ຄັງສຳຮອງສະກຸນເງິນຕາຕ່າງປະເທດຂອງຈີນ ເພີ່ມຂຶ້ນ 27,8 ຕື້ໂດລາ

ຕົວເລກສະຖິຕິຫຼ້າສຸດຂອງອົງການຄຸ້ມຄອງເງິນຕາຕ່າງປະເທດຂອງຈີນສະແດງໃຫ້ເຫັນວ່າ, ນັບມາຮອດທ້າຍເດືອນທັນວາປີ 2021, ຄັງສຳຮອງສະກຸນເງິນຕາຕ່າງປະເທດຂອງຈີນ ໄດ້ບັນລຸເຖິງ 3250,2 ຕື້ໂດລາສະຫະລັດ, ເມື່ອທຽບກັບທ້າຍເດືອນພະຈິກປີກາຍນີ້ແລ້ວ ໄດ້ເພີ່ມຂຶ້ນ 27,8 ຕື້ໂດລາ ຫຼື 0.86%.

ຕາມຂ່າວ Cri  ລາຍງານວ່າ ທ່ານ ນາງ ວາງຊູ່ນຢີ່ງ ຮອງຫົວໜ້າອົງການຄຸ້ມຄອງເງິນຕາຕ່າງປະເທດຂອງຈີນ, ທັງເປັນໂຄສົກຂອງອົງການດັ່ງກ່າວໄດ້ກ່າວວ່າ: ໃນເດືອນທັນວາປີ 2021 ຜ່ານມາ, ຕະຫຼາດເງິນຕາ ຕ່າງປະເທດຂອງຈີນໄດ້ເຄື່ອນໄຫວຢ່າງໝັ້ນທ່ຽງ, ທຶນໝູນວຽນຂ້າມຊາດມີຄວາມຄຶກຄັກ ແລະເປັນລະບຽບດີ,  ໃນຕະຫຼາດການເງິນສາກົນ, ຍ້ອນໄດ້ຮັບຜົນກະທົບຈາກປັດໄຈຕ່າງໆເຊັ່ນພະຍາດໂຄວິດ-19 ສືບຕໍ່ແຜ່ລະບາດ, ຄວາມຄາດຫວັງດ້ານນະໂຍບາຍເງິນຕາຂອງປະເທດຕົ້ນຕໍ ແລະອື່ນໆ, ເຮັດໃຫ້ດັດຊະນີເງິນໂດລາສະຫະລັດ ຕົກຕໍ່າລົງ, ລາຄາຂອງຊັບສິນທາງການເງິນຂອງບັນດາປະເທດຕົ້ນຕໍມີການຕໍ່າລົງກ່ໍມີການເພີ່ມຂຶ້ນ.

ຄັງສຳຮອງສະກຸນເງິນຕາຕ່າງປະເທດແມ່ນຄິດໄລ່ດ້ວຍເງິນໂດລາ, ເງິນສຳຮອງທີ່ບໍ່ແມ່ນເງິນໂດລາ ເມື່ອ ແລກປ່ຽນເປັນເງິນໂດລາແລ້ວຈະໄດ້ເພີ່ມຂຶ້ນ, ບວກກັບປັດໄຈຈາກການປ່ຽນແປງຂອງລາຄາຊັບສິນ ແລະ ອື່ນໆ, ເຮັດໃຫ້ຄັງສຳຮອງສະກຸນເງິນຕາຕ່າງປະເທດໃນເດືອນດັ່ງກ່າວໄດ້ເພີ່ມຂຶ້ນ.

แชร์