ເຊັນສັນຍາກໍ່ສ້າງສະໜາມຂີ້ເຫຍື້ອເມືອງທ່າແຂກ

ພິທີດັ່ງກ່າວໄດ້ຈັດຂຶ້ນໃນວັນທີ 24 ທັນວາ 2021 ທີ່ຫ້ອງປະຊຸມພະແນກ ຍທຂ ແຂວງຄຳມ່ວນ ລະຫວ່າງພະແນກໂຍທາທິການ ແລະຂົນສົ່ງແຂວງໃນນາມເຈົ້າຂອງໂຄງການໃຫ້ກຽດລົງນາມໂດຍທ່ານ ພິດສະໄໝ ກອງຊາເດດ ຫົວໜ້າພະແນກໂຍທາທິການ ແລະຂົນສົ່ງແຂວງກັບບໍລິສັດລາວມີໄຊກໍ່ສ້າງຈຳກັດຜູ້ດຽວ, ບໍລິສັດກໍ່ສ້າງທາງເລກ 8, ບໍ ລິສັດໄຕເຈື່ອງເຊິນກໍ່ສ້າງຈຳກັດຜູ້ດຽວໃນນາມຜູ້ຮັບເໝົາກໍ່ສ້າງຕາງໜ້າລົງນາມໂດຍທ່ານ ສີພັນ ດອນມີໄຊ ປະທານບໍລິສັດມີໄຊກໍ່ສ້າງຈຳກັດຜູ້ດຽວເປັນກຽດເຂົ້າຮ່ວມເປັນສັກຂີພິຍານຄັ້ງນີ້ໂດຍ ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການແລະຂົນສົ່ງ, ທ່ານ ປອ. ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນພ້ອມດ້ວຍພາກສ່ວນຕາງໜ້າຂະແໜງການກ່ຽວຂ້ອງເຂົ້າຮ່ວມ.

ໂຄງການພັດທະນາຕົວເມືອງຕາມແລວອານຸພາກພື້ນແມ່ນໍ້າຂອງ 4 ຫຼື  (GMS 4) ແມ່ນໄດ້ຮັບທຶນຊ່ວຍເຫຼືອລ້າຈາກທະນາຄານພັດທະນາອາຊີຊຶ່ງປະກອບມີ 2 ຕົວເມືອງຄື: ເມືອງປາກຊັນ ແຂວງບໍລິຄໍາໄຊ ແລະເມືອງທ່າແຂກແຂວງຄຳມ່ວນ, ມີມູນຄ່າທັງໝົດ 54 ລ້ານກວ່າໂດລາສະຫະລັດ, ໃນນັ້ນທຶນທະນາຄານພັດທະນາອາຊີ 48 ລ້ານໂດລາສະຫະລັດ ແລະລັດຖະບານ ສປປ ລາວ 6 ລ້ານກວ່າໂດລາສະຫະລັດ, ໃນເບື້ອງຕົ້ນໂຄງການດັ່ງກ່າວແມ່ນມີໄລຍະເວລາ 5 ປີ (2019–2023) ແຕ່ເນື່ອງຈາກມີການແຜ່ລະບາດຂອງພະຍາດໂຄວິດ-19 ຜູ້ໃຫ້ທຶນຈຶ່ງໄດ້ອະນຸມັດຕໍ່ສັນຍາໂຄງການເພີ່ມຕື່ມຮອດເດືອນ 6 ປີ 2026 ສຳລັບຕົວເມືອງທ່າແຂກມູນຄ່າຄາດຄະເນຈະໄດ້ຮັບແມ່ນ 26,82 ລ້ານໂດລາສະຫະລັດ ແລະທຶນດັ່ງກ່າວຈະໄດ້ນໍາໃຊ້ເຂົ້າໃນ 5 ກິດຈະກໍາຄື: ກໍ່ສ້າງຮ່ອງລະບາຍນໍ້າໃນຕົວເມືອງ, ກໍ່ສ້າງອ່າງບໍາບັດນໍ້າເປື້ອນແບບບໍ່ລວມສູນຂະໜາດນ້ອຍ, ປັບປຸງສະໜາມກຳຈັດຂີ້ເຫຍື້ອແບບສຸຂະອະນາໄມ, ກໍ່ສ້າງປ້ອງກັນຕະຝັ່ງເຈື່ອນຕາມແມ່ນໍ້າຂອງ, ປັບປຸງຟື້ນຟູບູລະນະໃຈກາງຕົວເມືອງເກົ່າ ແລະອະນຸລັກມໍລະດົກຂອງຕົວເມືອງ, ສຳລັບໂຄງການກໍ່ສ້າງສະໜາມຂີ້ເຫຍື້ອຕົວເມືອງທ່າແຂກແຂວງຄຳມ່ວນທີ່ໄດ້ລົງນາມໃນຄັ້ງນີ້ແມ່ນມີມູນຄ່າທັງໝົດ 3.5 ລ້ານກວ່າໂດລາສະຫະລັດ ຊຶ່ງບໍ່ລວມອາກອນມູນຄ່າເພີ່ມ 10%.

ຂ່າວ: ມະນີວັນ

แชร์