ໂຄວິດ-19 ກະທົບວຽກງານຕ້ານເອດ ຜະເຊີນຄວາມຫຍຸ້ງຍາກ

ການລະບາດຂອງພະຍາດໂຄວິດ-19 ໄດ້ສ້າງຜົນກະທົບຕໍ່ວຽກງານຕ້ານເອດ ເນື່ອງຈາກຂໍ້ຈຳກັດດ້ານການສັນຈອນໄປມາ, ຈິ່ງເຮັດໃຫ້ການເຄື່ອນໄຫວຈັດຕັ້ງປະຕິບັດວຽກງານດັ່ງກ່າວຜະເຊີນກັບຄວາມຫຍຸ້ງຍາກ.

ດຣ. ພູທອນ ສຸດທະລັກ ຫົວໜ້າສູນຕ້ານເອດ ແລະ ພະຍາດຕິດຕໍ່ທາງເພດສຳພັນ, ໄດ້ກ່າວໃນກອງປະຊຸມສະຫຼຸບລາຍງານ ການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານເຊື້ອເຮສໄອວີ (ພະຍາດເອດ ແລະ ພະຍາດຕິດຕໍ່ທາງເພດສຳພັນ) ປະຈໍາປີ 2021 ໃນວັນທີ 12 ມັງກອນນີ້ ທີ່ທ່າລາດ ແຂວງວຽງຈັນ ວ່າ: ໃນ 1 ປີຜ່ານມາ, ເປັນໄລຍະທີ່ມີຄວາມຫຍຸ້ງຍາກ ເນື່ອງຈາກການລະບາດຂອງພະຍາດໂຄວິດ-19 ໄດ້ສ້າງຜົນກະທົບຕໍ່ການເດີນທາງ, ການສັນຈອນໄປມາລະຫວ່າງແຂວງຕໍ່ແຂວງ, ເມືອງຕໍ່ເມືອງ ແລະ ບ້ານຕໍ່ບ້ານ ເຮັດໃຫ້ການຕິບັດວຽກງານຕ້ານເອດ ຜະເຊີນກັບຄວາມຫຍຸ້ງຍາກ, ແຕ່ນັກວິຊາການກ່ຽວຂ້ອງກໍໄດ້ສູ້ຊົນເພື່ອບັນລຸໄດ້ເປົ້າໝາຍແບບເລັ່ງລັດ ຂອງອົງການສະຫະປະຊາຊາດຕ້ານເອດ ຄື: ພາຍໃນປີ 2025 ຕ້ອງບັນລຸໃຫ້ໄດ້ 95-95-95, ຢຸດຕິການແຜ່ລະບາດຂອງເຊື້ອເຮສໄອວີ ແລະ ບັນລຸເປົ້າໝາຍການພັດທະນາແບບຍືນຍົງ ໃຫ້ໄດ້ໃນປີ 2030.

ສໍາລັບເປົ້າໝາຍ 95-95-95 ມີຄວາມໝາຍວ່າ: 95% ຂອງຜູ້ຕິດເຊື້ອເຮສໄອວີ ຈະຕ້ອງຮູ້ສະພາບການຕິດເຊື້ອເຮສໄອວີຂອງຕົນ; 95% ຂອງຜູ້ຕິດເຊື້ອເຮສໄອວີ ທີ່ຮູ້ສະພາບການຕິດເຊື້ອຂອງຕົນ, ຈະຕ້ອງໄດ້ຮັບການປິ່ນປົວດ້ວຍຢາຕ້ານຕໍ່ເຊື້ອເຮສໄອວີ ແລະ 95% ຂອງຜູ້ທີ່ໄດ້ຮັບການປິ່ນປົວດ້ວຍຢາຕ້ານຕໍ່ເຊືື້ອເຮສໄອວີ, ສາມາດກົດເຊື້ອເຮສໄອວີໃນເລືອດລົງໃນລະດັບຕໍ່າ (ປິ່ນປົວດີ) ແລະ ຢຸດຕິການແຜ່ລະບາດຂອງເຊື້ອເຮສໄອວີໃນປີ 2030.

แชร์