ລາວທົດສອບຄວາມພ້ອມຮັບນັກທ່ອງທ່ຽວຕ່າງປະເທດ

ວັນທີ 30 ທັນວາ 2021, ກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວຮ່ວມກັບກະຊວງສາທາລະນະສຸກ, ເຈົ້າໜ້າທີ່ຕຳຫຼວດກວດຄົນເຂົ້າເມືອງ. ໄດ້ເຮັດຝຶກແອບຕົວຈິງ ໃນການຕ້ອນຮັບນັກທ່ອງທ່ຽວທີ່ຈະເດີນທາງມາທ່ອງທ່ຽວໃນເຂດທ່ອງທ່ຽວສີຂຽວ, ຊຶ່ງຈັດຂຶ້ນຢູ່ສະໜາມບິນສາກົນວັດໄຕ.

ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ,ວັດທະນະທໍາ ແລະທ່ອງທ່ຽວໃຫ້ຮູ້ວ່າ: ການຝຶກຊ້ອມໃນຄັ້ງນີ້ເພື່ອເບິ່ງຄວາມພ້ອມຂອງທຸກຂະແໜງການໂດຍສະເພາະການກວດຄົນເຂົ້າ-ອອກເມືອງຂອງເຈົ້າໜ້າທີ່ຂະແໜງການຕ່າງໆ ເຊັ່ນກະຊວງການຕ່າງປະເທດ, ມີຄວາມພ້ອມການອອກວີຊ່າ, ກະຊວງ ສາທາລະນະສຸກມີຄວາມພ້ອມໃນການກວດ ແລະຮັກສາສຸຂະພາບຂອງນັກທ່ອງທ່ຽວ ແລະຂະແໜງການທີ່ກ່ຽວຂ້ອງອື່ນໆຕື່ມອີກ, ການຝຶກຊ້ອມການຕ້ອນຮັບນັກທ່ອງທ່ຽວຢູ່ສະໜາມບິນສາກົນວັດໄຕ, ການເຝຶກຊ້ອມຂັ້ນຕອນຕ້ອງຮັບນັກທ່ອງທ່ຽວເມື່ອນັກທ່ອງທ່ຽວມາເຖິງໂຮງແຮມ, ຂັ້ນຕອນໃນກໍລະນີນັກທ່ອງທ່ຽວມີຜົນກວດອອກມາເປັນບວກ, ແລະຂັ້ນຕອນອື່ນໆ ເພື່ອສ້າງຄວາມໝັ້ນໃຈໃຫ້ນັກທ່ອງທ່ຽວ.  

ພ້ອມດຽວກັນນັ້ນຍັງໄດ້ເນັ້ນໜັກໃຫ້ແຕ່ລະແຂວງໃຫ້ຝຶກອົບຮົມພະນັກງານດ້ານບໍລິການທີ່ກ່ຽວຂ້ອງໃຫ້ໄດ້ຕາມເງື່ອນໄຂທີ່ລັດຖະບານວາງອອກ, ໂດຍຈະທົດລອງເປີດ 3 ແຂວງກ່ອນຄື:  ນະຄອນຫຼວງວຽງຈັນ, ຫຼວງພະບາງ ແລະເມືອງວັງວຽງ ແຂວງວຽງຈັນ, ຍ້ອນວ່າ 3 ແຂວງນີ້ ໄດ້ຮັບຄວາມນິຍົມຈາກນັກທ່ອງທ່ຽວຫຼາຍໂດຍໃຫ້ນັກທ່ອງທ່ຽວມາທ່ຽວເປັນຄະນະ ແລະປະຕິບັດຕາມລາຍການທີ່ກໍານົດໄວ້ເທົ່ານັ້ນ, ເຂດທ່ອງທ່ຽວສີຂຽວແມ່ນເຂດທ່ອງທ່ຽວປອດຈາກພະຍາດໂຄວິດ-19 ຫຼື ມີລະບາດນ້ອຍເປັນເຂດທີ່ມີການທ່ອງທ່ຽວຂະຫຍາຍຕົວສູງຂອງປະເທດເຮົາ.

แชร์