ຫາລືປະຕິສັງຂອນສວນວັດທະນະທຳພຣະທາດ ສີໂຄດຕະບອງ

ໂດຍ: ນໍ້າເໝີຍ

 ກອງປະຊຸມປຶກສາຫາລືກ່ຽວກັບແຜນບູລະນະປະຕິສັງຂອນ ແລະພັດທະນາສວນວັດທະນະທໍາພຣະທາດສີໂຄດຕະບອງໄດ້ຈັດຂຶ້ນໃນວັນທີ 27 ທັນວາ 2021 ຜ່ານມານີ້ຢູ່ທີ່ຫ້ອງວ່າການ ເມືອງທ່າແຂກ ໂດຍໃຫ້ກຽດເປັນປະທານຂອງທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງໆຄໍາມ່ວນ ມີຄະນະພຣະສົງ, ບັນດາຄະນະປະຈໍາພັກເມືອງ, ກຳມະການພັກເມືອງ, ແນວລາວສ້າງຊາດແຂວງ, ຫົວໜ້າຫ້ອງການ-ຮອງ ຫົວໜ້າຫ້ອງການອ້ອມຂ້າງເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມທັງໝົດ.

  ທ່ານ ສີຫງວນ ອິນທະລາດ ຮອງເຈົ້າເມືອງໆທ່າແຂກໄດ້ຂຶ້ນຜ່ານຮ່າງແຜນບູລະນະປະຕິສັງຂອນ ແລະພັດທະນາສວນວັດທະນະທຳພຣະທາດສີໂຄດຕະບອງຈຸດ ປະສົງເພື່ອປັບປຸງລະບຽບການບໍລິຫານຄຸ້ມຄອງຂຶ້ນໃໝ່ໃຫ້ເໝາະສົມ, ສ້າງຄຸນຄ່າທາງດ້ານພຸດທະສາສະໜາຕິດພັນກັບວັດທະນະທຳ, ຮີດຄອງປະເພນີອັນດີງາມ ຂອງຊາດລາວ ແລະປະຊາຊົນບັນດາເຜົ່າຂອງຊາວແຂວງຄຳມ່ວນ, ບູລະນະປະຕິສັງຂອນອົງພຣະທາດ ແລະກົມມະລຽນພາຍໃນຊຶ່ງເປັນມໍລະດົກແຫ່ງຊາດໃຫ້ມີ ຄວາມຍືນຍົງຕະຫຼອດໄປພັດທະນາສວນວັດທະນະທໍາສີໂຄດຕະ ບອງໃຫ້ກາຍເປັນແຫຼ່ງທ່ອງທ່ຽວ ທີ່ສຳຄັນຂອງເມືອງທ່າແຂກ, ສ້າງໃຫ້ປະຊາຊົນບັນດາເຜົ່າມີຄວາມເຫຼື້ອມໃສໃຈສັດທາຕໍ່ພຸດທະສາດສະໜາກໍ່ຄືອົງພຣະທາດສີໂຄດຕະບອງຮູ້ເຫັນແລ້ວຢາກມາກາບໄຫວ້ສັກກະລະບູຊາສ້າງກິດຈະກຳທາງສາສະໜາໃນວັນພຣະ, ວັນສິນ ແລະ ຂະບວນການຕ່າງໆໃຫ້ເປັນປົກກະຕິປະດິດສິ່ງລະນຶກເຊັ່ນ: ຫຼຽນ, ຮູບປັ້ນພຣະຍາສີໂຄດ, ປະຫວັດຂອງອານາຈັກສີໂຄດ ຫຼືພຣະທາດສີໂຄດ ແລະບູລະນະປະຕິ ສັງຂອນ ອົງພຣະທາດ, ກົມມະລຽນ, ປູກຕົ້ນດອກໄມ້ ແລະ ແສງສະຫວ່າງໃຫ້ມີຄວາມຈົບງາມພັດທະນາສວນວັດທະນະທຳໃຫ້ກາຍເປັນແຫຼ່ງທ່ອງທ່ຽວ,ເປັນສະຖານທີ່ພັກຜ່ອນ, ຫຼິ້ນກີລາ, ຂາຍເຄື່ອງໂອດ໋ອບ ແລະບໍລິການອາຫານເຄື່ອງດື່ມ.

ກອງປະຊຸມຄັ້ງນີ້ບັນດາຜູ້ເຂົ້າຮ່ວມໄດ້ພ້ອມກັນຄົ້ນຄວ້າປຶກສາຫາລື ແລະປະກອບຄໍາຄິດ-ຄໍາເຫັນ ເພື່ອປະກອບໃສ່ຮ່າງແຜ່ນບູລະນະປະຕິສັງຂອນດັ່ງກ່າວໃຫ້ມີຄວາມ ສົມບູນ ແລະໜັກແໜ້ນຂຶ້ນຕື່ມ.

• 05/01/2022