຜູ້ຄົນ, ຈົນຕ້ອງຢັບຢັ້ງດ້ວຍການຍິງປືນຂຶ້ນຟ້າເພື່ອນາບຂູ່ໃຫ້ຢຸດຕິ, ແຕ່ກໍຍັງບໍ່ເຊົາ, ຈິ່ງຕ້ອງຍິງປືນອີກໜຶ່ງນັດໃສ່ພື້ນທາງເບຕົງ, ແຕ່ລູກປືນໄດ້ຟົ້ງໃສ່ທ້າວ ຫືດ ທີ່ກຳລັງປ່ວງເພາະລິດຢາບ້າພາໃຫ້ເສຍຊີວິດຄາທີ່.

ເມື່ອເວລາ 13:30 ໂມງຂອງວັນທີ 10 ມັງກອນ 2022, ເຈົ້າໜ້າທີ່ໜ່ວຍງານຄະດີອາຍາ-ເສດຖະກິດ ປກສ ເມືອງສອງຄອນ ແຂວງສະຫວັນນະເຂດ ໄດ້ຮັບລາຍງານຈາກ ປກສ ບໍລິການປະຊາຊົນ ກຸ່ມບ້ານທີ 4 (ໜອງບົວທ່າ) ວ່າ: ທ້າວ ຄໍາວົງ ຫຼື ຫືດ ອາຍຸ 45 ປີ ເມົາຢາເສບຕິດ ແລ້ວເອົາພ້າໄລ່ຟັນຊາວບ້ານໜອງວັດ ເມືອງສອງຄອນ. ຈາກນັ້ນ, ທາງເຈົ້າໜ້າທີ່ ຈິ່ງໄດ້ສົມທົບກັບການຈັດຕັ້ງບ້ານໜອງວັດ ເພື່ອຈະເອົາຕົວຜູ້ກໍ່ເຫດອາລະວາດໄປຝາກຢູ່ສູນດັດສ້າງ.

ລາຍງານຂ່າວ ປກສ ໃຫ້ຮູ້ຕື່ມວ່າ: ໃນມື້ເກີດເຫດ, ຄອບຄົວພໍ່-ແມ່ຂອງຜູ້ກ່ຽວ ໄດ້ເຂົ້າມາສະເໜີຕໍ່ການຈັດຕັ້ງບ້ານໜອງວັດ ແລະ ເຈົ້າໜ້າທີ່ ປກສ ກຸ່ມບ້ານທີ 4 (ໜອງບົວທ່າ) ເພື່ອເອົາລູກຊາຍໄປດັດສ້າງ, ໂດຍທາງຜູ້ປົກຄອງໄດ້ເຮັດໃບມອບສິດ. ແລ້ວທາງການຈັດຕັ້ງບ້ານ ແລະ ເຈົ້າໜ້າທີ່ ປກສ ກຸ່ມ ກໍໄດ້ຈັດກໍາລັງວິຊາສະເພາະລົງໄປສະຖານທີ່ເກີດເຫດ, ໃນເວລາ 13:00 ໂມງຂອງວັນດຽວກັນ, ຈິ່ງພົບເຫັນຜູ້ກ່ຽວພວມເອົາພ້າໄລ່ຟັນ ນາງ ຄອນ ອາຍຸ 60 ປີ ໄດ້ຮັບບາດເຈັບຢູ່ກົກແຂນເບື້ອງຊ້າຍ, ເມື່ອເຫດການເປັນດັ່ງນັ້ນ, ທາງເຈົ້າໜ້າທີ່ ປກສ-ປກຊ ບ້ານ ແລະ ປກສ ກຸ່ມ ຈິ່ງໄດ້ເຂົ້າໄປຊ່ວຍເອົານາງ ຄອນ ອອກມາ, ແຕ່ຜູ້ກ່ຽວຍັງໄດ້ຖືຟ້າແລ່ນເຂົ້າມາຟັນທ້າວ ກອງມະນີ ອາຍຸ 47 ປີ ຫົວໜ້າກອງຮ້ອຍ ປກສ ບ້ານ ໄດ້ຮັບບາດເຈັບຫຍິບ 3 ເຂັມ ແລະ ຢູ່ຫຼັງເບື້ອງຊ້າຍໜຶ່ງບາດແຜ; ຕໍ່ເຫດການດັ່ງກ່າວ, ທ້າວ ບຸນຈັນ ອາຍຸ 59 ປີ ຫົວໜ້າ ປກສ ບ້ານ ຈິ່ງໄດ້ບອກໃຫ້ຜູ້ກ່ຽວຢຸດ, ແຕ່ຜູ້ກ່ຽວບໍ່ຢຸດ, ພ້ອມທັງຖືຟ້າແລ່ນເຂົ້າມາຫາ, ແລ້ວທ້າວ ບຸນຈັນ ຈິ່ງໄດ້ໃຊ້ປືນ AK ຍິງຂຶ້ນຟ້າ 3 ນັດ ເພື່ອນາບຂູ່ໃຫ້ຜູ້ກ່ຽວຢຸດ, ແຕ່ຜູ້ກ່ຽວຍັງຖືຟ້າແລ່ນເຂົ້າມາໃກ້ປະມານ 6 ແມັດ. ດັ່ງນັ້ນ, ທ້າວ ບຸນຈັນ ຈິ່ງໄດ້ຍິງປືນລົງໃສ່ພື້ນທາງເປຕົງ 1 ນັດ, ເຮັດໃຫ້ລູກປືນຟົ້ງໄປຖືກທ້າວ ຫືດ ເສຍຊີວິດ ຊຶ່ງເຈົ້າໜ້າທີ່ກໍໄດ້ມອບໃຫ້ຄອບຄົວ ແລະ ການຈັດຕັ້ງບ້ານ, ນໍາສົບໄປປະກອບພິທີທາງສາສະໜາ.

ສ່ວນທ້າວ ບຸນຈັນ, ເຈົ້າໜ້າທີ່ກອງບັນຊາການທະຫານເມືອງສອງຄອນກໍໄດ້ນໍາຕົວໄປໄວ້ທີ່ກອງບັນຊາການ. ຢ່ງໃດກໍຕາມ, ໃນໄລຍະຜ່ານມາຜູ້ເສຍຊີວິດແມ່ນເສບຢາບ້າ ແລະຖືກນຳຕົວໄປດັດສ້າງມາເເລ້ວ 4 ຄັ້ງຄື: ດັດສ້າງຢູ່ສູນຫຼັກ 33 ຄໍາສະຫວ່າງ 3 ຄັ້ງ ເເລະເອົາໄປປິ່ນປົວຢູ່ສູນຫຼັກ 26 ໜຶ່ງຄັ້ງ, ແຕ່ຜູ້ກ່ຽວກໍບໍ່ມີການປ່ຽນແປງ.

แชร์