ພຽງວັນດຽວ ອະເມຣິກາ ຕິດໂຄວິດ 1,13 ລ້ານຄົນ

ລາຍງານຂ່າວຕ່າງປະເທດໃນວັນທີ 11 ມັງກອນ 2022 ຊີ້ວ່າ ປະຊາກອນຂອງສະຫະລັດອະເມຣິກາ ຢ່າງໜ້ອຍ 1,13 ລ້ານຄົນ ຕິດເຊື້ອໂຄວິດ-19 ເມື່ອວັນທີ 10 ມັງກອນ, ຊຶ່ງຖືເປັນຕົວເລກການຕິດເຊື້ອໃນປະເທດດຽວສູງທີ່ສຸດໃນໜຶ່ງວັນຂອງໂລກ ທີ່ບໍ່ເຄີຍເກີດຂຶ້ນມາກ່ອນ.

            ສະຖິຕິການຕິດເຊື້ອສູງທີ່ສຸດໃນໜຶ່ງວັນກ່ອນໜ້ານີ້ຢູ່ທີ່ 1,03 ລ້ານຄົນ ເມື່ອວັນທີ 3 ມັງກອນ ຊຶ່ງຈຳນວນຜູ້ຕິດເຊື້ອ ມັກຈະຖືກລາຍງານໃນວັນຈັນ ເນື່ອງຈາກຫຼາຍລັດໃນອະເມຣິກາບໍ່ໄດ້ລາຍງານຈຳນວນຜູ້ຕິດເຊື້ອໃໝ່ໃນຊ່ວງທ້າຍອາທິດ, ເມື່ອລັດຕ່າງໆບໍ່ໄດ້ລາຍງານຕົວເລກຜູ້ຕິດເຊື້ອໃນວັນຈັນທັງໝົດ ດັ່ງນັ້ນ ຈິ່ງມີຄວາມເປັນໄປໄດ້ທີ່ຈຳນວນຜູ້ຕິດເຊື້ອຕົວຈິງອາດຈະສູງກວ່າຕົວເລກ 1,13 ລ້ານຄົນ ຂະນະທີ່ຄ່າສະເລ່ຍຜູ້ຕິດເຊື້ອໃໝ່ຂອງອະເມຣິກາ ໄລຍະອາທິດຜ່ານມາ ແມ່ນຢູ່ທີ່ປະມານ 7 ແສນຄົນ ຊຶ່ງນັບວ່າເພີ່ມຂຶ້ນ 3 ເທົ່າໃນເວລາ 2 ສັບປະດາ.

            ຕົວເລກຜູ້ປ່ວຍລາຍວັນທີ່ພຸ່ງສ້າງສະຖິຕິສູງສຸດຄັ້ງໃໝ່ຂອງອະເມຣິກາ ແມ່ນມີຂຶ້ນໃນຂະນະທີ່ຈຳນວນຜູ້ເຂົ້າຮັບການປິ່ນປົວໃນໂຮງໝໍເນື່ອງຈາກໂຄວິດ-19 ພຸ່ງຂຶ້ນຫຼາຍກວ່າ 135.500 ຄົນ ຊຶ່ງສູງກວ່າສະຖິຕິຄັ້ງກ່ອນເມື່ອເດືອນມັງກອນ 2021 ຊຶ່ງຢູ່ທີ່ 132.051 ຄົນ ຫຼື ເພີ່ມຂຶ້ນ 2 ເທົ່າໃນເວລາ 3 ສັບປະດາ.

แชร์