ບົວລະພາ ກະສິກຳ-ປ່າໄມ້ ຮັບລາງວັນນັກທຸລະກິດຊັ້ນນຳດີເດັ່ນ

ບໍລິສັດ ບົວລະພາ ກະສິກຳ-ປ່າໄມ້ ຈຳກັດ ໄດ້ຮັບລາງວັນນັກທຸລະກິດຊັ້ນນຳດີເດັ່ນໄລຍະໂຄວິດ-19 ປະຈຳປີ 2021 ທີ່ຈັດໂດຍສະພາການຄ້າ ແລະອຸດສາຫະກຳ ແຫ່ງຊາດລາວ (ສຄອຊ) ການໄດ້ຮັບລາງວັນດັ່ງກ່າວແມ່ນຢັ້ງຢືນເຖິງຜົoງານທີ່ໂດດເດັ່ນຂອງບໍລິສັດໃນຜ່ານມາທີ່ໄດ້ປະກອບສ່ວນສຳຄັນຊ່ວຍພັກ-ລັດ, ສ້າງວຽກເຮັດງານທຳໃຫ້ແກ່ປະຊາຊົນໃນທ້ອງຖິ່ນ.

ການໄດ້ຮັບລາງວັນຈັດຂຶ້ນບໍ່ດົນມານີ້ທີ່ນະຄອນຫຼວງວຽງຈັນໃຫ້ກຽດມອບໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ ແລະຕາງໜ້າຮັບຂອງທ່ານ ນາງ ສຸໄພວັນ ທ່ຽງຈັນໄຊ ຮອງຜູ້ອຳນວຍການບໍລິສັດບົວລະພາກະສິກຳ-ປ່າໄມ້ຈຳກັດ.

ທ່ານ ນາງ ສຸໄພວັນ ທ່ຽງຈັນໄຊ ກ່າວວ່າ: ໃນທຸກໆປີສະພາການຄ້າ ແລະອຸດສາຫະກຳແຫ່ງຊາດລາວໄດ້ຄັດເລືອກ ແລະຈັດພິທີມອບລາງວັນນັກທຸລະກິດຊັ້ນນຳດີເດັ່ນໃຫ້ແກ່ບັນດານັກທຸລະກິດລາວເພື່ອເປັນການຍ້ອງຍໍຊົມເຊີຍ ແລະເປັນຂວັນກໍາລັງໃຈໃຫ້ບັນດາຫົວໜ່ວຍທຸລະກິດທີ່ເປັນສະມາຊິກຂອງສະພາການຄ້າ ແລະອຸດສາຫະກໍາແຫ່ງ ຊາດລາວທີ່ສາມາດນໍາພາວິສາຫະກິດຂອງຕົນຂ້າມຜ່ານວິກິດຕ່າງໆ ທີ່ເກີດຂຶ້ນຈາກການແຜ່ລະບາດຂອງເຊື້ອພະຍາດໂຄວິດ-19 ແລະຊົມເຊີຍບັນດາວິສາຫະກິດທີ່ມີທ່າແຮງປະກອບສ່ວນທາງດ້ານທຶນຮອນ, ວັດຖຸປັດໄຈຕ່າງໆ ສົມທົບໃຫ້ແກ່ລັດຖະບານໃນການສະກັດກັ້ນ ແລະຕ້ານການແຜ່ລະບາດຂອງເຊື້ອພະຍາດໂຄວິດ-19, ທັງເປັນການປະກອບສ່ວນອັນສໍາຄັນການພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານມາ.

ທ່ານ ນາງ ສຸໄພວັນ ທ່ຽງຈັນໄຊ ໄດ້ກ່າວຕໍ່ວ່າ: ບໍລິສັດບົວລະພາກະສິກຳ-ປ່າໄມ້ ຈຳກັດ ກໍ່ເປັນໜຶ່ງໃນສະມາຊິກສະພາການຄ້າແລະອຸດສາຫະກຳແຫ່ງຊາດ ແລະຕົນເອງກໍ່ໄດ້ເປັນຄະນະບໍລິຫານງານຂອງສະພາການຄ້າທີ່ໄດ້ເຮັດວຽກຮ່ວມກັບລັດຖະບານ, ຊຶ່ງໄລຍະຜ່ານມາກໍ່ໄດ້ມີການປະກອບຊ່ວຍເຫຼືອສັງຄົມ, ປະກອບສ່ວນສ້າງຄວາມ ເຂັ້ມແຂງໃຫ້ສະພາການຄ້າ ແລະອຸດສາຫະກໍາ. ການຮັບລາງວັນໃນຄັ້ງນີ້, ກໍ່ເປັນພາກພູມໃຈໜຶ່ງຂອງບໍລິສັດພວກເຮົາ.

แชร์