ເມື່ອຂະບວນລົດໄຟຂົນສົ່ງສິນຄ້າຖ້ຽວທຳອິດ “ຂະບວນດ່ວນລ້ານຊ້າງ” ທີ່ແລ່ນດ້ວຍຄວາມໄວ 120 ກິໂລແມັດຕໍ່ຊົ່ວໂມງ, ໄດ້ຂັບເຄື່ອນອອກຈາກນະຄອນຄຸນມິງ ປະເທດຈີນ, ມຸ່ງໜ້າສູ່ນະຄອນຫຼວງວຽງຈັນ ປະເທດລາວ, ລົດໄຟຖ້ຽວນີ້ ໄດ້ຂົນສົ່ງດອກໄມ້, ຜັກສົດ ແລະສິນຄ້າອື່ນໆຂອງແຂວງຢຸນນານ ມາສົ່ງນະຄອນຫຼວງວຽງຈັນ ຊຶ່ງນຳໃຊ້ເວລາພຽງແຕ່ 26 ຊົ່ວໂມງເທົ່ານັ້ນ, ທັງນີ້ ໄດ້ຫຼຸດເວລາການຂົນສົ່ງສິນຄ້າລະຫວ່າງລາວ-ຈີນ, ໄດ້ເຮັດໃຫ້ສິນຄ້າເຂົ້າສູ່ຕະຫຼາດໄວຂຶ້ນ ຊຶ່ງເປັນການສະທ້ອນໃຫ້ເຫັນວ່າ: ທາງລົດໄຟ ລາວ-ຈີນ ໄດ້ເຮັດໃຫ້ທ່າແຮງ “ການເຊື່ອມໂຍງເຊື່ອມຈອດ” ຂອງປະເທດລາວ ນັບມື້ນັບພົ້ນເດັ່ນ.
ທາງລົດໄຟ ລາວ-ຈີນ ທີ່ເຊື່ອມຈອດກັນລະຫວ່າງນະຄອນຄຸນມີງ ກັບ ນະຄອນຫຼວງວຽງຈັນເປັນເສັ້ນທາງສຳຄັນຂອງແຂວງຢຸນນານ, ມຸ່ງໜ້າສູ່ພາກພື້ນເອເຊຍຕາເວັນອອກສຽງໃຕ້ ແລະ ໄດ້ຫຼຸດເວລາ, ຫຼຸດຕົ້ນທຶນການຂົນສົ່ງສິນຄ້າຢູ່ລຽບຕາມເສັ້ນທາງສາຍນີ້ຢ່າງຫຼວງຫຼາຍ. ຊຶ່ງແຕ່ກ່ອນ, ວິສາຫະກິດຕ່າງໆຂອງຈີນ ໄດ້ຂົນສົ່ງປຸ໋ຍເຄມີ, ຫົວອາຫານສັດ ແລະ ສິນຄ້າອື່ນໆໄປສູ່ປະເທດລາວ ແລະ ປະເທດໄທຜ່ານທາງບົກ ແລະ ທາງທະເລ ແມ່ນຕ້ອງໃຊ້ເວລາເຖິງ 15 ວັນຂຶ້ນໄປ, ສົ່ງຜົນໃຫ້ການຂົນສົ່ງມີປະສິດທິພາບຕ່ຳ ແລະ ມີຄ່າຫຼຸ້ຍຫຼ້ຽນຫຼາຍ. ແຕ່ປັດຈຸບັນ, ເວລາໃນການຂົນສົ່ງສິນຄ້າໄດ້ຫຼຸດລົງເຫຼືອພຽງ 26 ຊົ່ວໂມງເທົ່ານັ້ນ, ເຮັດໃຫ້ຕົ້ນທຶນການຂົນສົ່ງສິນຄ້າຫຼຸດລົງຢ່າງຫຼວງຫຼາຍ.
