ຫຼວງພະບາງ ຈະສ້າງຈອມພູຫຼວດ ແລະພູກອງ ເປັນແຫຼ່ງທ່ອງທ່ຽວຄົບວົງຈອນ

ຫຼວງພະບາງ ກຽມພັດທະນາພູຈອມຫຼວດ ແລະພູຫີນກອງໃຫ້ກາຍເປັນແຫຼ່ງທ່ອງທ່ຽວທຳມະຊາດ ແລະກະສິກຳຄົບວົງຈອນຂະນະນີ້ກຳລັງຢູ່ໃນຂັ້ນຕອນການສຶກສາສຳຫຼວດຫາກຜົນອອກມາທາງບວກກ້າວສູ່ການພັດທະນາຄາດວ່າຈະເຮັດໃຫ້ນະຄອນຫຼວງພະບາງກໍ່ຄືແຂວງຫຼວງພະບາງມີໂສມໜ້າໃໝ່ທັງຈະເຮັດໃຫ້ການບໍລິການທ່ອງທ່ຽວມີຫຼາຍຮູບແບບເພື່ອຕ້ອນຮັບນັກທ່ອງທ່ຽວໃນອະນາຄົດ.

ພິທີເຊັນບົດບັນທຶກເພື່ອສຳຫຼວດ ແລະສຶກສາຄວາມເປັນໄປໄດ້ ຫຼື (MOU) ໃນການພັດທະນາພື້ນທີ່ພູຈອມຫວດ ແລະພູຫີນກອງໄດ້ຈັດຂຶ້ນໃນວັນທີ່ 24 ທັນວາ 2021 ຜ່ານມາທີ່ພະແນກແຜນການ ແລະການລົງທຶນແຂວງ, ຕາງໜ້າອົງການປົກຄອງແຂວງໂດຍແມ່ນ ທ່ານ ຈີນດາວົງ ໂພສີຄຳ ຫົວໜ້າພະແນກແຜນການແລະການລົງທຶນແຂວງ, ສ່ວນຝ່າຍບໍລິສັດອີນຟີນີຕີການທ່ອງທ່ຽວຈຳກັດ ຕາງໜ້າໂດຍທ່ານ ຫຼາວ ຊານພີງ ປະທານບໍລິສັດໂດຍມີທ່ານ ນາງ ສີລິພອນ ສຸພັນທອງ ຮອງເຈົ້າ ແຂວງຫຼວງພະບາງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ຈີນດາວົງ ໂພສີຄຳ ກ່າວວ່າ: ການສຳຫຼວດ ແລະສຶກສາຄວາມເປັນໄປໄດ້ໃນການພັດທະນາພື້ນທີ່ພູຈອມຫວດ ແລະພູຫີນກອງຕັ້ງຢູ່ລະຫວ່າງ ບ້ານນາສ້າງເຫວີຍແລະບ້ານຜານົມ ນະຄອນຫຼວງພະບາງ ແມ່ນໄດ້ຮັບການອານຸມັດຈາກອົງການປົກຄອງແຂວງຫຼວງພະບາງມອບໃຫ້ບໍລິສັດອີນຟີນີຕີການທ່ອງທ່ຽວຈຳກັດເປັນຜູ້ດຳເນີນການຊຶ່ງມີໄລຍະ 1 ປີ ພາຍຫຼັງສຳເລັດການສຳຫຼວດ ແລະສຶກສາຄວາມເປັນໄປໄດ້, ຈະມີການປະກອບເອກະສານເພື່ອສະເໜີອົງການປົກຄອງແຂວງ ແລະລັດຖະບານລາວອານຸມັດໃນການສຳປະທານໃນຂັ້ນຕໍ່ໄປ.

ໂດຍມີພື້ນທີ່ສຳຫຼວດ ແລະສຶກສາຄວາມເປັນໄປໄດ້ປະມານ 100-150 ເຮັກຕາ ໂດຍຈະມີການປະເມີນຜົນກະທົບຕໍ່ສີ່ງແວດລ້ອມແລະສັງຄົມ, ປະເມີນຜົນກະທົບດ້ານມໍລະດົກໂລກ ແລະສຶກສາຄວາມເປັນໄປໄດ້ໃນການກໍ່ສ້າງໂຮງແຮມ, ຣີສອດ, ທີ່ພັກຕາກອາກາດ ແລະຈຸດກາງເຕັ້ນ, ການກໍ່ສ້າງຝາຍນໍ້າກັ້ນ ແລະນໍ້າຕົກຢູ່ຮ່ອມພູລະຫວ່າງພູຈອມຫວດແລະພູຫີນກອງ, ການກໍ່ສ້າງທາງຂື້ນຈອມຫວດ ແລະພູຫີນກອງ, ກໍ່ສ້າງສະຖານທີ່ຈຸດຊົມວີວຕົວເມືອງ, ຈັດສັນເນື້ອທີ່ເພື່ອຜະລິດກະສິກຳໃນຮູບແບບການທ່ອງທ່ຽວ, ກໍ່ສ້າງສວນສັດ ແລະບ່ອນສະແດງສັດ, ສ້າງກິດຈະກຳການທ່ອງທ່ຽວເຊັ່ນສະໜາມຍິງທະນູ, ບ່ອນຂີ່ສະລີງ, ກິດຈະກຳຂີ່ມ້າ-ຂີ່ລົດຖີບຕາມພູເຂົາ, ສະໜາມແຂ່ງລົດນ້ອຍ (ໂຄຄາດ), ສ້າງບ່ອນກະໂດດບັ້ນຈີ້ຈໍ້າ, ຂົວຍ່າງຊົມວີວ, ກິດຈະກຳປີນພູ, ຂີ່ລົດວີບາກ ແລະສ້າງສູນຝຶກອົບຮົມຫັດຖະກຳທ້ອງຖິ່ນ.

ຂ່າວ: ອາພຸເດດ ບຸບຜາ

แชร์