ມາອີກແລ້ວ “ເດລຕາຄຣອນ” ນ້ອງໃໝ່ໂຄວິດ

ຖືເປັນລາຍງານທີ່ສ້າງຄວາມກັງວົນໃຫ້ແກ່ວົງການສາທາລະນະສຸກ ເພາະທຸກປະເທດທົ່ວໂລກກຳລັງປະສົບບັນຫາສະຖານທີ່ຮອງຮັບປິ່ນປົວຜູ້ປ່ວຍພະຍາດໂຄວິດ-19 ທີ່ກຳລັງມີການກາຍພັນຢ່າງເນື່ອງນິດລຽນຕິດ ຊະນິດທີ່ວ່າມະນຸດຕັ້ງຕົວນຳບໍ່ທັນ. ລາຍງານໃໝ່ໃນວັນທີ9ມັງກອນ 2022 ໃຫ້ຮູ້ວ່າ ທີມນັກວິໄຈ ໃນສາທາລະນະລັດໄຊປຣັສ ຊຶ່ງເປັນປະເທດເກາະດອນໃນທະເລ ເມດິເຕີຣ໌ເຣນຽນ ທາງຕອນໃຕ້ປະເທດ ຕຸຣະກີ ໄດ້ມີການຄົ້ນພົບເຊື້ອໂຄວິດ-19 ກາຍພັນສາຍພັນໃໝ່ ທີ່ເປັນການປະສົມປະສານ ລະຫວ່າງເຊື່ອໂຄວິດ-19ສາຍພັນເດລຕາ ກັບ ສາຍພັນໂອມິຄຣອນ ຈຶ່ງມີການຕັ້ງຊືວ່າ Deltacron.

ອີງຕາມການລາຍງານຂອງ ບລູມເບີຣ໌ກ ລະບຸວ່າ ສາດສະດາຈານ ລິອອນດິອອສ ຄອສຕີຣຄິສ ສາດສະດາຈານດ້ານຊີວະວິທະຍາ ທີ່ມະຫາວິທະຍາໄລໄຊປຣັສ ຊຶ່ງເປັນຜູ້ຕັ້ງຊື່ເຊື້ອໂຄວິດກາຍພັນໃໝ່ນີ້ວ່າ ເດລຕາຄຣອນ ເນື່ອງຈາກເປັນເຊື້ອໂຄວິດ-19 ສາຍພັນໃໝ່ທີ່ມີພັນທຸກຳສຳຄັນຂອງເຊື້ອໂຄວິດໂອມິຄຣອນຢູ່ໃນຈີໂນມ(Genome)ຂອງເຊື້ອໂຄວິດ-19ສາຍພັນເດລຕາ ຈາກການຖະແຫຼງເລື່ອງນີ້ໂດຍສາດສະດາຈານ ຄອສຕີຣຄິສ ໄດ້ໃຫ້ຮູ້ວ່າ ຈົນເຖິງຂະນະນີ້ ມີການກວດພົບຜູ້ຕິດເຊື້ອໂຄວິດ-19ກາຍພັນສາຍພັນໃໝ່ເດລຕາຄຣອນ ໃນປະເທດໄຊປຣັສ ແລ້ວ25ຄົນ  ແຕ່ປັດຈະບັນ ກໍຍັງຄົງໄວເກີນໄປ ທີ່ຈະຊີ້ວ່າເຊື້ອໂຄວິດກາຍພັນ ເດລຕາຄຣອນ ຈະມີຄວາມຮ້າຍກາດກວ່າເຊື້ອໂຄວິດກາຍພັນສາຍພັນ ເດລຕາ ແລະ ໂອມິຄຣອນ ຫຼືບໍ່? ນອກນັ້ນ ທີມນັກວິໄຈຂອງໄຊປຣັສ ຍັງໄດ້ສົ່ງລາຍງານການພົບເຊື້ອໂຄວິດ-19ກາຍພັນສາຍພັນໃໝ່ ເດລຕາຄຣອນ ຊຶ່ງພົບໃນທ້າຍອາທິດຜ່ານມານີ້ ໄປຍັງ GISAID ຊຶ່ງເປັນຖານຂໍ້ມູນລະຫວ່າງປະເທດ ທີ່ຕິດຕາມເຊື້ອໂຄວິດ-19.

