ນໍ້າດື່ມ ແລະນໍ້າກ້ອນໂລມາຄຳ ຮັບລາງວັນທຸລະກິດດີເດັ່ນ

ທ່ານ ເກຍ ອູ໊ສິດທິເດດ ເຈົ້າຂອງໂຮງງານຜະລິດນໍ້າດື່ມ ແລະນໍ້າກ້ອນໂລມາຄຳໄດ້ຮັບລາງວັນນັກທຸລະກິດຊັ້ນນຳດີເດັ່ນ ສຄອຊ ໃນໄລຍະໂຄວິດ-19 ຊຶ່ງເປັນລາງວັນທີ 7 ເລີ່ມແຕ່ປີ 2019 ເປັນຕົ້ນມາ.

ທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມກາໂລມາຄຳຊຶ່ງມີສຳນັກງານຕັ້ງຢູ່ນະຄອນໄກສອນ ພົມວິຫານ ແຂວງສະຫວັນນະເຂດ ກ່າວວ່າ: ການໄດ້ຮັບລາງວັນຄັ້ງນີ້ນັບເປັນຄວາມພາກພູມໃຈຂອງໂຮງງານຂອງພວກເຮົາທີ່ສະແດງເຫັນເຖິງຄວາມມານະອົດທົນໃນການດຳເນີນຜ່ານຜ່າຄວາມຫຍຸ້ງຍາກຈາກສະພາບການແຜ່ລະບາດຂອງພະຍາດໂຄວິດ-19 .

ເປັນທີ່ປະຈັກພໍສົມຄວນສຳລັບໂຮງງານນໍ້າດື່ມ ແລະນໍ້າກ້ອນໂລມາຄຳກ່ອນໜ້ານັ້ນແມ່ນໄດ້ປະກອບທຶນຮອນຫຼາຍຕື້ກີບສ້າງອາຊີບຄົງທີ່ໃຫ້ນັບຮ້ອຍກວ່າຄອບຄົວຢູ່ບ້ານຄຳປ່າແຫນ ແລະບ້ານປ່າກ້ວຍ ເມືອງຈຳພອນ ໄດ້ຢຸດເຊົາການເປັນຂໍທານ.

ຈາກສີ່ງດັ່ງກ່າວໄດ້ສົ່ງຜົນໃຫ້ເຈົ້າຂອງໂຮງງານໃນຜ່ານມາໄດ້ຮັບລາງວັນຕ່າງໆທັງພາຍໃນ ແລະຕ່າງປະເທດຄືໄດ້ຮັບລາວັນດ້ານການປະກອບສ່ວນຊ່ວຍເຫຼືອສັງຄົມດີເດັ່ນ CSR ອາຊຽນທີ່ນະຄອນຫຼວງວຽງຈັນ; ລາງວັນທຸລະກິດຊັ້ນນຳດີເດັ່ນ2019 ຂອງ ຄອສຊ ທີ່ນະຄອນຫຼວງວຽງຈັນ;ລາງວັນດ້ານການປະກອບສ່ວນຊ່ວຍເຫຼືອສັງຄົມດີເດັ່ນ CSR ອາຊຽນທີ່ຣາຊະອານາຈັກໄທ; ລາງວັນດີເດັ່ນພ້ອມດ້ວຍໃບຢັ້ງຢືນຕົວແບບໃນການພັດທະນາ ແລະລຶບລ້າງຄວາມທຸກຍາກຂອງອາຊຽນ ຄັ້ງທີ 4 ທີ່ເນປີດໍ ປະເທດມຽນມາ;  ປີ 2020 ໄດ້ຮັບລາງວັນທຸລະກິດມີສ່ວນຮ່ວມຊ່ວຍເຫຼືອສັງຄົມ (Inclusive Business) ຂອງອາຊຽນ 2020  ທີ່ນະຄອນຫຼວງຮ່າໂນ້ຍ ສສຫວຽດນາມ; ລາງວັນທຸລະກິດດີເດັ່ນອາຊຽນ ສປປ ລາວ ປະເພດລາງວັນບູລິມະສິດດີເດັ່ນ ແລະລາງວັນນັກທຸລະກິດຊັ້ນນຳດີເດັ່ນ ສຄອຊ ໃນໄລຍະໂຄວິດ-19.

ທັງໝົດນີ້ທ່ານ ເກຍ ອູ໊ສິດທິເດດ ກ່າວວ່າ: ເປັນຄວາມພາກພູມໃຈຂອງອ້າຍເອື້ອຍນ້ອງພະນັກງານ, ກຳມະກອນທັງໝົດພາຍໃນໂຮງງານ ແລະສັງຄົມ, ທີ່ໄດ້ປະກອບສ່ວນເຂົ້າໃນການຈັດຕັ້ງປະຕິບັດຕົວຈິງຈຶ່ງໄດ້ຮັບໝາກຜົນໃນທີ່ຜ່ານມາ.

แชร์