ຫຼາຍກວ່າ 70% ຂອງປະຊາກອນລາວ ຕ້ອງໄດ້ສັກວັຄຊີນພາຍໃນປີນີ້

ລັດຖະບານ ກໍຄືກະຊວງສາທາລະນະສຸກ, ເລັ່ງໃສ່ວຽກງານປ້ອງກັນສຸຂະພາບມວນຊົນເປັນຫຼັກ ໂດຍການຈັດຫາວັຄຊີນປ້ອງກັນໂຄວິດ-19 ມາສັກໃຫ້ປະຊາຊົນເພື່ອສ້າງພູມຄຸ້ມກັນໝູ່ ແນໃສ່ຫຼຸດຜ່ອນຜົນກະທົບທີ່ຮຸນແຮງຫາກເກີດກໍລະນີຕິດເຊື້ອ ຊຶ່ງຕັ້ງເປົ້າໃຫ້ປະຊາຊົນເຂົ້າເຖິງບໍລິການສັກວັຄຊີນໃຫ້ບັນລຸ 70% ຂຶ້ນໄປພາຍໃນປີນີ້.

ທ່ານ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາ ລະນະສຸກ, ໄດ້ນໍາສະເໜີຜົນສໍາເລັດຂອງວຽກງານການສັກວັຄຊີນໂຄວິດ-19 ແລະ ແຜນຍຸດທະສາດທີ່ຈະຈັດຕັ້ງປະຕິບັດໃນປີ 2022 ເພື່ອເພີ່ມອັດຕາການປົກຄຸມການສັກວັຄຊິນໃຫ້ສູງຂຶ້ນ ຊຶ່ງທ່ານໄດ້ກ່າວເມື່ອວັນທີ 8 ມັງກອນ 2022 ທີ່ກະຊວງສາທາລະນະສຸກວ່າ “ປັດຈຸບັນ ສປປ ລາວ ສາມາດບັນລຸການສັກວັຄຊີນເຂັມທີ 1 ກວມເອົາ 62,82% ແລະ ເຂັມທີ 2 ກວມເອົາ 50,23% ຕົວເລກດັ່ງກ່າວກໍຍ້ອນປະຊາຊົນບັນດາເຜົ່າມີຄວາມຕື່ນຕົວ ເຫັນໄດ້ປະໂຫຍດ ແລະ ຄຸນນະພາບໃນການສ້າງພູມຄຸ້ມກັນໃຫ້ກັບຮ່າງກາຍ ຊ່ວຍຫຼຸດຜ່ອນອາການຕິດເຊື້ອ ຫຼຸດຜ່ອນຈາກການເຈັບເປັນ ແລະ ຫຼຸດຜ່ອນຈາກການຕາຍເນື່ອງຈາກພະຍາດໂຄວິດ-19”.

ຂໍ້ມູນຂອງກະຊວງສາທາລະນະສຸກ ຊີ້ໃຫ້ເຫັນວ່າ ຜູ້ທີ່ໄດ້ຮັບວັຄຊີນ 80,2% ເມື່ອຕິດເຊື້ອແມ່ນບໍ່ມີອາການສະແດງ ແລະ 18,6% ມີອາການແບບເບົາບາງ ຊຶ່ງມີພຽງ 1,2% ມີອາການຮຸນແຮງ; ສິ່ງປະຈັກຕາອັນເກີດຈາກຜົນຂອງການໄດ້ຮັບວັຄຊີນ ໂດຍລັດຖະບານຖືເປັນນະໂຍບາຍສຳຄັນໃນການສ້າງພູມຄຸ້ມກັນໝູ່ໃຫ້ແກ່ປະຊາຊົນ ດັ່ງນັ້ນ ຈິ່ງໄດ້ແຈກຢາຍວັຄຊີນໃຫ້ບັນດາແຂວງໃນທົ່ວປະເທດ, ສ່ວນນະຄອນຫຼວງວຽງຈັນ ແມ່ນຈະໄດ້ເລີ່ມໃຫ້ບໍລິການສັກວັຄຊີນນັບແຕ່ວັນທີ 10 ມັງກອນເປັນຕົ້ນມາ ຢູ່ໂຮງໝໍສູນກາງແຕ່ລະແຫ່ງ, ຈຸດວັດຈີນດົງປ່າແຫຼບ, ສ່ວນໂຮງໝໍເມືອງທຸກແຫ່ງໃນນະຄອນຫຼວງ ແມ່ນເລີ່ມໃຫ້ບໍລິການສັກເລີ່ມແຕ່ວັນທີ 11 ມັງກອນນີ້ເປັນຕົ້ນໄປ ສຳ ລັບກຸ່ມເປົ້າໝາຍທີ່ຈະສັກແມ່ນອາຍຸ 12-17 ປີ ແລະ ຜູ້ອາຍຸສູງ ຜູ້ມີພະຍາດປະຈໍາຕົວ ແມ່ນຖືເປັນບຸລິມະສິດ ແລະ ຜູ້ສັກຄົບ 2 ເຂັມມາໄດ້ 5 ເດືອນແລ້ວ ກໍສາມາດສັກເຂັມກະຕຸ້ນໄດ້ ບໍ່ວ່າຈະເປັນວັຄຊີນ Astrazeneca, Senopharm, Senovax ແມ່ນມີພຽງພໍສຳລັບບໍລິການແກ່ປະຊາຊົນ.

 

แชร์