ໄຊສົມບູນ ທຳລາຍອາວຸດລ່າເນື້ອ

ວັນທີ 6 ມັງກອນຜ່ານມາກອງບັນ ຊາການ ປກສ ແຂວງໄຊສົມບູນ ໄດ້ຈັດພິທີທຳລາຍອາວຸດລ່າເນື້ອ ແລະອຸປະກອນທີ່ຜິດກົດໝາຍ ປະຈຳປີ 2021 ຂຶ້ນ ເຂົ້າຮ່ວມເປັນປະທານຂອງທ່ານ ພົຕ ຄຳລຽງ ອຸທະໄກສອນ, ເຈົ້າແຂວງ, ປະທານປ້ອງກັນຊາດ-ປ້ອງກັນຄວາມສະຫງົບ ແຂວງໄຊສົມບູນ, ແລະ ພາກສ່ວນກ່ຽວຂ້ອງເຈົ້າຮ່ວມ.

ທ່ານ ພັທ ອິນປັນ ຍາດຕິວົງ, ຮອງກອງບັນຊາການ ປກສ ແຂວງ ໄດ້ຜ່ານບົດລາຍງານການຈັດຕັ້ງປະຕິບັດວຽກງານເກັບກູ້ອາວຸດເສິກ, ອາວຸດລ່າເນື້ອ ແລະເຄື່ອງທີ່ຜິດກົດໝາຍອື່ນໆ ໃນທົ່ວແຂວງເຊິ່ງໃນໄລຍະ 1 ປີທີ່ຜ່ານມາກອງບັນຊາ ການ ປກສ ແຂວງໄດ້ເປັນເຈົ້າການຈັດຕັ້ງຜັນຂະຫຍາຍມະຕິຄຳສັ່ງຂອງຂັ້ນເທິງຢ່າງຕັ້ງໜ້າ ເຄື່ອນໄຫວປະຕິບັດໜ້າທີ່ຕາມຫຼັກການວິຊາສະເພາະ ແລະພົວພັນປະສານສົມທົບກັບພາກສ່ວນຕ່າງໆທີ່ກ່ຽວຂ້ອງ ນຳເອົາບັນດາເອກະສານ, ນິຕິກຳຕ່າງໆ ລົງໄປເຜີຍແຜ່ໃຫ້ພະນັກງານ-ນັກຮົບ, ທະຫານ, ຕຳຫຼວດຕະຫຼອດຮອດພໍ່ແມ່ປະຊາຊົນ ຮັບຮູ້ ແລະເຂົ້າໃຈຕໍ່ລະບຽບກົດໝາຍເພື່ອສຶກສາອົບຮົມເຮັດໃຫ້ຜູ້ທີ່ມີອາວຸດເສິກ, ອາວຸດລ່າເນື້ອທີ່ຜິດກົດໝາຍໄວ້ໃນຄອບຄອງມີຄວາມຕື່ນຕົວ, ຈິງໃຈນຳເອົາອຸປະກອນຈຳນວນດັ່ງກ່າວ ມາມອບຕໍ່ເຈົ້າໜ້າທີ່ນອກນັ້ນ, ຍັງໄດ້ລົງຕັ້ງຈຸດ, ດ່ານລອຍເພື່ອນຳໃຊ້ມາດຕະການສະກັດກັ້ນ-ປາບປາມບຸກຄົນທີ່ນຳໃຊ້ອາວຸດບໍ່ຖືກຕ້ອງຢູ່ຕາມເສັ້ນທາງເຂົ້າ-ອອກແຕ່ລະເມືອງ.

ຜ່ານການເຄື່ອນໄຫວຕົວຈິງສາມາດເກັບກູ້ໄດ້: ອາວຸດເສີກ 4 ກະບອກ ພ້ອມດ້ວຍລູກປືນ 29 ລູກ, ອາວຸດລ່າເນື້ອ 341 ກະບອກ, ລະເບີດ 1 ໜ່ວຍ, ຈັກສະຕິນ 2 ເຄື່ອງ, ໝໍ້ຊ໋ອດ 14 ເຄື່ອງ, ໝໍ້ໄຟ 12 ໂວນ 3 ໜ່ວຍ, ເຄື່ອງຂອງມີຄົມ 2 ດວງ ແລະເຄື່ອງຂອງທີ່ຜິດກົດໝາຍອື່ນໆ ຈຳນວນໜຶ່ງ (ສຳລັບອາວຸດເສິກແມ່ນ ເກັບຮັກສາໄວ້ຢູ່ສາງກອງບັນຊາການ).

ໃນໂອກາດດັ່ງກ່າວ ທ່ານ ພົຕ ຄຳລຽງ ອຸທະໄກສອນ ຍັງໃຫ້ກຽດໂອ້ລົມຕໍ່ກັບພິທີກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບກອງບັນຊາການ ປກສ ແຂວງກໍຄືເຈົ້າໜ້າທີ່ວິຊາສະເພາະທີ່ໄດ້ເອົາໃຈໃສ່ເຄື່ອນໄຫວເກັບກູ້ອຸປະກອນທີ່ເກືອດຫ້າມຈຳນວນດັ່ງກ່າວມາໄດ້ໃນໄລຍະຜ່ານມາພ້ອມທັງເນັ້ນໜັກໃຫ້ເອົາໃຈໃສ່ສຶກສາອົບຮົມການ ເມືອງ-ແນວຄິດ ໃຫ້ກັບພະນັກງານ-ນັກຮົບ, ທະຫານ, ຕຳຫຼວດຕະຫຼອດຮອດພໍ່ແມ່ປະຊາຊົນມີຄວາມຮັບຮູ້, ເຂົ້າໃຈ ແລະມີຄວາມຕື່ນຕົວຫຼາຍຂຶ້ນ; ສືບຕໍ່ ເກັບກູ້, ຮິບໂຮມ, ອາວຸດເສິກ, ອາວຸດ ລ່າເນື້ອ ແລະອຸປະກອນທີ່ຜິດກົດໝາຍທີ່ຍັງຄົງຄ້າງ;ເອົາໃຈໃສ່ປະສານສົມທົບແໜ້ນກັບພາກທີ່ກ່ຽວຂ້ອງເຄື່ອນໄຫວວຽກງານດັ່ງກ່າວໃຫ້ມີປະສິທິພາບປະສິດທິຜົນຫຼາຍກວ່າເກົ່າເພື່ອປະກອບສ່ວນເຮັດໃຫ້ແຂວງໄຊສົມບູນມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະປອດໄພສ້າງເງື່ອນໄຂເອື້ອອຳນວຍຄວາມສະດວກໃຫ້ແກ່ການພັດທະນາແຂວງໄຊສົມບູນ.

ຂ່າວ: ປກສ ໄຊສົມບູນ 

แชร์