ລາວ-ຫວຽດນາມ ລົງນາມໃນສັນຍາສ້າງສູນຝຶກອົບຮົມຊາວໜຸ່ມ

ເພື່ອສຶກສາອົບຮົມຊາວໜຸ່ມ ​ເຍົາວະຊົນ ສອງຊາດ (ລາວ-ຫວຽດນາມ) ໃຫ້ມີຄວາມຮັບຜິດ ຊອບໃນພາລະກິດສືບທອດ ແລະ​ ກໍ່ສ້າງສາຍພົວພັນແບບພິເສດຂອງສອງປະເທດໃຫ້ໝັ້ນຄົງ ແລະ​ ສວຍສົດງົດງາມ,​ ດັ່ງນັ້ນ ໃນການເຂົ້າຮ່ວມກອງປະຊຸມຄັ້ງທີ 44 ຂອງຄະນະກໍາມາທິການຮ່ວມມື ລາວ-ຫວຽດນາມ​ ໂດຍທັງສອງຝ່າຍຈິ່ງເຫັນດີລົງນາມໃນສັນຍາຮ່ວມມືປະຕິບັດໂຄງການກໍ່ສ້າງສູນຝຶກອົບຮົມຊາວໜຸ່ມ,​ ເຍົາວະຊົນ ລາວ-ຫວຽດນາມ ທີ່ນະຄອນຫຼວງວຽງຈັນ ສປປ​ ລາວ ໂດຍໄດ້ຮັບທຶນຊ່ວຍເຫຼືອຈາກລັດຖະບານ ສສ ຫວຽດນາມ​.

ເນື່ອງໃນໂອກາດເຂົ້າຮ່ວມກອງປະຊຸມຄັ້ງທີ 44 ຂອງຄະນະກໍາມາທິການຮ່ວມມືທະວີພາຄີ ລາວ-ຫວຽດນາມ​ ຊຶ່ງຈັດຂຶ້ນໃນລະຫວ່າງວັນທີ 9-10 ມັງກອນ 2022 ທີ່ສໍານັກງານສູນກາງຊາວໜຸ່ມຄອມມິວນິສຕ໌ໂຮ່ຈິມິນ ນະຄອນຫຼວງ​ຮ່າໂນ້ຍ ​ສສ​ ຫວຽດນາມ​ ສະຫາຍ ອາລຸນໄຊ​ ສູນນະລາດ​ ກຳມະການ​ສູນກາງ​ພັກ​ ເລຂາ​ຄະນະ​ບໍລິຫານ​ງານ​ ສຊປລ ແລະ ສະຫາຍ​ ຫຽວຽນ ແອງຕັວນ ກຳມະການສູນກາງພັກ​ ເລຂາທີໜຶ່ງສູນກາງຊາວໜຸ່ມກອມມູນິດໂຮ່ຈິມີນ ພ້ອມຄະນະ ໄດ້ພົບປະແບບບໍ່ເປັນທາງການ,​ ຊຶ່ງບັນຍາກາດການຕ້ອນຮັບ ແລະ​ ​ສົນທະນາແມ່ນດຳເນີນໄປຢ່າງອົບອຸ່ນ ແລະ​ ສະໜິດສະໜົມ​ ໂອກາດນີ້ ທັງສອງຝ່າຍໄດ້ຕີລາຄາສູງຕໍ່ການພົວພັນ,​ ການຮ່ວມມືຂອງສອງປະເທດໃນໄລຍະຜ່ານມາ ແລະ​ ຈະພ້ອມກັນຊຸກຍູ້ການພົວພັນຮ່ວມມືໃນໄລຍະຕໍ່ໜ້າໃຫ້ມີປະສິດທິພາບສູງ ແລະ ​ຝ່າຍຫວຽດນາມ ກໍໄດ້ຕີລາຄາສູງໃນການພົບປະຄັ້ງນີ້ ໂດຍຖືເປັນແຂກຕ່າງປະເທດຄະນະທຳອິດ ທີ່ໄດ້ຢ້ຽມຢາມສູນກາງຊາວໜຸ່ມຄອມມິວນິສຕ໌ໂຮ່ຈິມິນ ໃນປີ 2022.

ພິເສດໃນປີ 2022 ນີ້ ກໍເປັນປີທີ່ມີຄວາມໝາຍ,​  ເປັນປີແຫ່ງການສະເຫຼີມສະຫຼອງ 60​ ປີ​ ແຫ່ງວັນສ້າງຕັ້ງສາຍພົວພັນທາງການທູດ ແລະ​ 45 ປີ ແຫ່ງວັນເຊັນສົນທິສັນຍາມິດຕະພາບ ລາວ-ຫວຽດນາມ-ລາວ​ ຊຶ່ງຊາວໜຸ່ມສອງປະເທດ ຈະໄດ້ພ້ອມກັນສ້າງກິດຈະກໍາເພື່ອສະເຫຼີມສະຫຼອງໃນວັນສໍາຄັນດັ່ງກ່າວ​, ໃຫ້ກຽດເຂົ້າຮ່ວມເປັນສັກຂີພິຍານໂດຍ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຟ້າມ ມິງ ຈິງ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍການນຳຂັ້ນສູງ ສອງປະເທດ.

ຂ່າວ: ສົມຈັນ

แชร์