1 ເດືອນເກືອບ 50 ພັນຄົນໃຊ້ລົດໄຟລາວ-ຈີນ

ລົດໄຟຄວາມໄວສູງລາວ-ຈີນ ເຄື່ອງຈັກຂັບເຄື່ອນເສດຖະກິດລາວຫຼັງເປີດໃຊ້ບໍລິການໃນວັນທີ 3 ທັນວາ 2021 ໄດ້ທະລຸລະບົບການຂົນສົ່ງລາວຄ່ອງຕົວຂຶ້ນຫຼາຍເທົ່າພຽງ 1 ເດືອນເຖິງຈະບໍລິການໂດຍສານພຽງແຕ່ພາຍໃນຈາກນະຄອນຫຼວງວຽງຈັນຫາບໍ່ເຕັນ ກໍ່ມີຜູ້ໃຊ້ບໍລິການສະເລ່ຍ 1,5 ຄົນຕໍ່ມື້ ຈາກຕົວເລກລວມທັງໝົດ 48 ພັນກວ່າຄົນ. ຕາມແຫຼ່ງຂ່າວຈາກ CRI ເປີດເຜີຍວ່າ: ພາຍຫຼັງລົດໄຟລາວ-ຈີນໄດ້ເພີ່ມຖ້ຽວບໍລິການອີກ 1 ຖ້ຽວຈາກ ນະຄອນຫຼວງວຽງຈັນ-ບໍ່ເຕັນເນື່ອງໃນໂອກາດສົ່ງທ້າຍປີເກົ່າຕ້ອນຮັບປີໃໝ່ເຮັດໃຫ້ມາຮອດວັນທີ 3 ມັງກອນ 2022, ລົດໄຟລາວ-ຈີນ ສາມາດບໍລິການຜູ້ໂດຍສານທັງໝົດ 67 ຄູ່ ບັນຈຸຜູ້ໂດຍສານລວມທັງໝົດ 48.200 ຄົນ (ນັບແຕ່ມື້ເປີດບໍລິການຢ່າງເປັນທາງການ) ສະເລ່ຍແລ້ວ 1.554 ຄົນ ຕໍ່ມື້, ອີງຕາມຂໍ້ມູນຂອງເຈົ້າໜ້າທີ່ລົດໄຟແຈ້ງໃນວັນທີ 3 ມັງກອນ 2022.

