ຈະໃຊ້ 1,3 ພັນຕື້ກີບ ສ້າງໂຮງໝໍມະຫາວິທະຍາໄລແຫ່ງທຳອິດ

ສປປ ລາວ ຈະນຳໃຊ້ທຶນຈຳນວນ 120 ລ້ານໂດລາ ຫຼືປະມານ 1,3 ພັນຕື້ກີບ ທີ່ເປັນທຶນການຊ່ວຍເຫຼືອໃນຮູບແບບການກູ້ຢືມດອກເບ້ຍຜ່ອນຜັນຈາກ ສ. ເກົາຫຼີ ເພື່ອດຳເນີນໂຄງການກໍ່ສ້າງໂຮງໝໍມະຫາວິທະຍາໄລແຫ່ງທໍາອິດຂອງ ສປປ ລາວ ຊຶ່ງແມ່ນເປັນໂຄງການທີ່ໃຫຍ່ທີ່ສຸດ ແລະສໍາຄັນຫຼາຍພ້ອມມີຄວາມທັນສະໄໝ ແລະເປັນອາຄານບໍລິການປິ່ນປົວມີຂະໜາດເຖິງ 400 ຕຽງ ທັງນີ້ກໍເພື່ອນໍາໃຊ້ເປັນບ່ອນສິດສອນ, ຮໍ່າຮຽນ, ຜະລິດບຸກຄະລາກອນການແພດທີ່ມີຄຸນນະພາບອອກຮັບໃຊ້ສັງຄົມ ແລະເປັນສະຖານທີ່ບໍລິການປິ່ນປົວຂັ້ນສູງ.

ວັນທີ 7 ມັງກອນຜ່ານມານີ້ທີ່ໂຮງແຮມຄຣາວພາຊາ ນະຄອນຫຼວງວຽງຈັນ ໄດ້ມີພິທີເຊັນສັນຍາທີ່ປຶກສາໂຄງການກໍ່ສ້າງໂຮງໝໍມະຫາວິທະຍາໄລວິທະຍາສາດສຸຂະພາບ (ມວສ) ຕາງໜ້າລົງນາມລະຫວ່າງ ທ່ານ ບຸນຖົມ ຊາມຸນຕຣີ ຮັກສາການອະທິການບໍດີ ມວສ ແລະທ່ານ ລີ ດົງຢັນ ປະທານກຸ່ມບໍລິສັດທີ່ປຶກສາຈາກໂຮງໝໍມະຫາວິທະຍາໄລແຫ່ງຊາດໂຊນ ສ. ເກົາຫຼີ ໂດຍເຂົ້າຮ່ວມຂອງ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ; ທ່ານ ລີ ດົງກັນ ຜູ້ຕາງໜ້າກອງທຶນຮ່ວມມືເພື່ອການພັດທະນາເສດຖະກິດ ສ. ເກົາຫຼີ ປະຈໍາ ສປປ ລາວ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານລັດຖະມົນຕີກ່າວວ່າ: ໂຄງການກໍ່ສ້າງໂຮງໝໍມະຫາວິທະຍາໄລແຫ່ງທໍາອິດຂອງ ສປປ ລາວ ແມ່ນເປັນໂຄງການທີ່ໃຫຍ່ທີ່ສຸດ ແລະສໍາຄັນຫຼາຍໂດຍໄດ້ຮັບທຶນການຊ່ວຍເຫຼືອໃນຮູບແບບການກູ້ຢືມດອກເບ້ຍຜ່ອນຜັນຈາກ ສ.ເກົາຫຼີ ດ້ວຍມູນຄ່າໂຄງການຈໍານວນ 120 ລ້ານໂດລາ ໂຄງການດັ່ງກ່າວປະກອບດ້ວຍອາຄານຮຽນດ້ານການແພດ, ອາຄານບໍລິການການປິ່ນປົວມີຂະໜາດ 400 ຕຽງ, ອຸປະກອນການແພດ, ອຸປະກອນການສຶກສາດ້ານການແພດໂດຍສະເພາະແມ່ນ Simulation center and Health Information System (HIS) ຊຶ່ງຖືວ່າເປັນການພັດທະນາພື້ນຖານໂຄງລ່າງດ້ານການແພດຍຸກໃໝ່ທີ່ທັນສະໄໝ, ຮັບປະກັນທັງຄຸນນະພາບ, ຄວາມສະດວກວ່ອງໄວປອດໄພ ແລະເປັນມິດກັບສິ່ງແວດລ້ອມ.

ເປົ້າໝາຍແມ່ນນໍາໃຊ້ເປັນບ່ອນສິດສອນ, ຮໍ່າຮຽນເພື່ອຜະລິດບຸກຄະລາກອນການແພດທີ່ມີຄຸນນະພາບອອກຮັບໃຊ້ສັງຄົມໂດຍສະໜອງໃຫ້ບັນດາສະຖານທີ່ບໍລິການສາທາລະນະສຸກທັງໂຮງໝໍສູນກາງ, ໂຮງໝໍທ້ອງຖິ່ນ ແລະຊຸມຊົນເຂດຫ່າງໄກສອກຫຼີກ,ນອກນີ້ຍັງເປັນສະຖານທີ່ບໍລິການປິ່ນປົວຂັ້ນສູງເພື່ອຮັບຮອງ ແລະ ຊ່ວຍເຫຼືອດ້ານວິທະຍາສາດເຕັກນິກການປິ່ນປົວໃຫ້ຕາໜ່າງສາທາ ລະນະສຸກຂັ້ນຕ່າງໆ ລວມທັງການຄົ້ນຄວ້າວິທະຍາສາດດ້ານວິຊາການແພດ ແລະສາທາລະນະສຸກສາດເພື່ອນໍາເອົາຂໍ້ມູນ, ຫຼັກຖານວິທະຍາສາດມາປັບໃຊ້ໃນການປິ່ນປົວ, ສິດສອນ, ຄຸ້ມຄອງບໍລິຫານ ແລະອື່ນໆ.

แชร์