ໄຂ້ຫວັດທຳມະດາ ພູມຄຸ້ມກັນໃໝ່ ໄຂທາງສູ່ວັຄຊີນສູດສອງ

ເມື່ອໄຂ້ຫວັດທຳມະດາ ສາມາດຕໍ່ສູ້ໂຄວິດ-19 ໄດ້, ຈາກຂໍ້ມູນດັ່ງກ່າວ ຈິ່ງກໍ່ເກີດຄວາມຫວັງ ໃໝ່ໃຫ້ເຫຼົ່ານັກວິຊາການທີ່ໄດ້ຄົ້ນພົບ ທີ-ເຊລລ໌ (T-cells) ຊຶ່ງຈະເປັນດອກກຸນແຈສຳຄັນທີ່ຈະນຳໄປສູ່ການຜະລິດວັຄຊີນສູດສອງ.

            ອີງຕາມການນຳສະເໜີຂອງສຳນັກຂ່າວຕ່າງປະເທດ ໂດຍອ້າງການເປີດເຜີຍລາຍງານຜົນການສຶກສາຂອງ ອິນພິເຣຍລຄອລເລຈ ລອນດອນ (Imperial College London) ທີ່ເຜີຍແຜ່ໃນວັນທີ 10 ມັງກອນ 2022 ໂດຍລະບຸການຄົ້ນພົບ T-cells ຈາກໄຂ້ຫວັດທໍາທະດາໃນລະດັບສູງ ສາມາດປ້ອງກັນໂຄວິດ-19 ໄດ້ ຊຶ່ງຖືເປັນແນວທາງໃນການພັດທະນາວັຄຊີນປ້ອງກັນພະຍາດໂຄວິດ-19 ຕໍ່ໄປໃນອະນາຄົດ.

            ໃນລາຍງານດຽວກັນ ກໍມີຫຼັກຖານວ່າ ລະດັບແອນຕິບໍດີ ຕໍ່ໂຄວິດ-19 ທີ່ໄດ້ຈາກການສັກວັຄຊີນຈະຫຼຸດລົງ ເມື່ອເວລາຜ່ານໄປໄດ້ປະມານ 6 ເດືອນ ເຮັດໃຫ້ T-cells ຊຶ່ງເປັນເຊລລ໌ພູມຄຸ້ມກັນຊະນິດໜຶ່ງ ກາຍເປັນຄວາມຫວັງສຳຄັນໃນການຕໍ່ສູ້ກັບໂຄວິດ-19, ການສຶກສາດັ່ງກ່າວ ເລີ່ມຕົ້ນເມື່ອເດືອນກັນຍາ ປີຜ່ານມາ ໂດຍທີມວີໄຈໄດ້ທຳການສຶກສາລະດັບຂອງ T-cells ທີ່ເກີດຈາກໄຂ້ຫວັດໃນ 52 ຄົວເຮືອນ ຊຶ່ງສຳຜັດໃກ້ຊິດກັບຜູ້ປ່ວຍໂຄວິດ-19 ຫຼັງຈາກນັ້ນບໍ່ດົນ, ເພື່ອສຶກສາການເຮັດປະຕິກິຣິຍາຂ້າມ (cross-reactive) ຂອງ T-cells ຈາກໄຂ້ຫວັດ ແລະ ຕິດຕາມເບິ່ງວ່າພວກເຂົາຈະຕິດໂຄວິດ-19 ຫຼືບໍ່? ຊຶ່ງກໍພົບວ່າ ມີ 26 ຄົນທີ່ບໍ່ຕິດເຊື້ອໂຄວິດ-19 ແລະ ພວກເຂົາກໍມີລະດັບ ທີ-ເຊລລ໌ ຈາກໄຂ້ຫວັດສູງກວ່າຄົນທີ່ຕິດເຊື້ອຢ່າງມີໄນສຳຄັນ.

ຢ່າງໃດກໍຕາມ ທີມວິໄຈກໍຍັງບໍ່ທັນໄດ້ລະບຸວ່າ ການປ້ອງກັນຈາກ T-cells  ສາມາດຢູ່ໄດ້ດົນປານໃດ? ແຕ່ກໍມີການລະບຸໂດຍນັກວິໄຈວ່າ “ເຮົາພົບ ທີ-ເຊລລ໌ ທີ່ມີຢູ່ກ່ອນແລ້ວໃນລະດັບສູງ ໂດຍທີ່ຮ່າງກາຍສ້າງຂຶ້ນເມື່ອຕິດເຊື້ອໄວຣັສໂຄໂຣນາໃນມະນຸດ ເຊັ່ນວ່າ ໄຂ້ຫວັດທຳມະດາ ສາມາດປ້ອງກັນການຕິດເຊື້ອໂຄວິດ-19 ໄດ້”.

แชร์