ຢ່າງໃດກໍດີ, ຫວນຄືນເມື່ອວັນທີ 4 ທັນວາ 2021, ຂະບວນລົດໄຟຂົນສົ່ງສິນຄ້າ ລາວ-ຈີນຖ້ຽວທຳອິດ, ກໍໄດ້ແລ່ນອອກຈາກນະຄອນຄຸນມິງ ຊຶ່ງເປັນການເປີດສາກໃຫ້ກັບການຈໍລະຈອນສິນຄ້າຂ້າມຊາຍແດນ ໂດຍຜ່ານທາງລົດໄຟ ລາວ-ຈີນ. ຫຼັງຈາກນັ້ນ, ນະຄອນກວາງໂຈ່ວ, ນະຄອນເສີງຕູ່, ນະຄອນຈຸ່ງກິ່ງ, ນະຄອນຊຽງໄຮ້ ແລະ ອີກກວ່າ 10 ນະຄອນຂອງຈີນ ກໍໄດ້ເປີດຂະບວນລົດໄຟຂົນສົ່ງສິນຄ້າ ລາວ-ຈີນ ໂດຍຜ່ານນະຄອນຄຸນມິງ ແລ້ວມຸ່ງໜ້າໄປສູ່ນະຄອນຫຼວງວຽງຈັນ ເມືອງເອກຂອງປະເທດລາວ. ສ່ວນຂາກັບຂອງຂະບວນລົດໄຟຂົນສົ່ງສິນຄ້າ, ກໍໄດ້ແລ່ນອອກຈາກນະຄອນຫຼວງວຽງຈັນ ແລະ ມຸ່ງໜ້າສູ່ນະຄອນຕ່າງໆຂອງປະເທດຈີນເຊັ່ນດຽວກັນ.
ທ່ານ ສູຊ່າວ, ຮອງຜູ້ອຳນວຍການບໍລິສັດຂົນສົ່ງຕູ້ຄອນເທນເນີຣ໌ທາງລົດໄຟສາກົນຈີນ ຈຳກັດ ຫຼື CRIntermodal ສາຂານະຄອນຄຸນມິງ ໄດ້ກ່າວວ່າ: ຂະບວນລົດໄຟຂົນສົ່ງສິນຄ້າລາວ-ຈີນທີ່ແລ່ນອອກຈາກນະຄອນຄຸນມິງ, ໄດ້ເພີ່ມຈຳນວນຖ້ຽວ ແລະ ມີການເພີ່ມຖ້ຽວລົດຫຼາຍທີ່ສຸດເຖິງ 6ຖ້ຽວ, ຊຶ່ງໃນໄເບື້ອງຕົ້ນຂອງການເປີດນຳໃຊ້ທາງລົດໄຟລາວ-ຈີນ, ສິນຄ້າທີ່ຂົນສົ່ງສ່ວນຫຼາຍແມ່ນຢາງພາລາ, ປຸ໋ຍເຄມີ ແລະ ເຄື່ອງໃຊ້ປະຈຳວັນ, ແຕ່ປັດຈຸບັນ ປະເພດສິນຄ້າໄດ້ເພີ່ມຂຶ້ນ ຊຶ່ງລວມທັງເຄື່ອງຈັກ, ເຄື່ອງຜະລິດໄຟຟ້າດ້ວຍແສງຕາເວັນ, ຜະລິດຕະພັນການສື່ສານ, ລົດ, ແຜ່ນແພ ແລະອື່ນໆ ຊຶ່ງມູນຄ່າຂອງສິນຄ້າກໍໄດ້ເພີ່ມຂຶ້ນຢ່າງບໍ່ຢຸດຢັ້ງ. ຫາກຄິດໄລ່ມາຮອດວັນທີ 3 ມັງກອນ 2022ຊຶ່ງເປັນວັນຄົບຮອບ 1 ເດືອນຂອງການເປີດນຳໃຊ້ທາງລົດໄຟລາວ-ຈີນ, ຂະບວນລົດໄຟຂົນສົ່ງສິນຄ້າລາວ-ຈີນ ແມ່ນມີທັງໝົດເຖິງ 380 ຖ້ຽວ, ໄດ້ຂົນສົ່ງສິນຄ້າ 170.000 ໂຕນ. ອັນໄດ້ສະແດງໃຫ້ເຫັນວ່າ ທາງລົດໄຟລາວ-ຈີນ, ໄດ້ກາຍເປັນເສັ້ນທາງທາງບົກສຳຄັນທີ່ເຊື່ອມຈອດກັນລະຫວ່າງປະເທດຈີນ ກັບ ປະເທດລາວກໍຄືບັນດາປະເທດອາຊຽນ.
