ສຳເລັດກອງປະຊຸມ ຄັ້ງທີ 44 ຄະນະກໍາມະການຮ່ວມມືທະວິພາຄີ ລະຫວ່າງ ລາວ-ຫວຽດນາມ

ໃນຕອນເຊົ້າຂອງວັນທີ 10 ມັງກອນ 2022 ທີ່ຫ້ອງປະຊຸມຫ້ອງການລັດຖະບານ ສສ ຫວຽດນາມ ສະຫາຍ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ເປັນປະທານຮ່ວມຊີ້ນຳກອງປະຊຸມ ຄັ້ງທີ 44 ຂອງຄະນະກໍາມະການຮ່ວມມືທະວິພາຄີ ລະຫວ່າງລັດຖະບານ ແຫ່ງ ສປປ ລາວ ແລະລັດຖະບານ ແຫ່ງ ສ.ສ ຫວຽດນາມ ປະຈໍາປີ 2022 ຊຶ່ງສອງຝ່າຍໄດ້ຮ່ວມກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມ ຄັ້ງທີ 43 ກໍຄືຂໍ້ຕົກລົງວ່າດ້ວຍການຮ່ວມມື ປະຈໍາປີ 2021 ແລະ ພ້ອມກັນປຶກສາຫາລືທິດທາງແຜນການຮ່ວມມື ໃນປີ 2022.

ໂດຍລັດຖະບານແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ໄດ້ຕີລາຄາສູງຕໍ່ຜົນສຳເລັດຂອງການຈັດຕັ້ງປະຕິບັດຂໍ້ຕົກລົງວ່າດ້ວຍການຮ່ວມມື ໃນປີ 2021 ຊຶ່ງບັນລຸຜົນສຳເລັດຫຼາຍດ້ານ ເປັນຕົ້ນແມ່ນ ການຮ່ວມມືດ້ານການເມືອງ-ການຕ່າງປະເທດ ດ້ານປ້ອງກັນຊາດ-ປ້ອງກັນຄວາມສະຫງົບ ແມ່ນສືບຕໍ່ໄດ້ຮັບການຈັດຕັ້ງປະຕິບັດເປັນຢ່າງດີ ມີການເຄື່ອນໄຫວແລກປ່ຽນຄະນະຜູ້ແທນຂັ້ນສູງຂອງສອງພັກ ສອງລັດ ຢ່າງເປັນປົກກະຕິ ການຮ່ວມມືໃນຂົງເຂດການສຶກສາ-ບຳລຸງສ້າງ ກໍໄດ້ຮັບເປີດກວ້າງດ້ວຍຫຼາຍຮູບການ ປັດຈຸບັນ ຈໍານວນນັກສຶກສາລາວທີ່ກໍາລັງຄົ້ນຄວ້າຮໍ່າຮຽນຢູ່ ສສ ຫວຽດນາມ ມີຫຼາຍກວ່າ 14.000 ຄົນ ສຳລັບທິດທາງແຜນການຮ່ວມມືໃນປີ 2022 ສອງຝ່າຍໄດ້ຕົກລົງເຫັນດີເປັນເອກະພາບ ສືບຕໍ່ຈັດຕັ້ງຜັນຂະຫຍາຍບັນດາເນື້ອໃນຖະແຫຼງການຮ່ວມ ແລະ ຂໍ້ຕົກລົງລະຫວ່າງການນໍາຂັ້ນສູງຂອງສອງປະເທດໃຫ້ເປັນຮູບປະທຳ ສືບຕໍ່ຮ່ວມມືຢ່າງແໜ້ນແຟ້ນໃນການຮັກສາສະຖຽນລະພາບທາງດ້ານການເມືອງ ການປ້ອງກັນຊາດ-ປ້ອງກັນຄວາມສະ ຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມຂອງແຕ່ລະປະເທດ ສ້າງເສັ້ນຊາຍແດນ ລາວ-ຫວຽດນາມ ໃຫ້ເປັນຊາຍແດນແຫ່ງສັນຕິພາບ ສະຖຽນລະພາບ ການຮ່ວມມື ແລະພັດທະນາຮອບດ້ານ ສະໜັບສະໜູນ ແລະ ສ້າງຄວາມເຊື້ອໝັ້ນເຊິ່ງກັນ ແລະກັນ ໃນເວທີພາກພື້ນ ແລະ ສາກົນ.

