ແກ້ບັນຫາສົ່ງອອກສິນຄ້າລາວໄປຈີນ ຂະຫຍາຍເວລາ ຜ່ານດ່ານສາກົນ ບໍ່ຫານ ຊົ່ວຄາວ

ຄະນະກຳມະການບໍລິຫານເຂດຮ່ວມມືເສດຖະກິດ ບໍ່ຫານ ສປ ຈີນ-ບໍ່ເຕັນ ສປປ ລາວ ອອກແຈ້ງການ ເພື່ອຂະຫຍາຍເວລາໃນການຜ່ານດ່ານສາກົນ ບໍ່ຫານ ສປ ຈີນ ຊົ່ວຄາວ ຊຶ່ງເລີ່ມປະຕິບັດນັບແຕ່ມື້ອອກແຈ້ງການເປັນຕົ້ນໄປ.

ທັງນີ້ ໄດ້ມີການກຳນົດນັບແຕ່ເວລາ 8:30-17:30 (ເວລາປັກກິ່ງ) ຫຼື 7:30-16:30 (ໂມງລາວ) ກວດປ່ອຍລົດບັນທຸກສິນຄ້າທຸກປະເພດ (ລວມທັງສິນຄ້າພາຍໃຕ້ໂຄງການປູກພືດທົດແທນ), ນັບແຕ່ເວລາ 17:30 - 21:00 (ເວລາປັກກິ່ງ) ຫຼື 16:30 - 20:00 (ໂມງລາວ) ກວດປ່ອຍລົດເປົ່າຫວ່າງ (ການກໍານົດເວລາປ່ອຍລົດແຕ່ລະມື້ ແມ່ນຂຶ້ນກັບທັງສອງຝ່າຍຕົກລົງກັນຕາມສະ ພາບຕົວຈິງ).

ເນື່ອງຈາກໄລຍະນີ້, ເປັນລະດູການສົ່ງອອກສິນຄ້າກະສິກໍາຈຳນວນຫຼາຍ ເຮັດໃຫ້ດ່ານ ບໍ່ຫານ-ບໍ່ເຕນ ມີຄວາມແອອັດຢ່າງໜັກ ດັ່ງນັ້ນ ອີງຕາມໜັງສືຂອງຄະນະກຳມະການບໍລິຫານດ່ານສາກົນບໍ່ເຕັນ ແຂວງຫຼວງນໍ້າທາ ສປປ ລາວ ກ່ຽວກັບການແກ້ໄຂບັນຫາແຮງງານຈີນກັບປະເທດ ແລະ ລົດບັນທຸກສິນຄ້າຜ່ານດ່ານ ແລະ ໜັງສືຂອງຫ້ອງການບໍລິຫານດ່ານບໍ່ຫານ ກິ່ງແຂວງສິບສອງພັນນາ ສປ ຈີນ ກ່ຽວກັບການສະເໜີໃຫ້ຟື້ນຟູເສັ້ນທາງຢູ່ດ່ານບໍ່ຫານ, ພ້ອມທັງໃຫ້ການສະໜັບສະໜູນວຽກງານທີ່ກ່ຽວຂ້ອງກັບການຂົນສົ່ງ, ເພື່ອແກ້ໄຂບັນຫາດັ່ງກ່າວ ທັງເພື່ອຫຼຸດຜ່ອນຄວາມແອອັດຢູ່ດ່ານ, ຄະນະກຳມະການບໍລິຫານເຂດຮ່ວມມືເສດຖະກິດ ບໍ່ຫານ ສປ ຈີນ-ບໍ່ເຕັນ ສປປ ລາວ ຈິ່ງໄດ້ອອກແຈ້ງການກ່ຽວກັບການປະຕິບັດໂມງເວລາປະຈໍາການ ທີ່ດ່ານສາກົນ ບໍ່ເຕັນ ແຂວງຫຼວງນໍ້າທາ, ເລກທີ 001/ຄດບ, ລົງວັນທີ 5 ມັງກອນ 2022 ສະບັບພາສາລາວ ແລະ ສະບັບພາສາຈີນ.

ຂອບໃຈຂໍ້ມູນ-ພາບຈາກ ເວ໊ບໄຊຕ໌ ກະຊວງອຸດສາຫະກຳ ແລະ ການຄ້າ

แชร์