ຮອດ 27 ທັນວາ ລາຍຮັບດ່ານຂົວມິດຕະພາບ 3 ໄດ້ 273 ຕື້ກວ່າກີບ

ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ເປັນວົງ ກວ້າງເຊິ່ງເປັນອຸປະສັກ ແລະສິ່ງທ້າທາຍຕໍ່ການຈັດເກັບລາຍຮັບເຂົ້າງົບປະມານ, ການເຂົ້າ-ອອກຂອງພາຫະນະມີການຫຼຸດລົງລວມເຖິງສິນຄ້າປະເພດຕ່າງໆກໍ່ມີການຫຼຸດລົງເຊັ່ນດຽວກັນເປັນສາຍເຫດເຮັດໃຫ້ການຈັດເກັບລາຍຮັບເຂົ້າງົບປະມານຂອງດ່ານພາສີສາກົນຂົວມິດຕະພາບ 3 ຄຳມ່ວນ-ນະຄອນພະນົມບໍ່ໄດ້ຕາມແຜນທີ່ວາງໄວ້ ຫຼືບັນລຸໄດ້ພຽງແຕ່ 273 ຕື້ກວ່າກີບ.

ທ່ານ ບຸນທະນົງສັກ ເທບພະລັກ ຫົວໜ້າດ່ານພາສີສາກົນຂົວມິດຕະພາບ 3 ຄຳມ່ວນ-ນະຄອນພະນົມໄດ້ໃຫ້ສຳພາດຕໍ່ສື່ມວນຊົນທ້ອງຖິ່ນໃນວັນທີ 28 ທັນວາ 2021 ວ່າ: ກ່ຽວກັບແຜນການຈັດເກັບລາຍຮັບເຂົ້າງົບປະມານໃນປີ 2021 ດ່ານພາສີສາກົນຂົວມິດຕະພາບ 3 ໄດ້ ຮັບຕົວເລກມອບໝາຍຈຳນວນ 337 ຕື້ກວ່າກີບ, ຮອດວັນທີ 27 ທັນວາ 2021 ສາມາດປະຕິບັດຕົວຈິງໄດ້ 273 ຕື້ກວ່າກີບ ຖ້າທຽບໃສ່ແຜນການປີແມ່ນປະຕິບັດໄດ້ 80,86% ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 3,30% ເທົ່າກັບ 9,3 ຕື້ກວ່າກີບ.

ສາຍເຫດທີ່ພາໃຫ້ຈັດເກັບລາຍຮັບບໍ່ບັນລຸຕາມແຜນທີ່ວາງໄວ້ໄດ້ເນື່ອງຈາກລາຍຮັບຫຼັກຂອງດ່ານສາກົນຂົວມິດຕະພາບ 3 ໄດ້ຈາກສິນຄ້ານຳເຂົ້າເພື່ອສົ່ງອອກຕໍ່ເປັນຕົ້ນກໍ່ແມ່ນສິນຄ້າປະເພດກະທິງແດງປະເທດທີ່ບໍລິໂພກແມ່ນ ສສ ຫວຽດນາມ ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ເປັນ ເຫດເຮັດໃຫ້ການບໍລິໂພກລຸດລົງ ແລະການນຳເຂົ້ານໍ້າມັນເຊື້ອໄຟລຸດລົງເນື່ອງຈາກບໍລິສັດທີ່ເຮັດການນຳເຂົ້າມີປໍ້າ ແລະການເຄື່ອນຍ້າຍມາຈາກຕ່າງແຂວງ.

ສຳລັບຕົວເລກແຜນການຄາດຄະເນຈະເກັບລາຍຮັບໃນຕໍ່ໜ້າປີ 2022 ແມ່ນ 413 ຕື້ກີບ, ເພື່ອຮັບປະກັນໃນການຈັດຕັ້ງປະຕິບັດການຈັດເກັບລາຍຮັບໃນຕໍ່ໜ້າໃຫ້ບັນລຸຕາມແຜນທີ່ວາງໄວ້ແມ່ນຈະໄດ້ເອົາໃຈໃສ່ສຶກສາອົບຮົມວຽກງານການເມືອງແນວຄິດໃຫ້ແກ່ເຈົ້າໜ້າທີ່ພາຍໃນດ່ານເພື່ອໃຫ້ເຂົາເຈົ້າເຂົ້າໃຈເຖິງຕົວເລກທີ່ໄດ້ຮັບມອບໝາຍເຖິງຈະເປັນຕົວເລກທີ່ສູງແຕ່ເຖິງຢ່າງໃດຕ້ອງໄດ້ພ້ອມກັນສູ້ຊົນປະຕິບັດໃຫ້ສຳເລັດ, ພ້ອມນີ້ຈະໄດ້ລະດົມຜູ້ປະກອບການພາກທຸລະກິດໃຫ້ເຂົາເຈົ້າມາໃຊ້ບໍລິການດ່ານໃຫ້ຫຼາຍຂຶ້ນ, ປະສານສົມທົບກັບພາກສ່ວນກ່ຽວຂ້ອງອຳນວຍຄວາມສະດວກດ້ານການຄ້າໃຫ້ສອດຄ່ອງ-ວ່ອງໄວທັງຮັບປະກັນຕໍ່ການຈັດເກັບລາຍຮັບໃຫ້ມີຄວາມຖືກຕ້ອງຕາມລະບຽບກົດໝາຍ, ຄຽງຄູ່ກັນນັ້ນຈະຕ້ອງໄດ້ປະຕິບັດຄຳສັ່ງເລກທີ 18/ນຍ ລົງວັນທີ 16 ກັນຍາ 2021 ວ່າດ້ວຍການເພີ່ມທະວີຄຸ້ມຄອງການ ຮົ່ວໄຫຼຂອງງົບປະມານແຫ່ງລັດ ແລະ 14 ມາດຕະການທ້າຍປີ 2021 ແລະ 8 ມາດຕະການໃນປີ 2022 ໃຫ້ມີຄວາມເຂັ້ມງວດ ແລະອີງໃສ່ນິຕິກໍາອື່ນໆອີກ.

แชร์