ກະຊວງການເງິນ ສະຫຼຸບການຈັດຕັ້ງປະຕິບັດວຽກງານ

ຂ່າວ: ກະຊວງການເງິນ

ກະຊວງການເງິນໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານປະຈໍາປີ 2021 ຂຶ້ນເມື່ອບໍ່ດົນມານີ້ທີ່ກະຊວງດັ່ງກ່າວໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີພາກສ່ວນກ່ຽວຂ້ອງອ້ອມຂ້າງກະຊວງເຂົ້າຮ່ວມ.

ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນໄດ້ສະຫຼຸບຕີລາຄາການຈັດຕັ້ງປະຕິບັດການເຄື່ອນໄຫວວຽກງານຂອງກະຊວງການເງິນ ປະຈໍາປີ 2021 ແລະທິດທາງແຜນການປີ 2022 ໂດຍສັງເຂບຊຶ່ງຍົກໃຫ້ເຫັນສະພາບການຈັດຕັ້ງປະຕິບັດວຽກງານໃນໄລຍະຜ່ານມາເຫັນໄດ້ດ້ານດີ, ຂໍ້ຄົງຄ້າງ ແລະສິ່ງທ້າທ້າຍທີ່ຈະຕ້ອງໄດ້ມີການປັບປຸງແກ້ໄຂເພື່ອເຮັດໃຫ້ການຈັດຕັ້ງປະຕິບັດວຽກງານໃນປີ 2022 ໃຫ້ມີປະສິດທິພາບປະສິດທິຜົນດີຂຶ້ນກວ່າເກົ່າ.

ໃນໄລຍະ 1 ປີ ຜ່ານມາກະຊວງການເງິນໄດ້ເອົາໃຈໃສ່ຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2021 ຊຶ່ງເປັນບາດກ້າວເລີ່ມຕົ້ນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະແຜນງົບປະມານແຫ່ງລັດ 5 ປີ (2021-2025), ເປັນແຜນທີ່ຈັດຕັ້ງປະຕິບັດຢູ່ໃນສະພາບເສດຖະກິດ-ການເງິນພົບພໍ້ກັບຄວາມຫຍຸ້ງຍາກຫຼາຍດ້ານ, ເນື່ອງຈາກສະພາບການຂອງພາກພື້ນແລະສາກົນມີການຜັນແປຢ່າງສັບສົນ.

ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໄດ້ໃຫ້ກຽດໂອ້ລົມຕໍ່ກອງປະຊຸມເພື່ອເປັນທິດທາງຊີ້ນໍາໃນການຈັດຕັ້ງປະຕິບັດວຽກງານໃນຕໍ່ໜ້າກໍ່ຄືແຜນວຽກໃນປີ 2022, ເອົາໃຈໃສ່ສຸມໃສ່ການປະຕິບັດວຽກງານຂອງແຕ່ລະກົມ, ສ້າງຄວາມເອກະພາບໃນວຽກງານໃຫ້ທຸກຂົງເຂດໄປທິດທາງລວງດຽວກັນ, ສືບຕໍ່ຜັນຂະຫຍາຍວຽກງານໃຫ້ໄດ້ຮັບຜົນສໍາເລັດ, ເອົາໃຈໃສ່ຝຶກອົບຮົມພະນັກງານ-ລັດຖະກອນຂະແໜງການເງິນ, ພ້ອມກັນປັບປຸງກົນໄກໃນການຄຸ້ມຄອງບໍລິຫານໃຫ້ມີຄວາມສະ ດວກ ແລະຫັນເປັນທັນສະໄໝໃຫ້ຫຼາຍຂຶ້ນ, ເອົາໃຈໃສ່ສືບຕໍ່ປະຕິບັດວຽກງານແກ້ໄຂປະກົດການຕ່າງໆເຮັດທຸກວິທີທາງເພື່ອອັດຊ່ອງວ່າງບໍ່ໃຫ້ມີການຮົ່ວໄຫຼຂອງລາຍຮັບງົບປະມານ.

แชร์