ພັນລະຍາປະທານປະເທດ ຢ້ຽມຢາມສູນໃຫ້ຄໍາປຶກສາ ແລະ ຝຶກອົບຮົມວິຊາຊີບ ທີ່ຈຳປາສັກ

ທ່ານ ນາງ ນາລີ ສີສຸລິດ ພັນລະຍາຂອງທ່ານປະທານປະເທດ ແຫ່ງ ສປປ ລາວ, ພ້ອມດ້ວຍບັນດາຄອບຄົວການນຳຂັ້ນສູນກາງ, ໄດ້ເຄື່ອນໄຫວຢ້ຽມຢາມສູນໃຫ້ຄໍາປຶກສາ ແລະ ຝຶກອົບຮົມວິຊາຊີບໃຫ້ແກ່ແມ່ຍິງຂອງສະຫະພັນແມ່ຍິງແຂວງ ທີ່ເມືອງໂພນທອງ ແຂວງຈຳປາສັກ, ໂດຍມີ ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ ພ້ອມດ້ວຍພັນລະຍາ ແລະ ຄະນະ ຮ່ວມຕິດຕາມດ້ວຍ.

ໃຫ້ການຕ້ອນຮັບຄະນະເມື່ອວັນທີ 11 ມັງກອນ 2022 ມີ ທ່ານ ນາງ ວາດສະໜາ ສີລິມາ ປະທານແນວລາວສ້າງຊາດແຂວງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ທ່ານ ນາງ ເຕດາວັນ ແກ້ວພິລາວັນ ປະທານສະຫະພັນແມ່ຍິງແຂວງ, ທ່ານ ສຸພາບ ທໍາມະຮັກສາ ເຈົ້າເມືອງໂພນທອງ, ມີການນຳແຂວງ, ສະຫະພັນແມ່ຍິງແຂວງ ແລະ ເມືອງ ເຂົ້າຮ່ວມ.

ໃນໂອກາດດັ່ງກ່າວ, ປະທານສະຫະພັນແມ່ຍິງແຂວງຈຳປາສັກ ໄດ້ລາຍງານວ່າ: ສູນຝຶກອົບຮົມວິຊາຊີບແຫ່ງນີ້, ສ້າງຕັ້ງຂຶ້ນໃນປີ 2017 ໄດ້ຮັບທຶນຊ່ວຍເຫຼືອໃນການສ້າງສູນຝຶກອົບຮົມວິຊາຊີບ ຈາກສະຫະພັນແມ່ຍິງແຂວງ ດັກລັກ ສສ ຫວຽດນາມ ຈໍານວນ 400 ລ້ານດົ່ງ, ທຶນສ້າງຫ້ອງພັກ ຈາກສະຫະພັນແມ່ຍິງ ນະຄອນໂຮຈິມິນ 500 ລ້ານດົ່ງ ແລະ ທຶນຊື້ອຸປະກອນຮັບໃຊ້ໃນການຝຶກອົບຮົມ 70 ລ້ານດົ່ງ; ເປັນສູນຂະໜາດນ້ອຍ, ບັນຈຸຈັກຫຍິບໄດ້ 25 ເຄື່ອງ, ຊຶ່ງທຳການເປີດຝຶກອົບຮົມຊຸດທຳອິດໃນທ້າຍປີ 2018, ປັດຈຸບັນນັບເປັນຊຸດທີ 10, ມີຜູ້ເຂົ້າຮ່ວມຝຶກທັງໝົດ 203 ຄົນ, ເພດຊາຍ 4 ຄົນ, ວິຊາຕັດຫຍິບ 188 ຄົນ ແລະ ວິຊາເສີມສວຍ 25 ຄົນ.

ຈຸດປະສົງກໍເພື່ອສ້າງວຽກເຮັດງານທຳໃຫ້ແກ່ແມ່ຍິງທີ່ທຸກຍາກ, ດ້ອຍໂອກາດ, ແມ່ຍິງທີ່ບໍ່ມີວຽກເຮັດງານທຳ ແລະ ຜູ້ຊາຍທີ່ມີຄວາມສົນໃຈ ອີກດ້ວຍ.

ໂອກາດນີ້, ທ່ານ ນາງ ນາລີ ສີສຸລິດ ໄດ້ມີຄຳເຫັນໂອ້ລົມໃຫ້ກຳລັງໃຈ, ພ້ອມທັງໄດ້ມອບເງິນສົດຈຳນວນໜຶ່ງ ເພື່ອຊຸກຍູ້ການປະຕິບັດໜ້າທີ່ວຽກງານຂອງສູນດັ່ງກ່າວ.

แชร์