2021 ເສດຖະກິດຈຳປາສັກ ສືບຕໍ່ຂະຫຍາຍຕົວລະດັບດີ

ຂ່າວ: ໂພທິລາດ

ເຖິງແມ່ນວ່າໃນປີ 2021 ສະພາບເສດຖະກິດຂອງໂລກຈະມີການຜັນແປຢ່າງສະຫຼັບຊັບຊ້ອນ ແລະມີແນວໂນມທີ່ບໍ່ແນ່ນອນບວກກັບບັນຫາການແຜ່ລະບາດຂອງເຊື້ອພະຍາດໂຄວິດ-19 ທີ່ມີລັກຊະນະແກ່ຍາວດັ່ງນັ້ນຈຶ່ງເຮັດໃຫ້ສົ່ງຜົນຕໍ່ການພັດທະນາເສດຖະກິດ-ສັງຄົມຂອງປະເທດຢ່າງໃດກໍ່ຕາມສໍາລັບແຂວງຈໍາປາສັກແມ່ນເຫັນວ່າເສດຖະກິດຍັງສຶບຕໍ່ຂະຫຍາຍຕົວໃນລະດັບທີ່ດີ.

ທ່ານ ປອ. ວິໄລວົງ ບຸດດາຄໍາ ເຈົ້າແຂວງໆຈໍາປາສັກໄດ້ຂຶ້ນຜ່ານບົດສະຫຼຸບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໝົດປີ 2021 ແລະແຜນປີ 2022 ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຈໍາປາສັກ ຊຸດທີ II ທີ່ໄດ້ຈັດຂຶ້ນໃນລະຫວ່າງວັນທີ 29-30 ທັນວາ 2021 ຜ່ານມານີ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ສາມາດສ້າງມູນຄ່າຜະລິດຕະພັນພາຍໃນປະຕິບັດໄດ້  22,737,43 ຕື້ກີບ, ທຽບໃສ່ແຜນປີປະ ຕິ ບັດໄດ້ 97%, ຊຶ່ງເຮັດໃຫ້ອັດຕາຂະຫຍາຍຕົວຂອງ GDP ຂະຫຍາຍຢູ່ໃນລະດັບ 3,58%, ສະເລຍຕໍ່ຫົວຄົນໄດ້ 3.050 ໂດລາສະຫະລັດ, ຫຼືເທົ່າກັບ 29,93 ລ້ານກີບ, ເຮັດໃຫ້ໂຄງປະກອບເສດຖະກິດຂະແໜງກະສີກໍາ ແລະ ປ່າໄມ້ກວມ 32,22%, ຂະແໜງອຸດສາຫະກໍາກວມ 20,92%  ແລະ ຂະແໜງບໍລິການກວມ 46,86% ຂອງ GDP, ອັດຕາເງິນເຟີ້ສະເລ່ຍຢູ່ໃນລະດັບ 7,69%, ຖ້າທຽບໃສ່ໄລຍະດຽວເພີ່ມຂື້ນ 0,38%, ຍ້ອນແມ່ນການນໍາເຂົ້າສິນຄ້າອຸປະໂພກ ແລະບໍລິໂພກເປັນສ່ວນໃຫຍ່ ແລະເຮັດໃຫ້ເງິນຕາແຂງຄ່າຂຶ້ນ, ດັ່ງນັ້ນຈຶ່ງເປັນສາເຫດທີ່ເຮັດໃຫ້ອັດຕາເງິນເຟີ້ເພີ່ມຂຶ້ນ.

ສໍາລັບການເກັບລາຍຮັບເຂົ້າງົບປະມານໝົດປີ 2021 ປະຕິບັດໃຫ້ໄດ້  1.328,61 ຕື້ກີບ, ທຽບໃສ່ໄລຍະດຽວປະຕິບັດໄດ້ 100,82% ແລະທຽບໃສ່ແຜນປີປະຕິບັດໄດ້ 88,2%, ໃນນັ້ນລາຍຮັບຂອງສູງກາງ 683,29 ຕື້ກີບ, ເທົ່າກັບ 90,5% ຂອງແຜນປີ ແລະລາຍຮັບຂອງແຂວງ645,31 ຕື້ກີບ, ເທົ່າກັບ 85,84% ຂອງແຜນປີ.

แชร์