ນັກສຶກສາວິທະຍາໄລໄຊສົມບັດເຕັກໂນໂລຊີ 300 ກວ່າຄົນ ພ້ອມຮັບໃຊ້ສັງຄົມ

ນັກສຶກສາວິທະຍາໄລໄຊສົມບັດເຕັກໂນໄລຊີສະຫວັນນະເຂດປີສຸດທ້າຍຈໍານວນ 316 ຄົນ ໃນນີ້ມີຍິງ 101 ຄົນ ໄດ້ເຂົ້າຮ່ວມໃນການຮັບໃບປະກາສະນິຍະບັດພາຍຫຼັງທີ່ຮຽນຈົບຄົບຕາມຫຼັກສູດຂອງການຮຽນ-ການສອນເປັນ ເວລາ 3 ປີ ຊຶ່ງພິທີມອບ-ຮັບໄດ້ຈັດຂຶ້ນໃນວັນທີ 23 ທັນວາ 2021 ໂດຍມີທ່ານ ພິມມະສອນ ວໍລະຍຸດ ຮອງຫົວໜ້າພະແນກສຶກສາທິການ ແລະກີລາແຂວງສະຫວັນນະເຂດ, ທ່ານ ສຸກສະຫວັນ ໄຊສົມບັດ ຫົວໜ້າສະຖາບັນໄຊສົມບັດເຕັກໂນໂລຊີຮ່ວມກັນໃຫ້ກຽດມອບໃບປະກາສະນິຍະບັດໃຫ້ນັກສຶກສາຢ່າງສົມກຽດ, ຊຶ່ງພາຍໃຕ້ການເປັນສັກຂີພິຍານຂອງຂະແໜງອາຊີວະສຶກສາ ແລະຝຶກອົບຮົມວິຊາຊີບພະແນກສຶກສາທິການ ແລະກີລາແຂວງ, ບັນດາຄະນະອໍານວຍການວິທະຍາໄລ-ຄູ-ອາຈານ ແລະນັກສຶກສາ.

ໃນບົດສະຫຼຸບຂອງອາຈານ ສີສະຫວາດ ໄຊສົມບັດ ຮອງຜູ້ອໍານວຍການສະຖາບັນໄຊສົມບັດເຕັກໂນໂລຊີທີ່ສະຫຼຸບການຈັດຕັ້ງປະຕິບັດແຜນການຮຽນ-ການສອນ ແລະວັດປະເມີນຜົນຂອງວິທະຍາໄລໃນສົກຮຽນ 2020-2021 ເຫັນວ່າ: ພາຍໃນວິທະຍາໄລໄດ້ດໍາເນີນການຮຽນ-ການສອນ ແຕ່ລະສາຂາວິຊາຮຽນ ແລະກໍ່ໄດ້ຈັດຕັ້ງການສອບເສັງພາກຮຽນ 1 ແລະພາຮຽນ 2 ເປັນປົກກະຕິອັນໄດ້ເຮັດໃຫ້ນັກສຶກສາຈໍານວນ 316 ຄົນ ໄດ້ຮັບໃບປະກາສະນິບັດໃນທຸກສາຂາວິຊາໃນນີ້ມີການວັດປະເມີນຜົນການຮຽນຂອງນັກສຶກສາປີ 3 ຜ່ານການສອບເສັງໄດ້ດັ່ງນີ້ປະເພດ A ມີ 7 ຄົນ; ປະເພດ B+ ມີ 12 ຄົນ, ປະເພດB ມີ 38 ຄົນ, ປະເພດC+ ມີ 160 ຄົນ, ປະເພດ C ມີ 99 ຄົນ.

ວິທະຍາໄລໄຊສົມບັດເຕັກໂນໂລຊີໄດ້ຮັບການອະນຸມັດຈາກກະຊວງສຶກສາທິການ ແລະກີລາເລກທີ 3111/ສສກ, ລົງວັນທີ 11 ສິງຫາ 2021 ໃນນີ້ໃຫ້ຍົກຖານະ ຈາກວິທະຍາໄລກາຍເປັນສະຖາບັນໄຊສົມບັດເຕັກໂນໂລຊີອັນໄດ້ເຮັດໃຫ້ສະຖາບັນໄຊສົມບັດມີຄວາມພ້ອມໃນທຸກດ້ານໂດຍສະເພາະຄູ-ອາຈານມີທັງໝົດ 50 ທ່ານ, ຍິງ 17 ທ່ານ, ວຸດທິການສຶກສາປະລິນຍາເອກ 4 ທ່ານ, ຍິງ 2 ທ່ານ, ປະລິນຍາໂທ 9 ທ່ານ, ຍິງ 1 ທ່ານ; ປະລິນຍາຕີ 28 ທ່ານ, ຍິງ 11 ທ່ານ, ຊັ້ນສູງ 7 ທ່ານ, ຍິງ 3 ທ່ານ, ຊັ້ນກາງ 2 ທ່ານ ແລະກໍາລົງຄົ້ນຄວ້າປະລິນຍາໂທ 2 ທ່ານ ແລະຊັ້ນສູງ 1 ທ່ານປະຈຸບັນມີນັກສຶກສາທັງໝົດ 616 ຄົນ, ຍິງ 189 ຄົນ.

แชร์