ທັງນີ້ ນັກວິເຄາະສະຖານະການ ໄດ້ໃຫ້ທັດສະນະວ່າ “ຄຽງຄູ່ກັບສັນຍາການພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນ ຫຼື RCEP ມີຜົນບັງຄັບໃຊ້ນັບແຕ່ວັນທີ 1 ມັງກອນ ປີ 2022 ເປັນຕົ້ນມາ, ພາກພື້ນແຫ່ງນີ້ ຈະປະຕິບັດນະໂຍບາຍຕ່າງໆທີ່ເປັນປະໂຫຍດຕໍ່ການພັດທະນາເສດຖະກິດ ຊຶ່ງຈະເຮັດໃຫ້ການຄ້າສິນຄ້າປະເພດຈັບຕ້ອງໄດ້ ແລະ ການຄ້າການບໍລິການສະດວກດີກວ່າເກົ່າ, ຕ່ອງໂສ້ການຜະລິດ ແລະ ຕ່ອງໂສ້ການສະໜອງ ຈະມີການເຊື່ອມໂຍງເຂົ້າກັນຫຼາຍກວ່າເກົ່າ, ການລົງທຶນພາຍໃນພາກພື້ນແຫ່ງນີ້ກໍຈະຄຶກຄັກຍິ່ງໆຂຶ້ນ, ທາງລົດໄຟລາວ-ຈີນ ໄດ້ເຊື່ອມຕໍ່ກັບຂະບວນລົດໄຟຈີນ-ຢຸໂຣປຢູ່ທິດເໜືອ ແລະ ຕໍ່ກັບບັນດາປະເທດອາຊຽນຢູ່ທິດໃຕ້. ສັນຍາ RCEP ກຳລັງໄດ້ຮັບການຈັດຕັ້ງປະຕິບັດເທື່ອລະກ້າວຊຶ່ງຈະຊ່ວຍຍົກສູງທ່າແຮງດ້ານທີ່ຕັ້ງຂອງປະເທດລາວຢ່າງບໍ່ຢຸດຢັ້ງ, ໂດຍຫັນທ່າແຮງນີ້ເປັນທ່າແຮງດ້ານການພັດທະນາ ແລະ ເຮັດໃຫ້ປະເທດລາວກາຍເປັນຈຸດສູນກາງດ້ານຄົມມະນາຄົມທາງບົກຂອງການໄປມາຫາສູ່ກັນ ແລະ ການຂົນສົ່ງສິນຄ້າລະຫວ່າງຈີນ-ອາຊຽນ ທັງເປັນການເຊື່ອໂຍງເຊື່ອມຈອດກັນຂອງພາກພື້ນ, ກໍຄືປະເທດອາຊຽນໃຫ້ນັບມື້ຫຼາຍຂຶ້ນ.ພ້ອມນັ້ນ, ກໍກໍາລັງພິຈາລະນາການຂົນສົ່ງເຂົ້າສູ່ປະເທດຈີນໂດຍຜ່ານປະເທດລາວ. ດັ່ງນັ້ນ, ຈິ່ງເຊື່ອໝັ້ນວ່າ: ປະເທດລາວຈະສາມາດຈັດຕັ້ງປະຕິບັດຍຸດທະສາດຂອງຕົນຄືຫັນ “ປະເທດທີ່ບໍ່ມີທາງອອກສູ່ທະເລ” ເປັນ “ປະເທດເຊື່ອມໂຍງເຊື່ອມຈອດ” ໃຫ້ປະສົບຜົນສຳເລັດຫຼາຍກວ່າເກົ່າ.
ຂອບໃຈຂໍ້ມູນຈາກເພຈ: ວິເຄາະສະຖານະການ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |