ອັດຕະປື ມີແຮງງານອຸດສາຫະກຳ 242 ຫົວໜ່ວຍ

ຂ່າວ: ວັດທະນາ

 ທ່ານ ສຸດໃຈ ກົມມະເມືອງ ຫົວໜ້າພະແນກອຸດສາຫະກໍາ ແລະການຄ້າ ແຂວງອັດຕະປື ໄດ້ລາຍງານຕໍ່ກອງປະຊຸມອົງການປົກຄອງແຂວງລະຫວ່າງວັນທີ 27-28 ທັນວາ 2021ວ່າ: ໃນ 1 ປີຜ່ານມາພະແນກອຸດສາຫະກໍາ ແລະການຄ້າ ແຂວງອັດຕະປື ໄດ້ເອົາໃຈໃສ່ໃນການສົ່ງເສີມໃຫ້ຂະແໜງອຸດສາຫະກໍາປຸງແຕ່ງໃຫ້ມີການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ, ໂດຍສະເພາະແມ່ນໂຮງງານປຸງແຕ່ງອຸດສາຫະກໍາພາຍໃນແຂວງ, ຊຶ່ງປະຈຸບັນມີເຖິງ 242 ຫົວໜ່ວຍ, ຂະໜາດໃຫຍ່ມີ 23 ຫົວໜ່ວຍ, ຂະໜາດກາງ 14 ຫົວໜ່ວຍ, ຂະໜາດນ້ອຍ 105 ຫົວໜ່ວຍ ແລະແບບຄອບຄົວມີ 100 ຫົວໜ່ວຍ, ສ່ວນຕົວເລກການຜະລິດ ແລະ ການຈຳໜ່າຍຂອງຫົວໜ່ວຍອຸດສາຫະກຳປຸງແຕ່ງໃນໄລຍະປີ 2021 ສາມາດບັນລຸໄດ້ 464 ຕື້ກີບ, ທຽບໃສ່ແຜນປີ ເທົ່າກັບ 105% ທຽບໃສ່ປີ 2020 ເພີ່ມຂຶ້ນ 26%, ຈໍາໜ່າຍພາຍໃນມູນຄ່າ 89 ຕື້ກີບ,ສົ່ງອອກຕ່າງປະເທດມີມູນຄ່າ 375 ຕື້ກີບ, ໃນນັ້ນ: ການຜະລິດນໍ້າຕານໄດ້ 39.352 ໂຕນ, ມູນຄ່າ 213 ຕື້ກວ່າກີບ, ທຽບໃສ່ແຜນປີ ເທົ່າກັບ 177%, ທຽບໃສ່ປີ 2020 ເພີ່ມຂຶ້ນ 49%, ໄມ້ ແລະຜະລິຕະພັນ 19.163 ແມັດກ້ອນ, ມູນຄ່າ 89 ຕື້ກີບ, ທຽບໃສ່ ແຜນປີເທົ່າກັບ 83%, ທຽບໄສ່ປີ 2020 ເພີ່ມຂຶ້ນ 24%, ຍາງພາລາ 4.492 ໂຕນ ມູນຄ່າ 71 ຕື້ກີບ,ທຽບໃສ່ແຜນປີ ເທົ່າກັບ 49% ທຽບໃສ່ປີ 2020 ເພີ່ມຂຶ້ນ 19%.

ທ່ານ ສຸດໃຈ ກົມມະເມືອງ ຫົວໜ້າພະແນກອຸດສາຫະກໍາ ແລະການຄ້າໄດ້ລາຍງານໃຫ້ຮູ້ຕື່ມວ່າ: ການສົ່ງເສີມ ແລະພັດທະນາຜະລິດຕະພັນອຸດສາຫະກຳ ແລະປຸງແຕ່ງທີ່ມີທ່າແຮງໄດ້ສຸມໃສ່ການນໍາໃຊ້ຊັບພະຍາກອນທໍາມະຊາດ ແລະ ທ່າແຮງບົ່ມຊ້ອນຂອງແຂວງເພື່ອຜະລິດເປັນສິນຄ້າໃຫ້ມີຫຼາກຫຼາຍ ແລະ ເຮັດໃຫ້ແຕ່ລະຫົວໜ່ວຍການຜະລິດຂະຫຍາຍຕົວດີຂຶ້ນ, ໄດ້ສົ່ງເສີມການສ້າງລາຍຮັບ, ສ້າງວິຊາຊີບ-ວຽກເຮັດງານທຳໃຫ້ແກ່ປະຊາຊົນ, ພັດທະນາຄວາມຮູ້ຄວາມສາມາດຂອງເຂົາເຈົ້າໃຫ້ດີຂຶ້ນເທື່ອລະກ້າວ, ສົ່ງເສີມ ແລະພັດທະນາອຸດສາຫະ ກຳວຽກງານປຸງແຕ່ງໃຫ້ກ້າວກະໂດນເພື່ອໃຫ້ທັນສະໃໝເນັ້ນໃສ່ການນໍາໃຊ້ວັດຖຸດິບ ແລະພູມປັນຍາຂອງແຕ່ລະທ້ອງຖິ່ນເພື່ອເປັນເປົ້າໝາຍໃນການສົ່ງເສີມ ແລະ ຜະລິດເປັນສິນຄ້າ, ເພື່ອເຮັດໃຫ້ການຜະລິດສິນຄ້າອຸດສາຫະກຳປຸງແຕ່ງມີການຂະຫຍາຍຕົວໂດຍສະເພາະສົ່ງເສີມເຮັດໃຫ້ສິນຄ້າອຸດສາຫະກໍາປຸງແຕ່ງມີມູນຄ່າການສົ່ງອອກເພື່ອຂຶ້ນເພື່ອຍົກລະດັບທາງດ້ານປະລິມານ ແລະຄຸນນະພາບຂຶ້ນເທື່ອລະກ້າວສາມາດຕອບສະໜອງໄດ້ຕະຫຼາດພາຍໃນ ແລະສົ່ງອອກໃຫ້ໄດ້ຕາມແຜນມທີ່ວາງໃວ້ໃນແຕ່ລະໄລຍະ.

แชร์