ຄະນະພັກທະນາຄານແຫ່ງ ສປປ ລາວ (ທຫລ) ໄດ້ດໍາເນີນກອງປະຊຸມຄົບຄະນະບໍລິຫານງານພັກ ທຫລ ສະໄໝທີ IV ປະຈຳປີ 2021, ວາລະສໍາຄັນນີ້ ຈັດຂຶ້ນໃນລະຫວ່າງວັນທີ 11-12 ມັງກອນ 2022 ພາຍໃຕ້ການເປັນປະທານຂອງ ສະຫາຍ ສອນໄຊ ສິດພະໄຊ ກຳມະການສູນກາງພັກ, ເລຂາຄະນະພັກ-ຜູ້ວ່າການ ທຫລ, ມີບັນດາສະຫາຍຄະນະປະຈຳພັກ-ຄະນະພັກ ທຫລ, ຜູ້ຊ່ວຍຄະນະຜູ້ວ່າການ, ເລຂາໜ່ວຍພັກ-ເລຂາຄະນະພັກຮາກຖານ ແລະ ຫົວໜ້າສາຂາ ທຫລ ປະຈຳພາກ ເຂົ້າຮ່ວມຢ່າງພ້ອມພຽງ.
ກອງປະຊຸມ ໄດ້ສະຫຼຸບຕີລາຄາການຊີ້ນຳ-ນຳພາວຽກງານຮອບດ້ານ ແລະ ສຳຫຼວດກວດກາການນຳພາລວມຂອງຄະນະບໍລິຫານງານພັກ ທຫລ ສະໄໝທີ IV ປະຈຳປີ 2021 ໂດຍລົງເລິກຕີລາຄາຄວາມຮັບຜິດຊອບໜ້າທີ່ການເມືອງຂອງບຸກຄົນຄະນະພັກ ໃນການນຳພາຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຂັ້ນຂອງຕົນ ແລະ ຂອງຂັ້ນເທິງ ໃນຕະຫຼອດໄລຍະ 1 ປີ ຜ່ານມາ, ພ້ອມພິຈາລະນາຮັບຮອງທິດທາງແຜນການ ໃນປີ 2022 ຢ່າງມີຈຸດສຸມ ເພື່ອພ້ອມກັນບຸກບືນ, ສູ້ຊົນ, ນຳພາຈັດຕັ້ງປະຕິບັດໃຫ້ປະກົດຜົນເປັນຈິງ.
ກອງປະຊຸມໄດ້ເປັນເອກະພາບຕໍ່ການຕີລາຄາບົດສະຫຼຸບການຊີ້ນຳ-ນຳພາຮອບດ້ານ ຊຶ່ງຕົ້ນຕໍແມ່ນການນຳພາຈັດຕັ້ງປະຕິບັດໜ້າທີ່ການເມືອງ ໃນການຄຸ້ມຄອງມະຫາພາກທາງດ້ານເງິນຕາ ໂດຍສະເພາະແມ່ນການຮັກສາສະຖຽນລະພາບເງິນຕາແຫ່ງຊາດ, ສັງລວມແລ້ວ, ໃນ 1 ປີຜ່ານມາ ພາຍໃຕ້ການຊີ້ນຳ-ນຳພາຂອງຄະນະພັກ ທຫລ ໃນການເຄື່ອນໄຫວວຽກງານຂອງຂະແໜງທະນາຄານ, ໄດ້ຈັດຕັ້ງປະຕິບັດຢ່າງຕັ້ງໜ້າ ແລະ ມີຜົນສຳເລັດຫຼາຍດ້ານ, ເປັນຕົ້ນ ທຫລ ຍັງປະຕິບັດບັນດາຄາດໝາຍເງິນຕາທີ່ລັດຖະບານ ກໍຄືມະຕິສະພາແຫ່ງຊາດກຳນົດໄວ້ ຊຶ່ງເປັນປັດໄຈສຳຄັນໃນການປະກອບ ສ່ວນຊຸກຍູ້ແຜນພັດທະນາເສດຖະກິດ-ສັງຄົມຂອງລັດ ໃຫ້ສາມາດເຄື່ອນໄຫວໄດ້ຕາມຄາດໝາຍທີ່ວາງໄວ້.
