ສາລະວັນ ເລັ່ງຟື້ນຟູການທ່ອງທ່ຽວ

ທ່ານ ໂພໄຊ ໄຊຍະສອນ ເຈົ້າແຂວງສາລະວັນ ໄດ້ໃຫ້ທິດຊີ້ນຳຂະແໜງການທ່ອງທ່ຽວຂອງແຂວງ ຈົ່ງອອກແຮງພັດທະນາແຫຼ່ງທ່ອງທ່ຽວເພື່ອຮອງຮັບກິດຈະກຳຕ່າງໆ,  ພ້ອມປັບປຸງພື້ນຖານໂຄງລ່າງ, ສ້າງສິ່ງອຳນວຍຄວາມສະດວກ, ສ້າງກິດຈະກຳທ່ອງທ່ຽວໃຫ້ມີຫຼາຍສີສັນ, ຫຼາຍທາງເລືອກ ໂດຍສະເພາະແມ່ນການປັບປຸງຄືນຈຸດທີ່ໄດ້ຮັບຜົນກະທົບຈາກລົມພະຍຸ, ເພື່ອຮອງຮັບໃຫ້ແກ່ການທ່ອງທ່ຽວໃນໄລຍະບຸນປີໃໝ່ລາວທີ່ຈະມາເຖິງນີ້,  ພ້ອມນັ້ນ, ກໍຕ້ອງເອົາໃຈໃສ່ຄຸ້ມຄອງ ແລະ ອະນຸຮັກສິ່ງແວດລ້ອມ, ຄົງຄວາມເປັນທຳມະຊາດ, ເພື່ອເຮັດໃຫ້ການທ່ອງທ່ຽວທີ່ປອດມົນລະພິດ ຕິດພັນກັບການນຳສະເໜີຄວາມໂດດເດັ່ນຂອງວິຖີຊີວິດປະຊາຊົນບັນດາເຜົ່າ.

ໃນໂອກາດທີ່ທ່ານເຈົ້າແຂວງສາລະວັນ ໄດ້ເຄື່ອນໄຫວຢ້ຽມຢາມ, ຊຸກຍູ້ການພັດທະນາ ແລະ ທ່ຽວຊົມສະຖານທີ່ທ່ອງທ່ຽວ ຕາດເລາະ-ຕາດຮັງ, ເມື່ອອາທິດທີ່ຜ່ານມາ ໂດຍຄະນະນຳແຂວງໄດ້ຕິດຕາມເບິ່ງການກໍ່ສ້າງຂົວຂ້າມນໍ້າເຊເສັດ ຕາດຮັງ, ທີ່ໄດ້ຮັບຜົນກະທົບຈາກລົມພາຍຸໃນ​ໄລ​ຍະຜ່ານມາ ແລະ ການກໍ່ສ້າງກັນເຈື່ອນ ຊຶ່ງປັດຈຸບັນ, ພາກສ່ວນກ່ຽວຂ້ອງ ແລະ ບໍລິສັດ ພວມຂຸ້ນຂ້ຽວກໍ່ ສ້າງເພື່ອໃຫ້ສໍາເລັດໃນໄວໆນີ້ ແລະ ໃຫ້ນຳໃຊ້ໄດ້ທັນເທສະການບຸນປີໃໝ່ລາວທີ່ຈະມາເຖິງ ພ້ອມນັ້ນ, ກໍໄດ້ໄປຢ້ຽມຢາມສະຖານທີ່ທ່ອງທ່ຽວຕາດເລາະ-ຕາດຮັງ, ດອນຝັນດີ, ຈຸດກໍ່ສ້າງເຮືອນຊົງລາວ ​ຊຶ່ງມີແຜນຈະສ້າງເປັນໂຮມສະເຕຍ໌ (Home Stay) ເພື່ອຮອງຮັບນັກທ່ອງທ່ຽວ.

ແຫຼ່ງທ່ອງທ່ຽວຕາດເລາະ-ຕາດຮັງ ເປັນແຫຼ່ງທ່ອງທ່ຽວທີ່ໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະ ຕ່າງປະເທດ, ສາມາດດຶງດູດນັກທ່ອງທ່ຽວເຂົ້າໄປທ່ຽວແຂວງສາລະວັນໄດ້ຢ່າງຕໍ່ເນື່ອງ, ສ້າງຊື່ສຽງດ້ານການທ່ອງທ່ຽວ ແລະ ສາມາດເຊື່ອມໂຍງສູ່ແຫຼ່ງທ່ອງທ່ຽວຕ່າງໆຂອງແຂວງໄດ້ຢ່າງກວ້າງຂວາງ, ແຫຼ່ງທ່ອງທ່ຽວຕາດເລາະ-ຕາດຮັງ ຫ່າງຈາກເທສະບານເມືອງສາລະວັນ ປະມານ 30 ກວ່າກິໂລແມັດ, ມີນໍ້າຕົກຕາດທີ່ສວຍງາມ, ມີທໍາມະຊາດທີ່ອຸດົມສົມບູນ, ມີບ່ອນທ່ຽວຊົມ, ຫຼິ້ນນ້ຳ ແລະ ສະຖານທີ່ພັກຜ່ອນຫຼາຍຈຸດ.

แชร์