45 ນັກເຕະບານລາວ ຖືກລົງໂທດຖານລົ້ມບານ

ນັກກີລາເຕະບານຊາຍທີມຊາດລາວ 45 ຄົນ ຖືກສະຫະພັນບານເຕະສາກົນ (FIFA) ລົງໂທດຫ້າມຫຍຸ້ງກ່ຽວກັບກີລາເຕະບານຕະຫຼອດຊີວິດເນື່ອງຈາກ FIFA ກວດສອບພົບວ່າມີສ່ວນພົວພັນກັບການສໍ້ໂກງຜົນການແຂ່ງຂັນ (ລົ້ມບານ) ຊຶ່ງນັກກີລາເຫຼົ່ານີ້ແມ່ນສະສົມມາເປັນເວລາຫຼາຍປີ ເຮັດໃຫ້ມີຜົນກະທົບໂດຍກົງຕໍ່ການຄັດເລືອກເອົານັກກີລາບານເຕະທີມຊາດເພື່ອເຂົ້າຮ່ວມແຂ່ງຂັນລາຍການລະດັບສາກົນຕ່າງໆ.

ເມື່ອຕອນແລງຂອງວັນທີ 7 ມັງກອນ 2022 ທີ່ຫ້ອງປະຊຸມສູນຝຶກສະຫະພັນບານເຕະແຫ່ງຊາດລາວສະໜາມກີລາແຫ່ງຊາດຫຼັກ 16 ເມືອງໄຊທານີ ນະຄອນຫຼວງວຽງຈັນ ໄດ້ມີພິທີຖະແຫຼງຂ່າວກ່ຽວກັບການສົ່ງທີມຊາດລາວເຂົ້າຮ່ວມແຂ່ງຂັນເຕະບານຊີງແຊມປ໌ອາຊຽນປະຈຳປີ 2020 AFF SUZUKI CUP 2020 ທີ່ຜ່ານມາເຂົ້າຮ່ວມມີ ທ່ານ ຄໍາແພງ ວົງຂັນຕີ ຮອງປະທານສະຫະພັນບານເຕະແຫ່ງຊາດລາວ ພັອ ຖາວອນ ຫຼວງຈັນດາວົງ ພັອ ທອງເພັດ ມະນີສະຫວັນ ແລະທ່ານ ໄຊຊະນະ ທອງຄຳຈັນ ຄະນະບໍລິຫານງານສະຫະພັນບານເຕະແຫ່ງຊາດລາວ ແລະ ທ່ານ ນາງ ກັນຍາ ແກ້ວມະນີ ເລຂາທິການສະຫະພັນບານເຕະແຫ່ງຊາດລາວຊຶ່ງໃນວາລະດຽວກັນກໍມີການເປີດເຜີຍກ່ຽວກັບປາກົດການຫຍໍ້ທໍ້ໃນວົງການເຕະບານເພດຊາຍຂອງທີມຊາດລາວຕໍ່ບັນຫາດັ່ງກ່າວຮອງປະທານສະຫະພັນບານເຕະແຫ່ງຊາດລາວກໍໄດ້ຊີ້ແຈງວ່າ “ໄລຍະຜ່ານມາສະຫະພັນບານເຕະແຫ່ງຊາດລາວໄດ້ເອົາໃຈໃສ່ຢ່າງຕໍ່ເນື່ອງໃນການສຶກສາອົບຮົມການເມືອງແນວຄິດແກ່ນັກກີລາເຕະບານທຸກຄົນ ໃຫ້ມີນໍ້າໃຈຮັກຊາດ ແລະ ເສຍສະຫຼະເພື່ອປະເທດຊາດພ້ອມນັ້ນກ່ອນການເຂົ້າຮ່ວມແຂ່ງຂັນລາຍການລະດັບສາກົນຕ່າງໆ ແມ່ນມີການນໍາຂັ້ນສູງທີ່ຕາງໜ້າໃຫ້ລັດຖະບານໄດ້ພົບປະໂອ້ລົມນັກກີລາເພື່ອສ້າງຂວັນກໍາລັງໃຈພ້ອມທັງຮຽກຮ້ອງໃຫ້ນັກກີລາທຸກຄົນເອົາໃຈໃສ່ປະຕິບັດຕາມລະບຽບການແຂ່ງຂັນຢ່າງເຂັ້ມງວດມີນໍ້າໃຈຮັກຊາດ ເສຍສະຫຼະ ແລະເອົາໃຈໃສ່ເຂົ້າຮ່ວມແຂ່ງຂັນຢ່າງສຸດຄວາມສາມາດເພື່ອກຽດສັກສີ ແລະເປັນການສ້າງຊື່ສຽງໃຫ້ແກ່ປະເທດຊາດຢ່າງໃດກໍຕາມນັກກີລາຈໍານວນດັ່ງກ່າວກໍບໍ່ເຊື່ອຟັງ ແລະເຫັນແກ່ຜົນປະໂຫຍດສ່ວນຕົວຈິ່ງເຂົ້າໄປມີສ່ວນພົວພັນກັບຂະບວນການລົ້ມບານຈົນຖືກອົງກອນທີ່ກ່ຽວຂ້ອງຂອງ FIFA ແລະສະຫະພັນບານເຕະເອເຊຍ ຫລື AFC ລວມເຖິງສະຫະພັນບານເຕະແຫ່ງຊາດລາວກວດສອບພົບວ່ານັກກີລາທັງ 45 ຄົນ ມີສ່ວນພົວພັນກັບການສໍ້ໂກງຜົນການແຂ່ງຂັນຈິ່ງຖືກລົງໂທດຫ້າມຫຍຸ້ງກ່ຽວກັບກີລາເຕະບານຕະຫຼອດຊີວິດ”.

ຮອງປະທານສະຫະພັນບານເຕະແຫ່ງຊາດລາວ ໄດ້ກ່າວຢໍ້າວ່າ “ການກະທໍາຂອງນັກກີລາເຕະບານທັງ 45 ຄົນ ຖືເປັນການຕັດອະນາຄົດຂອງຕົນເອງ ຊຶ່ງສະຫະພັນບານເຕະແຫ່ງຊາດລາວ ກໍບໍ່ຕ້ອງການນັກກີລາແບບນີ້ ເຖິງຈະເກ່ງພຽງໃດກໍຕາມ ເພາະການກະທໍາດັ່ງກ່າວ ນອກຈາກຈະສ້າງຄວາມເສື່ອມເສຍໃຫ້ແກ່ຕົວນັກກີລາເອງ ຍັງສ້າງຄວາມເສື່ອມເສຍໃຫ້ແກ່ສະຫະພັນບານເຕະແຫ່ງຊາດ ແລະ ສ້າງຄວາມເສື່ອມເສຍໃຫ້ແກ່ປະເທດຊາດອີກດ້ວຍ”.

ຢ່າງໃດກໍຕາມທາງສະຫະພັນບານເຕະແຫ່ງຊາດລາວຍັງບໍ່ໄດ້ເປີດເຜີຍລາຍຊື່ຂອງ 45 ນັກເຕະບານທີ່ຖືກ FIFA ລົງໂທດໃນຄັ້ງນີ້.

 

แชร์