ເທສະການອາຫານລາວ ຈະມີເງີນໝູນວຽນ 2-3 ຕື້ກີບ

ຂ່າວ: ກິ່ງລັດຕະນະ

ສະມາຄົມນັກທຸລະກິດແມ່ຍິງສູນກາງຈະຈັດເທສະການອາຫານລາວ ປະຈໍາປີ 2022 ຂຶ້ນພາຍໃຕ້ຄໍາຂວັນ: “ເທສະການອາຫານລາວຕາມວິຖີຊີວິດປົກກະຕິແບບໃໝ່” ໃນລະຫວ່າງວັນທີ 25- 29 ມັງກອນ 2022 ທີ່ສວນເຈົ້າອະນຸວົງ (ແຄມຂອງ) ນະຄອນຫຼວງ ໂດຍຈະມີ 120 ຮ້ານເຂົ້າຮ່ວມໃນນັ້ນມີຮ້ານອາຫານລາວຈາກຕົວແທນທົ່ວປະເທດ ແລະຜູ້ສະໜັບສະໜູນ 109 ຮ້ານ, ຂາຍເຄື່ອງຫັດຖະກໍາ ແລະກະສິກໍາ 11 ຮ້ານ, ຊຶ່ງຄາດວ່າຈະມີເງິນໝູນໃນງານ 2-3 ຕື້ກີບ.

ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ, ປະທານຄະນະກໍາມະການຈັດງານເທສະການອາຫານລາວ 2022 ໄດ້ໃຫ້ຮູ້ໃນພິທີຖະແຫຼງຂ່າວກຽມຈັດເທສະການອາຫານລາວ 2021 ໃນວັນທີ 5 ມັງກອນ 2022 ວ່າ: ເທສະການອາຫານລາວປີນີ້ຈັດຂຶ້ນເພື່ອສ້າງບັນຍາກາດ ແລະປູກຈິດສໍານຶກໃຫ້ຄົນໃນສັງຄົມຮັບຮູ້ ແລະສາມາດເຂົ້າຊົມ, ຈັບຈ່າຍຊື້ຂາຍອາຫານ, ຕາມແບບວິຖີຊີວິດປົກກະຕິແບບໃໝ່ຂອງສັງຄົມປະຈຸບັນ; ສືບຕໍ່ຊຸກຍູ້ສົ່ງເສີມແມ່ຍິງຜູ້ຜະລິດ,ຜູ້ປູກຝັງ, ລ້ຽງສັດ, ຮ້ານອາຫານ, ຮ້ານຂາຍຍ່ອຍຈາກທ້ອງຖິ່ນຕ່າງໆ ແລະຈາກນະຄອນຫຼວງວຽງຈັນໄດ້ມາວາງສະແດງ ແລະຄ້າຂາຍຈ່າຍຊື້ໄດ້ໂດຍປົກກະຕິ ແລະ ຮັບປະກັນຄຸນນະພາບໃນທຸກດ້ານ;ເພື່ອເອື້ອອໍານວຍຄວາມສະດວກໃຫ້ຜູ້ປະກອບການແມ່ຍິງທີ່ເຮັດການຜະລິດເປັນສິນຄ້າໃຫ້ສາມາດສ້າງເຄືອຂ່າຍການຄ້າຢ່າງກວ້າງຂວາງໃນຂອບເຂດທົ່ວປະເທດ ແລະພາກພື້ນ, ເພື່ອກ້າວສູ່ຕະຫຼາດທາງອອນລາຍໃຫ້ຫຼາຍຂຶ້ນ ແລະມີຄຸນນະພາບ; ເພື່ອເປັນການຕ້ອນຮັບນັກ ທ່ອງທ່ຽວທີ່ຈະເຂົ້າມາທ່ຽວໃນເຂດທ່ອງທ່ຽວສີຂຽວຂອງ ສປປ ລາວ ເຮົາໃນໄລຍະປີ 2022; ເພື່ອຊຸກຍູ້ໃຫ້ຍິງໜຸ່ມ (ຜູ້ກໍາລັງຊອກວຽກເຮັດງານທໍາ, ລໍຖ້າຊັບຊ້ອນ) ທີ່ຢາກສ້າງຕົວເປັນນັກທຸລະ ກິດໃນອະນາຄົດໄດ້ນໍາເອົາຜະລິດຕະພັນທີ່ປອດສານພິດ ແລະປຸງແຕ່ງແບບປະດິດສ້າງຂອງເຂົາເຈົ້າມາວາງຂາຍໃນງານ (ເປັນອາຊີບເສີມ).

ພາຍໃນງານຈະມີການຈັດຕັ້ງໂຄສະນາຜະລິດຕະພັນຂອງບໍລິສັດ ແລະ ພາກສ່ວນທີ່ສະໜັບສະໜູນຫລັກຂອງງານເທສະການອາຫານເທິງເວທີເປັນປະຈໍາທຸກວັນ, ມີການກວດວັດແທກອຸນຫະພູມ, ມີເຈວລ້າງມືໃຫ້ຜູ້ເຂົ້າຮ່ວມງານ, ແຈກຜ້າອະນາໄມປ້ອງກັນພະຍາດຟຣີ; ຜູ້ວາງສະແດງສິຄ້າ ແລະຜູ້ມາທ່ຽວງານຕ້ອງປະຕິບັດມາດຕະການປ້ອງກັນຄວບຄຸມພະຍາດໂຄວິດ-19 ຂອງຄະນະສະເພາະກິດຢ່າງເຂັ້ມງວດ; ມີການຄັດເລືອກເອົາຍິງໜຸ່ມເຂົ້າມາແຂ່ງຂັນ, ຄັດເລືອກເອົາທຶນຊ່ວຍເຫລືອຈາກອົງການ Plan Lao ໃຫ້ໄດ້ຜູ້ຊະນະເລີກຈໍານວນ 5 ຄົນ ແລະມີການແຂ່ງຂັນປຸງແຕ່ງລາບໝູ, ຊຶ່ງຄາດໝາຍທີ່ຈະມີເງິນໝູນໃນງານ 2-3 ຕື້ກີບ.

แชร์