ເຜີຍປະຕິບັດການມ້າງຄະດີຢາເສບຕິດລາຍໃຫຍ່

ປກສ ເມືອງໄຊທານີ ໄດ້ເປີດເຜີຍເມື່ອວັນທີ 5 ມັງກອນ 2022 ກ່ຽວກັບຄະດີທີ່ພົ້ນເດັ່ນທີ່ເກີດຂຶ້ນຢູ່ບ້ານດອນໜູນ ໃນວັນທີ 23 ທັນວາ 2021 ຜ່ານມາ ຊຶ່ງເຈົ້າໜ້າທີ່ສາມາດຈັບຜູ້ຖືກຫາໄດ້ 3 ຄົນ ພ້ອມຢຶດຂອງກາງຢາບ້າຫຼາຍກວ່າ 31 ພັນເມັດ ແລະ ຊັບສິນທີ່ກ່ຽວຂ້ອງຫຼາຍລາຍ.

ພັທ ຄໍາມະນີ ແກ້ວສີຫາ ຫົວໜ້າພະແນກຕຳຫຼວດ ປກສ ເມືອງໄຊທານີ ເປີດເຜີຍວ່າ “ໃນເວລາປະມານ 22:30 ໂມງຂອງວັນທີ 22 ທັນວາ 2021, ເຈົ້າໜ້າທີ່ ປກສ ກຸ່ມບ້ານໄຊ ແລະ ອໍານາດການປົກຄອງບ້ານດອນໜູນ, ເມືອງໄຊທານີ, ໄດ້ອອກກວດກາລາດຕາເວນຕາມຄວາມຮັບຜິດຊອບ ຢູ່ຕາມເສັ້ນທາງຮ່ອມ ຂະນະດຽວກັນ ກໍພົບເຫັນເປົ້າໝາຍມີພິລຸດໜ້າສົງໄສ ຈິ່ງໄດ້ນໍາຕົວໄປສອບສວນ ແລະ ຮູ້ວ່າ ຜູ້ກ່ຽວຊື່ ທ້າວ ອາມີ ຫຼື ອັອດ ອາຍຸ 39 ປີ ຢູ່ບ້ານດອນໜູນ ນອກນັ້ນ ຍັງພົບເຫັນຂອງກາງປະເພດຢາບ້າ ຈໍານວນ 210 ເມັດ. ຜ່ານການສອບສວນຂະຫຍາຍຜົນ ຈິ່ງນຳໄປສູ່ການຈັບຕົວເປົ້າໝາຍຊື້-ຂາຍຢາເສບໄດ້ອີກ 2 ຄົນຄື ນາງ ໄຊພອນ ອາຍຸ 57 ປີ ມີຂອງກາງຢາບ້າ 1.000 ເມັດ ແລະ ທ້າວ ສາຍສະຫອນ ຫຼື ຄໍາຫຼ້າ ອາຍຸ 29 ປີ ຂໍ້ຫາເສບຢາເສບຕິດ ຊຶ່ງທັງສອງແມ່ນເປັນແມ່-ລູກກັນ”.

ຈາກນັ້ນ ເຈົ້າໜ້າທີ່ໄດ້ນໍາຕົວ ນາງ ໄຊພອນ ໄປສອບສວນ ຈິ່ງສາມາດຈັບຕົວ ທ້າວ ສຸບັນ ອາຍຸ 58 ປີ ບ້ານດອນໜູນ ໃນຂໍ້ຫາຄ້າຂາຍຢາເສບຕິດ ໃນນັ້ນ ພົບເຫັນຂອງກາງປະເພດຢາບ້າ 30.000 ເມັດ ເງິນກີບ 150 ລ້ານກີບ ເງິນບາດ 3.784.000 ບາດ  ເງິນໂດລາ 24.000 ໂດລາ  ລົດໃຫ່ຍ 3 ຄັນ ວັດຖຸຄ້າຍຄືເງິນ ແລະ ຄໍາ ແລະ ໃບຕາດິນຈໍານວນໜຶ່ງ, ສໍາລັບ ທ້າວ ສຸບັນ ແມ່ນເປັນເປົ້າໝາຍຄ້າຂາຍຢາເສບຕິດທີ່ເຈົ້າໜ້າທີ່ໄດ້ຕິດຕາມການເຄື່ອນໄຫວມາ 2 ປີ ແລ້ວ ຈົນມີຂໍ້ມູນຫຼັກຖານໜາແໜ້ນ ຈິ່ງນໍາໄປສູ່ການຈັບກຸມໃນຄັ້ງນີ້.

แชร์