ໂອກາດດັ່ງກ່າວ, ສະຫາຍ ສອນໄຊ ສິດພະໄຊ ໄດ້ມີຄໍາເຫັນໂອ້ລົມ ແລະ ເນັ້ນໜັກ-ຊີ້ນຳໃຫ້ບັນດາສະຫາຍ ທີ່ເຂົ້າຮ່ວມກອງປະຊຸມ, ໃນການນຳເອົາເນື້ອໃນຈິດໃຈຂອງກອງປະຊຸມໃນຄັ້ງນີ້, ໄປສືບຕໍ່ຄົ້ນຄວ້າເຊື່ອມຊຶມກຳແໜ້ນຢ່າງເລິກເຊິ່ງ ແລ້ວກ້າວເຂົ້າສູ່ຂອດລົງເລິກຜັນຂະຫຍາຍ-ຈັດຕັ້ງປະຕິບັດຕົວຈິງ ຢູ່ແຕ່ລະຮາກຖານພັກ-ກົມກອງ ທັງຢູ່ຂັ້ນສູນກາງ ແລະ ຂັ້ນທ້ອງຖິ່ນ ໃຫ້ກາຍເປັນຮູບປະທຳ; ຊຶ່ງໃນສະເພາະໜ້ານີ້, ຕ້ອງໄດ້ອອກແຮງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IV ຂອງຕົນ ກໍຄືໜ້າທີ່ການເມືອງທີ່ໄດ້ຮັບມອບໝາຍ ໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້ ເພື່ອສະໜັບສະໜູນໃຫ້ບັນດາຄາດໝາຍທີ່ໄດ້ກຳນົດໄວ້ໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງລັດ ຄັ້ງທີ IX ໃຫ້ປະກົດຜົນເປັນຈິງ ໂດຍສະເພາະການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ-ເງິນຕາ ສູ້ຊົນຮັກສາສະຖຽນລະພາບເງິນຕາແຫ່ງຊາດ ໃຫ້ໝັ້ນທ່ຽງ, ຄຸ້ມຄອງອັດຕາແລກປ່ຽນໃຫ້ຢູ່ໃນຂອບທີ່ກຳນົດ, ຄຸ້ມຄອງຮ້ານແລກປ່ຽນ ໃຫ້ເຄື່ອນໄຫວສອດຄ່ອງກັບກົດໝາຍ ແລະ ນິຕິກຳກ່ຽວຂ້ອງຢ່າງເຂັ້ມງວດ; ຄຸ້ມຄອງ ແລະ ພັດທະນາລະບົບສະຖາບັນການເງິນ ໃຫ້ເຂັ້ມແຂງ; ຄວບຄຸມໜີ້ສິນໃຫ້ຢູ່ໃນຂອບເຂດທີ່ກຳນົດໄວ້; ສືບຕໍ່ຍູ້ແຮງການເຕີບໂຕຂອງພື້ນຖານເສດຖະກິດແຫ່ງຊາດ ຜ່ານກົນໄກຊຸກຍູ້ສົ່ງເສີມການສະໜອງທຶນໃຫ້ແກ່ໂຄງ ການທີ່ເປັນທ່າແຮງ ເພື່ອສົ່ງເສີມການຜະລິດ-ສົ່ງອອກສິນຄ້າ ໂດຍເລັ່ງໃສ່ທຸລະກິດຂະໜາດນ້ອຍ-ຂະໜາດກາງ ແລະ ຈຸນລະວິສາຫະກິດ; ສືບຕໍ່ປັບປຸງລະບົບການຊຳລະຂອງລະບົບທະນາຄານ ໃຫ້ລວມສູນ, ທັນສະໄໝ ແລະ ປອດໄພ; ພັດທະນາຕະຫຼາດທຶນ ໃຫ້ມີບາດກ້າວຂະຫຍາຍຕົວຢ່າງຕັ້ງໜ້າ; ເສີມຂະຫຍາຍການຮ່ວມມືກັບສາກົນໃຫ້ແຂງແຮງ ແລະ ເລິກເຊິ່ງ ເພື່ອຍາດແຍ່ງການຊ່ວຍເຫຼືອດ້ານທຶນຮອນ ແລະ ວິຊາການ ເພື່ອພັດທະນາຂະແໜງທະນາຄານຂອງ ສປປ ລາວ ໃຫ້ກ້າວໜ້າຍິ່ງໆຂຶ້ນ.
ບົດຂ່າວ: ກົມຈັດຕັ້ງ ແລະ ພະນັກງານ
ພາບໂດຍ: ສົມພິດ ທຳມະວົງ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |