ຫວຽດນາມ-ກຳປູເຈຍຊຸກຍູ້ການຮ່ວມມືຫຼາຍດ້ານ

ທ່ານ ຫງວຽນ ຊວັນຟຸກ ປະທານປະເທດ ສສ ຫວຽດນາມ ໄດ້ພົບປະກັບທ່ານ ຮຸນເຊນນາ ຍົກລັດຖະມົນຕີກຳປູເຈຍໂດຍທັງສອງຝ່າຍໄດ້ອອກຖະແຫຼງການຮ່ວມຫວຽດນາມ-ກຳປູເຈຍ ເປັນເຫດການເປີດສາກໃຫ້ “ປີມິດຕະພາບຫວຽດນາມ-ກຳປູເຈຍ, ກຳປູເຈຍ-ຫວຽດນາມ 2022”.

ຕາມຂ່າວສານຫວຽດນາມລາຍງານວ່າເພື່ອມຸ່ງໄປສູ່ຂິດໝາຍສຳຄັນນີ້ທັງສອງຝ່າຍໄດ້ຕົກລົງເຫັນດີເປັນເອກະພາບກັນເພີ່ມທະວີການພົບປະຜູ້ແທນຂັ້ນສູງ, ແລກປ່ຽນຄະນະຜູ້ແທນທຸກຂັ້ນ; ສົ່ງເສີມການເຄື່ອນໄຫວພົວພັນແລກປ່ຽນລະຫວ່າງປະຊາຊົນ,ເພີ່ມທະວີການໂຄສະນາ, ສຶກສາໃຫ້ປະຊາຊົນກ່ຽວກັບມູນເຊື້ອສາມັກຄີ, ມິດຕະພາບ ແລະຄວາມໄວ້ເນື້ອເຊື່ອໃຈລະຫວ່າງ 2 ຊາດ, ນອກຈາກນີ້ຍັງເພີ່ມທະວີການຮ່ວມມືທາງດ້ານການປ້ອງກັນຊາດ-ປ້ອງກັນຄວາມສະຫງົບ; ຍົກສູງປະສິດທິຜົນວຽກງານຄຸ້ມຄອງປ້ອງກັນຊາຍແດນ; ສືບຕໍ່ພະຍາຍາມສົມທົບກັນຊອກຫາ, ຂຸດຄົ້ນ, ສົ່ງອັດຖິທະຫານອາສາສະໝັກ ແລະນັກຊ່ຽວຊານຫວຽດນາມທີ່ເສຍສະຫຼະຊີວິດຢູ່ກຳປູເຈຍກັບ ຄືນປະເທດ, ພ້ອມດຽວກັນນີ້ທັງ ສອງຝ່າຍໄດ້ເນັ້ນໜັກເຖິງຄວາມ ສຳຄັນຂອງການສົມທົບກັນຮັບມື ກັບຜົນກະທົບທາງດ້ານການແພດ, ເສດຖະກິດ ແລະສັງຄົມຈາກໂລກລະບາດໂຄວິດ-19, ຊຸກຍູ້ການແລກປ່ຽນມຸ່ງໄປເຖິງການຮັບຮອງເຊິ່ງກັນ ແລະກັນກ່ຽວກັບໜັງສືຜ່ານແດນວັກແຊງ, ໃບຢັ້ງຢືນສັກວັກແຊງປ້ອງກັນໂຄວິດ-19.

ຂະນະດຽວກັນທັງສອງຝ່າຍຍັງໄດ້ເນັ້ນໜັກເຖິງຫຼັກໝັ້ນລວມຂອງອາຊຽນກ່ຽວກັບຄວາມສຳຄັນຂອງການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ, ຄວາມປອດໄພ, ຄວາມເສລີໃນການເດີນເຮືອ ແລະການບິນຢູ່ທະເລຕາເວັນອອກ, ຊຸກຍູ້ການເຈລະຈາ ແລະການສ້າງຄວາມໄວ້ເນື້ອເຊື່ອໃຈ, ປະຕິບັດກົດໝາຍສາກົນ, ແກ້ໄຂ ການຂັດແຍ່ງກັນໂດຍສັນຕິວິທີ, ສອດຄ່ອງກັບກົດໝາຍສາກົນຢ່າງເຂັ້ມແຂງ.

แชร์