ທັງນີ້ ສປປ ລາວ ແລະ ສສ ຫວຽດນາມ ໄດ້ສູ້ຊົນຊຸກຍູ້ມູນຄ່າການຄ້າສອງຝ່າຍໃຫ້ເພີ່ມຂື້ນ 10-15% ທຽບໃສ່ປີຜ່ານມາ ສືບຕໍ່ຜັນຂະຫຍາຍບົດບັນທຶກຄວາມເຂົ້າໃຈກ່ຽວກັບການຮ່ວມມືດ້ານຄົມມະນາຄົມ ແລະຂົນສົ່ງການຮ່ວມມືພັດທະນາບັນດາໂຄງການໄຟຟ້າຢູ່ລາວເຊື່ອມຕໍ່ລະບົບໄຟຟ້າ ແລະ ການຊື້-ຂາຍໄຟຟ້າ ພ້ອມນີ້ ກໍຈະເພີ່ມທະວີການຮ່ວມມື ແລະ ສ້າງເງື່ອນໄຂເພື່ອເອື້ອອໍານວຍຄວາມສະດວກໃຫ້ແກ່ການຮ່ວມມືດ້ານການຄ້າ ການລົງທຶນ ການສຶກສາ ກໍຄືການພັດທະນາຊັບພະຍາກອນມະນຸດຂອງສອງປະເທດ ແລະ ການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງບົ່ມຊ້ອນ.

ພາຍຫຼັງສຳເລັດກອງປະຊຸມສອງນາຍົກລັດຖະມົນຕີໄດ້ຮ່ວມເປັນສັກຂີພິຍານໃນການລົງນາມ ແລະ ມອບ-ຮັບເອກະສານຮ່ວມມືຂອງບັນດາກະຊວງ ແລະ ພາກທຸລະກິດສອງປະເທດ ຈຳນວນ 9 ສະບັບ ໃນນີ້ພາກລັດວິສາຫະກິດ 1 ສະບັບຄື ມອບ-ຮັບໃບຢັ້ງຢືນຂໍ້ຜູກພັນກ່ຽວກັບການເພີ່ມອັດຕາສ່ວນກຳມະສິດຂອງລັດຖະບານລາວ ຈາກ 20% ຂຶ້ນເປັນ 60% ຂອງທ່າເຮືອ ຫວຸງອາງ 1,2,3 ທຶນຈົດທະບຽນໃນບໍລິສັດຫຸ້ນສ່ວນທ່າເຮືອສາກົນລາວ- ຫວຽດນາມ.

ໃນໂອກາດນີ້ ສະຫາຍ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ປະທານຄະນະກຳມະການຮ່ວມມື ລາວ- ຫວຽດນາມ ແລະ ສະຫາຍ ຫງວຽນ ຈິ ຢູ້ງ ລັດຖະມົນຕີກະຊວງແຜນການ ແລະ ການລົງທຶນ ປະທານຄະນະກຳມະການຮ່ວມມືຫວຽດນາມ-ລາວ ໄດ້ຮ່ວມກັນຖະແຫຼງຂ່າວຜົນສຳເລັດຂອງກອງປະຊຸມຄັ້ງທີ 44 ຂອງຄະນະກຳມະການຮ່ວມມືທະວີພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຊຶ່ງສອງຝ່າຍໄດ້ຕີລາຄາສູງຕໍ່ຜົນຂອງກອງປະຊຸມຄັ້ງນີ້ ຊຶ່ງຈະປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ທີ່ຢູ່ໃນລະດັບສູງຢູ່ແລ້ວ ໃຫ້ນັບມື້ນັບກ້າວສູ່ລວງເລິກຫຼາຍຂຶ້ນຊຶ່ງເປັນຂີດໝາຍອັນໃໝ່ ໃນປີ 2022 ພິເສດສອງຝ່າຍຈະໄດ້ຮ່ວມກັນຈັດຕັ້ງການສະເຫຼີມສະຫຼອງປີສາມັກຄີມິດຕະພາບ ໃນປີ 2022 ກໍຄືວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ໃຫ້ມີບັນຍາກາດຟົດຟື້ນ ແລະເຕັມໄປດ້ວຍຄວາມໝາຍສຳຄັນ ເພື່ອໃຫ້ຄົນຮຸ້ນຫຼັງໄດ້ຮັບຮູ້ ແລະເຂົ້າໃຈຕໍ່ສາຍພົວພັນພິເສດສອງປະເທດ.

ພາຍຫຼັງສຳເລັດກອງປະຊຸມຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຄັ້ງທີ 44 ປະຈຳປີ 2022 ຊຶ່ງໃນຕອນບ່າຍ ຂອງວັນດຽວກັນ ໄດ້ມີກອງປະຊຸມພົບປະທຸລະກິດລາວ ແລະ ຫວຽດນາມ ໂດຍ ມີ 2 ນາຍົກລັດຖະມົນຕີ ເຂົ້າຮ່ວມເປັນປະທານກອງປະຊຸມ ເພື່ອຊຸກຍູ້ທຸລະກິດສອງຝ່າຍໄດ້ຍົກລະດັບການຮ່ວມມືລົງທຶນຊອກຫາທາງອອກສ້າງເງື່ອນໄຂຂໍ້ສະດວກ ແລະ ແກ້ໄຂຂໍ້ຫຍຸ້ງຍາກຂອງບັນດາທຸລະກິດຫວຽດນາມ ລົງທຶນຢູ່ລາວ ແລະ ທຸລະກິດລາວ ລົງທຶນຢູ່ຫວຽດນາມ.

ຂອບໃຈຂໍ້ມູນ ແລະ ພາບ: ກົມຂ່າວ ກະຊວງການຕ່າງປະເທດ

แชร์