ເຊີນຊວນຮ່ວມປັນນ້ຳໃຈ ໃນງານກຸສົນຊ່ວຍພີ່ນ້ອງລ້ອງແຈ້ງ

ເພື່ອຊ່ວຍເຫຼືອ ແບ່ງປັນ ແລະ ເປັນກຳລັງໃຈໃຫ້ພີ່ນ້ອງຮ່ວມຊາດ, ໂດຍສະເພາະຊາວເມືອງລ້ອງແຈ້ງ, ທີ່ຜູ້ຕ້ອງການຄວາມຊ່ວຍເຫຼືອຫຼາຍດ້ານ ນັບແຕ່ເຄື່ອງໃຊ້ຊີວິດປະຈຳ ແລະ ອື່ນໆ ຊຶ່ງສະຫະພັນອອຟໂຣດ ນະຄອນຫຼວງວຽງວຽງຈັນ, ຈະໄດ້ຈັດງານການກຸສົນຂຶ້ນ ເພື່ອນຳເອົາເຄື່ອງອຸປະໂພກ-ບໍລິໂພກທີ່ຈຳເປັນໄປມອບໃຫ້.

ທ່ານ ພົມມະທັດ ແກ້ວທະນີວົງ ໃນນາມປະທານສະມາຄົມໃຈເຖິງໃຈຮັບໃຊ້ສັງຄົມ, ໃຫ້ສຳພາດຕໍ່ນັກຂ່າວໜັງສືພິມ ເສດຖະກິດ-ສັງຄົມ ວ່າ “ອີງຕາມຂໍສະເໜີຄວາມຊ່ວຍເຫຼື່ອ ຈາກຄະນະປະຈຳພັກເມືອງລ້ອງແຈ້ງ, ອີງຕາມຄວາມຍຸ້ງຍາກຂາດເຂີນທາງດ້ານງົບປະມານ ແລະ ວັດຖຸສິ່ງຂອງເຄື່ອງໃຊ້ປະຈຳວັນຂອງປະຊາຊົນທີ່ຢູ່ເຂດຫ່າງໄກສອກຫຼີກ; ທັງນີ້ ເມືອງລອງແຈ້ງ ແມ່ນເປັນເມືອງໜຶ່ງທີ່ຕັ້ງຢູ່ເຂດຫ່າງໄກສອກຫຼີກ ປະກອບມີ 10 ບ້ານ ມີ 1,846  ຄອບຄົວ ທີ່ຍັງທຸກຍາກ”.

ສຳລັບກິດຈະກຳຊ່ວຍເຫຼືອສັງຄົມໃນຄັ້ງນີ້ ທາງສະຫະພັນອອຟໂຣດ ນະຄອນຫຼວງວຽງວຽງຈັນ ໄດ້ພ້ອມກັນປຸກລະດົມໝູ່ຄູ່ຮັກແພງ, ບໍລິສັດຫ້າງຮ້ານຕ່າງໆ, ເພື່ອລະດົມທຶນການສຶກສາ, ເຄື່ອງອຸປະໂພກ-ບໍລິໂພກ, ເຄື່ອງນຸ່ງຫົ່ມ, ເຂົ້າສານ, ອາຫານແຫ້ງ, ອຸປະກອນການຮຽນ-ການສຶກສາ, ອຸປະກອນການແພດ ແລະ ອື່ນໆ ເພື່ອທີ່ຈະນຳໄປມອບໃຫ້ອົງການປົກຄອງທ້ອງຖິ່ນ ແລະ ແຈກຢາຍໃຫ້ປະຊາຊົນໃນກຸ່ມເປົ້າໝາຍ.

ສຳລັບກຳນົດການອອກເດີນທາງ ແມ່ນວັນທີ 21-23 ມັງກອນ 2022 ພ້ອມນັ້ນ ຈິ່ງຂໍຝາກເຖິງບັນດາທ່ານທີ່ຕ້ອງການຮ່ວມປະກອບສ່ວນຊ່ວຍເຫຼືອສັງຄົມໃນຄັ້ງນີ້ ແມ່ນສາມາດນຳເອົາວັດຖຸປັດໄຈໄປມອບຜ່ານປະທານສະມາຄົມໃຈເຖິງໃຈຮັບໃຊ້ສັງຄົມ ຫຼື ຕິດຕໍ່ໂດຍກົງກັບ ສະຫະພັນອອຟໂຣດ ນະຄອນຫຼວງວຽງວຽງຈັນ.

แชร์