ນາຍຈ້າງຈະອອກຄ່າໃຊ້ຈ່າຍໃຫ້ແຮງງານລາວທີ່ເດີນທາງໄປເຮັດວຽກຢູ່ໄທ

ລາວ-ໄທ ເປັນເອກະພາບກ່ຽວກັບຄ່າໃຊ້ຈ່າຍ ສຳລັບຜູ້ທີ່ຈະເດີນທາງໄປເຮັດວຽກຢູ່ປະເທດໄທ ໄລຍະໂຄວິດ-19 ລະບາດ ໂດຍລັດຖະບານສອງຝ່າຍ ໄດ້ເຫັນດີເປັນເອກະພາບກ່ຽວກັບຄ່າໃຊ້ຈ່າຍຕ່າງໆ ຂອງຜູ້ອອກ ແຮງງານລາວ ທີ່ຈະເດີນທາງໄປເຮັດວຽກຢູ່ປະເທດໄທ, ຊຶ່ງໄດ້ມີການລະບຸໃຫ້ນາຍຈ້າງຮັບຜິດຊອບຄ່າກວດໂຄວິດ ຄ່າກັກຕົວ ແລະ ຄ່າຈັດສົ່ງ.

ທັງນີ້ ມີການລະບຸວ່າ ນາຍຈ້າງຕ້ອງຮັບຜິດຊອບຄ່າກວດໂຄວິດ 2 ຄັ້ງ (ຢູ່ປາຍທາງ) 2.600 ບາດ, ຄ່າກັກຕົວ 7-14 ວັນ 3.500-7.000 ບາດ, ຄ່າບໍລິການຈັດສົ່ງຢູ່ຕົ້ນທາງ ແລະ ປາຍທາງ.

ສ່ວນຜູ້ອອກແຮງງານ ຈະຕ້ອງຮັບຜິດຊອບຄ່າລົງຕາວີຊາ 2 ປີ 2.000 ບາດ, ຄ່າບັດອະນຸ ຍາດເຮັດວຽກ 2 ປີ 1.900 ບາດ, ຄ່າກວດຫາ 6 ພະຍາດຕ້ອງຫ້າມ 500 ບາດ, ຄ່າປະກັນສຸຂະພາບ 2 ປີ 3.200 ຫຼື 4 ເດືອນ 990 ບາດ, ຄ່າສັກວັຄຊີນຂອງທ່ານໝໍ 50 ບາດ, ຄ່າທຳນຽມເອກະສານຕ່າງໆຢູ່ຕົ້ນທາງ, ໂດຍບໍລິສັດຈັດຫາງານ ຕ້ອງກຳນົດການເກັບຄ່າບໍລິການຢ່າງຊັດເຈນ ຊຶ່ງທຸກບໍລິສັດແມ່ນຈະນຳໃຊ້ອັດຕາດຽວກັນ.

ໂດຍທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ກ່າວໃນກອງປະຊຸມກະກຽມການຈັດສົ່ງແຮງງານລາວ ໄປເຮັດວຽກຢູ່ປະເທດໄທ ໃນໄລຍະຍັງມີການແພ່ລະບາດຂອງເຊື້ອພະຍາດໂຄວິດ-19 ຊຶ່ງຈັດຂຶ້ນເມື່ອວັນທີ 11 ມັງກອນ 2022 ວ່າ: ອີງຕາມຜົນຂອງກອງປະຊຸມວິຊາການ ລາວ-ໄທ ກ່ຽວກັບການແກ້ບັນຫາແຮງງານລາວ ທີ່ຍັງເຮັດວຽກຢູ່ປະເທດ ແລະ ການກະກຽມຈັດສົ່ງແຮງງານລາວ ໄປເຮັດວຽກຢູ່ປະເທດໄທ ໃນໄລຍະການລະບາດຂອງພະຍາດໂຄວິດ-19, ຊຶ່ງໃນເອກະສານດັ່ງກ່າວ ໄດ້ລະບຸລະອຽດກ່ຽວກັບບໍລິສັດຈັດຫາງານ, ຕ້ອງແຈ້ງລາຍການເອກະສານຕ່າງໆທີ່ຕ້ອງປະກອບ ແລະ ຄ່າໃຊ້ຈ່າຍຕ່າງໆ ເຊັ່ນ ເອກະສານ, ໜັງສືຜ່ານແດນ, ໃບຢັ້ງຢືນກວດເຊື້ອພະຍາດໂຄວິດ-19 ແລະ ໃບຢັ້ງຢືນກວດພະຍາດຕ້ອງຫ້າມ 6 ຊະນິດ, ຊຶ່ງທັງໝົດນີ້ ຈະເປັນກົນໄກໜຶ່ງໃນການຊ່ວຍຫຼຸດຜ່ອນຈຳນວນຜູ້ອອກ ແຮງງານລາວ ທີ່ລັກລອບໄປເຮັດວຽກຢູ່ປະເທດໄທແບບຜິດກົດໝາຍ, ທີ່ຕ້ອງລະວັງກໍຄື ໃນປັດຈຸບັນໄດ້ມີປາກົດການທີ່ມີນາຍໜ້າເຖື່ອນ ເຄື່ອນໄຫວເອົາແຮງງານລາວໄປເຮັດວຽກຢູ່ປະເທດໄທ ເນື່ອງຈາກນາຍຈ້າງໄທ ຍັງສືບຕໍ່ຈ້າງແຮງງານທີ່ຜິດກົດໝາຍຢູ່, ຊຶ່ງການລັກລອບໄປເຮັດວຽກຢູ່ປະເທດໄທ ເຮັດໃຫ້ຜູ້ອອກແຮງງານຕ້ອງໄດ້ເສຍຄ່າໃຊ້ຈ່າຍຫຼາຍກວ່າປົກກະຕິ ແລະ ຍັງມີຄວາມສ່ຽງຕໍ່ກັບການຖືກຫຼອກລວງ ແລະ ຕົກເປັນເຫຍື່ອຂອງການຄ້າມະນຸດອີກດ້ວຍ.

ສຳລັບແຮງງານລາວ ແລະ ຜູ້ທີ່ມີຄວາມສົນໃຈຈະໄປເຮັດວຽກຢູ່ຕ່າງປະເທດ ກໍ່ຂໍໃຫ້ໄປແບບຖືກຕ້ອງຕາມລະບຽບ-ກົດໝາຍ. ສຳລັບບັນດາສູນບໍລິການຈັດຫານງານ ແລະ ບໍລິສັດຈັດຫາງານ ທີ່ທາງການກຳນົດໄວ້ ແມ່ນໂທລະສັບໝາຍເລກ: 021 217738, ກົມພັດທະນາສີມືແຮງງານ ແລະ ຈັດຫາງານ ຫລື ໂທສາຍດ່ວນແຮງງານ 1511 ໃນໂມງລັດຖະການ.

ຂ່າວ-ພາບ: ເພັດສະໄໝ

แชร์