ຢ່າງໃດກໍຕາມ ໃນການຄົ້ນພົບເຊື້ອໂຄວິດ-19ສາຍພັນ ເດລຕາຄຣອນ ແມ່ນປາກົດຂຶ້ນໃນຂະນະທີ່ເຊື້ອໂຄວິດ-19ສາຍພັນໂອມິຄຣອນ ຊຶ່ງເປັນໄວຣັສທີ່ແຜ່ກະຈາຍໄວ ທັງມີອັດຕາການຕິດເຊື້ອສູງທີ່ກຳລັງລະບາດໄປທົ່ວໂລກ ແລະ ມັນກໍພວມກາຍເປັນເຊື້ອໂຄວິດ-19ສາຍພັນຫຼັກ ທີ່ມາແທນທີ່ສາຍພັນເດລຕາ ໂດຍໃນລາຍງານດຽວກັນໄດ້ຊີ້ໃຫ້ເຫັນວ່າ ສະຫະລັດອະເມຣິກາ ກວດພົບຜູ້ຕິດເຊື້ອໂຄວິດ-19ລາຍໃໝ່ໃນຊ່ວງ7ວັນທີ່ຜ່ານມາໂດຍສະເລ່ຍສູງເຖິງວັນລະຫຼາຍກວ່າ6ແສນຄົນ ຊຶ່ງນັບວ່າເພີ່ມຂຶ້ນກວ່າສັບປະດາກ່ອນໜ້ານີ້72%.

ຈາກລາຍງານດັ່ງກ່າວ ກໍເປັນອັນວ່າຊາວໂລກຕ້ອງຜະເຊີນກັບເຊື້ອໄວຣັສໄຂ້ຫວັດລົງປອດສາຍພັນໃໝ່ ທີ່ກຳລັງຈະບູກເຂົ້າມາຄຸກຄາມຄວາມອາດສາມາດຂອງພູມຄຸ້ມກັນມະນຸດໃນຍຸກທັນສະໄໝ ໃນຂະນະທີ່ຫຼາຍຊີວິດກໍລົ້ມຫາຍຕາຍໄປ ແຕ່ກໍສັງເກດເຫັນວ່າ ຫຼາຍຊີວິດຍັງຄົງຖືເບົາ ຫຼື ເຄື່ອນໄຫວຢ່າງປະໝາດຂາດສະຕິ ດ້ວຍພຶດຕິກຳອັນກໍ່ໃຫ້ເກີດຄວາມສ່ຽງ ເຊັ່ນ ການບໍ່ເວັ້ນໄລຍະຫ່າງທາງສັງຄົມ ການຮວມຕົວສັງສັນຊຸມແຊວເຮຮາຟ້າລັ່ນ ການບໍ່ສວມໃສ່ຜ້າປິດປາກ ປິດດັງ ແລະ ການບໍ່ຮັກອະນາໄມຄວາມສະອາດ ຊຶ່ງກໍເວົ້າໄດ້ເລີຍວ່າ ຍັງຄົງເປັນການຍາກສຳລັບການຍົກລະດັບຄວາມປອດໄພໃນຊີວິດຂອງຕົນເອງ ທັງເປັນການເພີ່ມຄວາມສ່ຽງໄປສູ່ຄົນອ້ອມຂ້າງ ແລະ ສັງຄົມວົງກວ້າງ ຊຶ່ງຖ້າເປັນແບບນີ້ເລື້ອຍໄປ ມະນຸດກໍຄົງບໍ່ສາມາດປັບຕົວໃຫ້ຢູ່ລອດໃນສະຖາການໂຣກລະບາດເພາະຄວາມປະໝາດເປັນເຫດນັ້ນເອງ.

แชร์