ຖວທ ຄຳມ່ວນ ຊຸກຍູ້ເກັບກຳຂໍ້ມູນຂຽນປຶ້ມປະຫວັດສາດເມືອງນາກາຍ

ວັນທີ  29  ທັນວາ 2021 ຜ່ານມາ ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຄຳມ່ວນ  ພ້ອມຄະນະສະມາຄົມນັກປະພັນແຂວງ ໄດ້ລົງເຄື່ອນໄຫວ ຊຸກຍູ້, ແນະນໍາການເກັບກຳຂໍ້ມູນໃນການຂຽນປຶ້ມປະຫວັດສາດຂອງເມືອງນາກາຍ ໂດຍມີທ່ານ ແສງແກ້ວ ພະຄຸນທອງ ຮອງເຈົ້າ ເມືອງນາກາຍ ພ້ອມດ້ວຍພາກສ່ວນກ່ຽວຂ້ອງໄດ້ຮ່ວມປຶກສາຄົ້ນຄວ້າເພື່ອວາງແຜນໃນການລົງເກັບກຳຂໍ້ມູນຕົວຈິງໃນການຂຽນ ປຶ້ມປະຫວັດສາດຂອງເມືອງນາ ກາຍ.

ໃນໄລຍະຜ່ານມາປະຫວັດ ສາດຂອງເມືອງນາກາຍແມ່ນໄດ້ມີການຄົ້ນຄວ້າ, ຈັດພິມຜ່ານວາລະສານຕ່າງໆ ແຕ່ເຫັນວ່າຍັງມີແຫຼ່ງຂໍ້ມູນທາງປະຫວັດສາດຂອງເມືອງທີ່ຍັງບໍ່ທັນລະອຽດ, ບໍ່ທັນໃກ້ຄຽງກັບຄວາມຈິງ ທີ່ບໍ່ສາມາດຢັ້ງຢືນເຖິງສາເຫດທາງ ປະຫວັດສາດຂອງເມືອງ.  ດັ່ງນັ້ນທາງການນຳຂອງແຂວງ ຈຶ່ງໄດ້ ຊີ້ນຳມອບໃຫ້ ພະແນກ  ຖວທ  ແຂວງ ຮີບຮ້ອນລົງເຄື່ອນໄຫວຊຸກຍູ້, ແນະນໍາພາກສ່ວນທີ່ກ່ຽວຂ້ອງຄົ້ນຄວ້າຄືນບັນດາຂໍ້ມູນຄືນໃໝ່ ແລະ ປັບປຸງໃນຄະນະກຳມະການຮັບຜິດຊອບເພື່ອຄົ້ນຄວ້າປັບປຸງໂຄງສ້າງຂອງປຶ້ມ, ສ່ວນຂັ້ນຕອນໃນການຂຽນເນື້ອໃນຂອງແຕ່ລະພາກນັ້ນ ທາງຄະນະຮັບຜິດຊອບຈະໄດ້ນຳສະເໜີຕໍ່ການນຳຂອງແຂວງມີທິດຊີ້ນຳຕື່ມໃນຂັ້ນຕໍ່ໄປ.

ເມືອງນາກາຍແມ່ນນອນຢູ່ ໃນ 10 ຕົວເມືອງຂອງແຂວງຄຳ ມ່ວນ, ມີພູມສັນຖານຕັ້ງຢູ່ເຂດພູພຽງຫ່າງຈາກເທສະບານແຂວງປະມານ 77 ກິໂລແມັດ, ໃນລະດັບສູງຈາກລະດັບນໍ້າທະເລປະມານ 500 ແມັດ, ມີເນື້ອທີ່ທັງໝົດ 4.300 ຕາງລາງກິໂລຕາແມັດ, ມີພົນລະເມືອງ 27.612 ຄົນ, ຍິງ 14.147 ຄົນ.

แชร์