ຂໍ້ມູນແຈ້ງອີກວ່າ: ທາງລົດໄຟ ລາວ-ຈີນ ຍັງບໍລິການຂົນສົ່ງສິນຄ້າໄດ້ ທັງໝົດ 52 ຄູ່ ສາມາດສົ່ງອອກສິນຄ້າທັງໝົດ 50.800 ໂຕນ ຊຶ່ງສະແດງໃຫ້ເຫັນວ່າທັງການບໍລິການຜູ້ໂດຍສານ ແລະສິນຄ້າລ້ວນແຕ່ເປັນຂະບວນຟົດຟື້ນ. CRI ລາຍງານຕື່ມວ່າ: ສ່ວນເສັ້ນທາງລົດໄຟຈີນ-ລາວ ຕອນປະເທດຈີນ, ຈຳນວນຂົນສົ່ງຜູ້ໂດຍສານໃນມື້ດຽວໄດ້ເພີ່ມຂຶ້ນຈາກ 19 ພັນ ເທື່ອຄົນໃນໄລຍະ ຫາກໍ່ເປີດການນຳໃຊ້ເພີ່ມຂຶ້ນເປັນ 33 ພັນເທື່ອຄົນໃນມື້ທີ່ມີຈຳນວນຜູ້ໂດຍສານຫຼາຍທີ່ສຸດ, ລວມທັງໝົດໄດ້ຂົນສົ່ງຜູ້ໂດຍສານ 6,2 ແສນເທື່ອຄົນ. ກຸ່ມບໍລິສັດເສັ້ນທາງລົດໄຟແຫ່ງຊາດຈີນແຈ້ງຕໍ່ CRI ຕື່ມວ່າ: 1 ເດືອນທີ່ ຜ່ານມາໄດ້ຂົນສົ່ງຜູ້ໂດຍສານທັງໝົດ 6,7 ແສນ ເທື່ອຄົນ, ຂົນສົ່ງສິນຄ້າໄດ້ 1,7 ແສນໂຕນ, ການຂົນສົ່ງຜູ້ໂດຍສານ ແລະ ການຂົນສົ່ງສິນຄ້າລ້ວນແຕ່ມີທ່າອ່ຽງເພີ່ມຂຶ້ນ, ຊຶ່ງຖືວ່າເປັນຜົນງານທີ່ໜ້າຊົມເຊີຍ, ໄດ້ກະຕຸກຊຸກຍູ້ເສດຖະກິດ ແລະ ການທ່ອງທ່ຽວລຽບຕາມເສັ້ນທາງລົດໄຟຢ່າງແຂງແຮງໄດ້ເລັ່ງສ້າງເສັ້ນທາງຈໍລະຈອນສິນຄ້າອັນໃໝ່ລະຫວ່າງຈີນ ແລະ ອາຊຽນ ທັງໄດ້ເສີມຂະຫຍາຍບົດ ບາດອັນຕັ້ງໜ້າໃນການປັບປຸງເງື່ອນໄຂການເດີນທາງຂອງປະຊາຊົນສອງຊາດ ຈີນ-ລາວ, ຊຸກຍູ້ຮອບໝູນວຽນດ້ານເສດຖະກິດພາຍໃນປະເທດ ແລະ ສາກົນ ໃຫ້ໂລ່ງລ່ຽນ ແລະ ຊຸກຍູ້ການສ້າງແລວເສດຖະກິດຈີນ-ລາວ.

ສຳລັບໂຄງການລົດໄຟລາວ-ຈີນ ຕອນປະເທດລາວເປັນໂຄງການຮ່ວມມືທີ່ການນໍາຂັ້ນສູງຂອງສອງພັກສອງລັດ ສປປ ລາວ ແລະ ສປ ຈີນ ຊຸກຍູ້ດ້ວຍຕົນເອງ, ເປັນສັນຍະລັກແຫ່ງມິດຕະພາບລາວ-ຈີນແຫ່ງຍຸກສະໄໝໃໝ່, ເປັນໂຄງການທີ່ເຊື່ອມໂຍງຍຸດທະສາດ “ຫັນຈາກປະເທດທີ່ບໍ່ຊາຍແດນຕິດກັບທະເລໃຫ້ກາຍເປັນປະເທດເຊື່ອມຈອດ” ຂອງ ສປປ ລາວ ແລະຂໍ້ລິເລີ່ມ “ໜຶ່ງແລ້ວໜຶ່ງເສັ້ນທາງ” ຂອງ ສປ ຈີນ. ໂຄງການລົດໄຟ ລາວ-ຈີນ ທິດເໜືອເລີ່ມຕົ້ນຈາກຊາຍແດນລາວ-ຈີນ ດ່ານບໍ່ຫານ-ບໍ່ເຕັນ, ຊຶ່ງ ໄດ້ຜ່ານແຂວງຫຼວງນໍ້າທາ, ແຂວງອຸດົມໄຊ, ແຂວງຫຼວງພະບາງ, ແຂວງວຽງ ຈັນ ແລະມາສຸດທີ່ນະຄອນຫຼວງວຽງຈັນ, ມີຄວາມຍາວທັງໝົດ 422.4 ກິໂລ ແມັດ ຄວາມໄວອອກແບບ 160 ກິໂລ ແມັດຕໍ່ຊົ່ວໂມງ, ມູນຄ່າການກໍ່ສ້າງທັງ ໝົດ 37.4 ຕື້ຢວນ.

ຂ່າວ: ນໍ້າໜຶ່ງ

แชร์