ອະນາໄມໂລກ ເຕືອນ ໂຄວິດ-19 ຍັງບໍ່ແມ່ນພະຍາດປະຈຳຖິ່ນ

ອົງການອະນາໄມໂລກ (WHO) ອອກມາເຕືອນວ່າ “ຂະນະນີ້, ໄວຣັສໂຄວິດ-19 ກາຍພັນສາຍພັນ “ໂອມິຄຣອນ” ກໍາລັງລະບາດ, ຈົນມີການຄາດຄະເນວ່າຊາວຢຸໂຣປກວ່າເຄິ່ງໜຶ່ງຈະຕິດເຊື້ອພາຍໃນ 2 ເດືອນຂ້າງໜ້າດັ່ງນັ້ນ, ຈິ່ງຖືວ່າໄວເກີນໄປ, ທີ່ຈະນິຍາມໂຄວິດ-19 ເປັນພະຍາດປະຈຳຖິ່ນແບບດຽວກັບໄຂ້ຫວັດ”.

​ລາຍງານຂ່າວຕ່າງປະເທດເມື່ອວັນທີ 12 ມັງກອນ 2022 ລະບຸວ່າ: ຄໍາເຕືອນດັ່ງກ່າວ, ເກີດຂຶ້ນຫຼັງຈາກທີ່ ທ່ານ ເປຣໂດຣ ຊານເຊສ ນາຍົກລັດຖະມົນຕີຂອງປະເທດສະເປນ, ໄດ້ກ່າວເມື່ອວັນທີ 10 ມັງກອນວ່າ “ອາດເຖິງເວລາແລ້ວ, ທີ່ຈະຕ້ອງປັບປ່ຽນວິທີການຕິດຕາມວິວັດທະນາການຂອງໂຄວິດ-19, ໂດຍຫັນມາໃຊ້ວິທີການທີ່ຄ້າຍຄືກັບການຕິດຕາມໄຂ້ຫວັດໃຫຍ່ແທນ, ເນື່ອງຈາກອັດຕາການເສຍຊີວິດທີ່ຫຼຸດລົງ, ຊຶ່ງນັ້ນໝາຍເຖິງການເຮັດໃຫ້ພະຍາດໂຄວິດ-19 ກາຍເປັນ “ໂຣກປະຈຳຖິ່ນ” ຫຼາຍກວ່າຈະເປັນໂຣກລະບາດ”.

​ຂະນະທີ່ ທ່ານ ນາງ ແຄເທີຣີນ ສະມອລວູດ ເຈົ້າໜ້າທີ່ອະວຸໂສຝ່າຍສະຖານະການສຸກເສີນຂອງ WHO ປະຈໍາຢຸໂຣປ ກໍອອກມາໃຫ້ທັດສະນະຕໍ່ປະເດັນດັ່ງກ່າວວ່າ “ເຮົາຍັງຄົງມີຄວາມບໍ່ແນ່ນອນຢູ່ຫຼາຍ ແລະໄວຣັສກໍ່ກຳລັງພັດທະນາຢ່າງວ່ອງໄວ, ເຮັດໃຫ້ເກີດຄວາມທ້າທາຍໃໝ່ໆ. ດັ່ງນັ້ນ, ເຮົາຈິ່ງບໍ່ສາມາດຢູ່ໃນຈຸດທີ່ເອີ້ນໄດ້ວ່າ ໂຄວິດ-19 ເປັນພະຍາດປະຈຳຖິ່ນ”.

แชร์