ສຳເລັດກອງປະຊຸມສະພາບໍລິຫານ ທຫລ ຄັ້ງທີ II ປະຈໍາປີ 2021

ເພື່ອສະຫຼຸບທົບທວນຄືນການປະຕິບັດວຽກງານລວມໃນໄລຍະ 1 ປີ ຜ່ານມາພ້ອມທັງວາງທິດທາງແຜນການເຄື່ອນໄຫວວຽກງານຂອງທະນາຄານແຫ່ງ ສປປ ລາວ (ທຫລ) ໃນຕໍ່ ໜ້າ ປີ 2022, ຕອນເຊົ້າວັນທີ 30 ທັນວາ 2021 ຢູ່ທະນາຄານແຫ່ງ ສປປ ລາວ ໄດ້ຈັດກອງປະຊຸມສະພາບໍລິຫານ ທຫລ ຄັ້ງທີ II ປະຈໍາປີ  2021 ຂຶ້ນໂດຍພາຍໃຕ້ການເປັນປະທານຂອງ ທ່ານ ສອນໄຊ ສິດພະໄຊ, ປະທານສະພາບໍລິຫານ ທຫລ, ຜູ້ວ່າການ ທຫລ; ພ້ອມນີ້, ກໍມີຮອງປະທານ, ຄະນະກໍາ ມະການ, ຫົວໜ້າກົມ, ຮອງກົມພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ທີ່ປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານທີ່ສໍາຄັນເປັນຕົ້ນ: ການຈັດຕັ້ງປະຕິບັດການເຄື່ອນໄຫວວຽກງານຂອງທຫລ 6 ເດືອນ ທ້າຍປີ 2021 ແລະທິດທາງແຜນການ ປີ 2021; ການຈັດຕັ້ງປະຕິບັດແຜນເງິນຕາ ປີ 2021 ແລະທິດທາງແຜນການ ປີ 2022; ການປະຕິບັດແຜນງົບປະມານ ປີ 2021 ແລະທິດທາງແຜນການປີ 2022 ຂອງ ທຫລ. ພ້ອມນີ້, ກໍ່ມີບາງບັນຫາວຽກງານທີ່ປິ່ນອ້ອມອື່ນໆຈໍານວນໜຶ່ງເພື່ອລາຍງານ ແລະສະເໜີໃຫ້ສະພາບໍລິຫານພິຈາລະນາຮັບຮອງ.

ທ່ານ ສອນໄຊ ສິດພະໄຊ ກ່າວວ່າ: ຜ່ານມາ ທຫລ ໄດ້ເອົາໃຈໃສ່ຈັດຕັ້ງປະຕິບັດບັນດານະໂຍບາຍ ແລະ ມາດຕະການຕ່າງໆ ເພື່ອຮັກສາສະເຖຍລະພາບເງິນຕາແຫ່ງຊາດ, ຮັກສາສະເຖຍລະພາບທາງດ້ານການເງິນ, ລະບົບຊໍາລະສະສາງພ້ອມທັງຈັດຕັ້ງປະຕິບັດແຜນງົບປະມານ ແລະວຽກງານປິ່ນອ້ອມອື່ນໆຕາມມະຕິຂອງສະພາບໍລິຫານດ້ວຍຄວາມເປັນເຈົ້າການ ແລະຮັບຜິດຊອບສູງເປັນຕົ້ນ: ສຸມໃສ່ການປັບປຸງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ, ປັບປຸງກົນໄກການຄຸ້ມຄອງຮ້ານແລກປ່ຽນ, ປັບປຸງດໍາລັດການເຄື່ອນໄຫວວຽກງານຂອງທະນາຄານນະໂຍບາຍ ແລະອື່ນໆ. ເຖິງຢ່າງໃດກໍຕາມ, ການຈັດຕັ້ງປະຕິບັດຕົວຈິງແມ່ນມີສິ່ງ ທ້າທ້າຍຫຼາຍດ້ານທ່າມກາງທີ່ສະພາບການຂອງພາກພື້ນ ແລະສາກົນເປັນຕົ້ນການແຜ່ລະບາດຂອງພະຍາດ COVID-19 ໃນຮອບໃໝ່ໄດ້ເຮັດໃຫ້ສະພາບການຂະຫຍາຍຕົວຂອງເສດຖະກິດໂດຍລວມຂອງໂລກສືບຕໍ່ຂະຫຍາຍຕົວຫຼຸດລົງ, ໃນສະພາບຄວາມບໍ່ແນ່ນອນດັ່ງກ່າວໄດ້ສົ່ງຜົນໃຫ້ລາຄານໍ້າມັນ, ລາຄາຄໍາ ແລະຄ່າເງິນຢູ່ຕະຫຼາດສາກົນມີຄວາມຜັນຜວນແຮງເຮັດໃຫ້ການຮັກສາສະເຖຍລະພາບເງິນຕາແຫ່ງຊາດປະສົບກັບຄວາມຫຍຸ້ງຍາກ. ເຖິງຢ່າງໃດກໍ່ຕາມ, ຂະແໜງການທະນາຄານຍັງສືບຕໍ່ຮັກສາສະເຖຍລະພາບເງິນຕາແຫ່ງຊາດໄດ້ໂດຍລວມ, ລະບົບທະນາຄານ ແລະສາຖາບັນການເງິນຍັງສືບຕໍ່ເຄື່ອນໄຫວປົກກະຕິ ແລະມີສະພາບຄ່ອງດີ.

ໃນຕອນທ້າຍທ່ານໄດ້ນັ້ນຕື່ມວ່າ: ຂະແໜງການທະນາຄານຕ້ອງໄດ້ເອົາໃຈໃສ່ໃນການປະຕິບັດໜ້າທີ່ການເມືອງຂອງຕົນເພື່ອຮັກສາສະຖຽນລະພາບທາງການເງິນ-ເງິນຕາ ໃຫ້ມີຄວາມສະຫງົບ, ໝັ້ນທ່ຽງ. ພ້ອມນີ້, ຈະສຸມໃສ່ປັບປຸງບັນດາໜ້າວຽກທີ່ຕິດພັນກັບ ທຫລ ທີ່ໄດ້ຖືກກໍານົດໃນວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ-ເງິນຕາ ໂດຍສະເພາະການປັບປຸງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະປັບປຸງກົນໄກການຄຸ້ມຄອງຮ້ານແລກປ່ຽນພ້ອມທັງປະຕິບັດບັນດາຄາດໝາຍມະຫາພາກດ້ານເງິນຕາໃຫ້ໄດ້ຕາມທີ່ສະພາແຫ່ງຊາດຮັບຮອງ. ພ້ອມດຽວກັນນີ້, ກໍ່ຈະສືບຕໍ່ເອົາໃຈໃສ່ປັບປຸງລະບົບທະນາຄານ ແລະສະຖາບັນການເງິນໃຫ້ມີຄວາມໜັກແໜ້ນເຂັ້ມແຂງ, ປັບປຸງລະບົບການຊໍາລະໃຫ້ທັນສະໄໝ, ລວມສູນ ແລະປອດໄພ.

แชร์