“ໂອມິຄຣອນ” ແຜງລິດເປັນໂຄວິດ-19 ສາຍພັນຫຼັກຂອງຟິລິປປິນສ໌ ແລ້ວ

ທ່ານ ຟຣານຊິສໂກ ດູເກ ລັດຖະມົນຕີກະຊວງສາທາລະນະສຸກຂອງຟິລິປິນສ໌, ເປີດເຜີຍວ່າ ພະຍາດໂຄວິດ-19 ກາຍພັນສາຍພັນ “ໂອມິຄຣອນ” ໄດ້ຍົກລະດັບການລະບາດຂຶ້ນເປັນເຊື້ອໄວຣັສສາຍພັນຫຼັກໃນຟິລິປປິນສ໌ ແທນສາຍພັນ “ເດລຕາ” ແລ້ວ.

ອີງຕາມການລາຍງານຂອງສຳນັກຂ່າວຕ່າງປະເທດ ເມື່ອວັນທີ 11 ມັງກອນ 2022 ໂດຍອ້າງການເປີດເຜີຍຂອງ ລັດຖະມົນຕີກະຊວງສາທາລະນະສຸກຟິລິປິນສ໌, ທີ່ວ່າ “ຂະນະນີ້, ເຊື້ອໂຄໂຣນາສາຍພັນໃໝ່ທີ່ກໍ່ໂຣກໂຄວິດ-19 ຊະນິດກາຍພັນ ສາຍພັນ ໂອມິຄຣອນ ຂຶ້ນແທ່ນເປັນເຊື້ອໄວຣັສສາຍພັນຫຼັກໃນປະເທດຟິລິປປິນສ໌ແທນ ເດລຕາ ແລ້ວ”.

ທ່ານ ຟຣານຊິສໂກ ດູເກ ໄດ້ກ່າວລະຫວ່າງການປະຊຸມກັບ ປະທານາທິບໍດີ ໂຣດຣິໂກ ດູເຕຣ໌ເຕ ຂອງຟິລິປປິນສ໌ ຊຶ່ງບັນທຶກໄວ້ລ່ວງໜ້າ ແລະ ອອກອາກາດໃນຊ່ວງກາງຄືນຂອງວັນທີ 10 ມັງກອນ ຜ່ານມາວ່າ “ການຈັດອັນດັບຂໍ້ມູນທາງພັນທຸກຳເມື່ອວັນທີ 3 ມັງກອນ ພົບຕົວຢ່າງປະມານ 60,42% ຫຼື ສິ່ງສົ່ງກວດ 29 ລາຍການຈາກ 48 ລາຍການ ເປັນສາຍພັນໂອມິຄຣອນ ຂະນະທີ່ປະມານ 37,5% ຫຼື ສິ່ງສົ່ງກວດ 18 ລາຍການ ເປັນສາຍພັນ ເດລຕາ”.

ທັງນີ້ ຟິລິປປີນສ໌ ກຳລັງຜະເຊີນກັບການລະບາດຂອງພະຍາດໂຄວິດ-19 ຮອບທີ 4 ນັບຕັ້ງແຕ່ເກີດການລະບາດໃນປະເທດເມື່ອຕົ້ນປີ 2020 ຊຶ່ງລາຍງານຜົນການກວດ, ພົບຜູ້ຕິດເຊື້ອພະຍາດໂຄວິດ-19 ເພີ່ມ 33.169 ຄົນ ເມື່ອວັນທີ 10 ມັງກອນ ທຳລາຍສະຖິຕິຜູ້ປ່ວຍໃໝ່ລາຍວັນ, ເຮັດໃຫ້ມີຕົວເລກຜູ້ຕິດເຊື້ອສະສົມເກືອບ 3 ລ້ານຄົນ ໃນນີ້, ເສຍຊີວິດແລ້ວ 52.293 ລາຍ.

แชร์