ທິດາຈັນ ວິສີສົມບັດ ຄວ້າມຸງກຸດນາງສາວລາວ 2021

ສຳເລັດຜົນເປັນທີ່ຮຽບຮ້ອຍແລ້ວສຳລັບງານປະກວດນາງສາວລາວ ປະຈຳປີ 2021 (Miss Laos 2021) ຊຶ່ງຈັດຂຶ້ນເມື່ອຄໍ່າຄືນຂອງວັນທີ 25 ທັນວາ 2021 ໂດຍສາວງາມຜູ້ທີ່ຄວ້າໄດ້ຕຳແໜ່ງ ແລະຄອບຄອງມຸງກຸດແຫ່ງກຽດຕິຍົດໄດ້ແກ່ ML10 ນາງ ທິດາຈັນ ວິສີສົມບັດ ສາວງາມຈາກນະຄອນຫຼວງວຽງຈັນ.


ງານປະກວດນາງສາວລາວປະຈຳປີ 2021 ຈັດຂຶ້ນໂດຍ ບໍລິສັດ ຄົມປັນຍາ ເອັນເຕີຣ໌ເທັນເມັນ ອີເວັ້ນ ແອນ ອໍແກ ໄນເຊີຣ໌ ຈຳກັດ ຊີ້ນຳໂດຍສູນກາງຊາວໜຸ່ມປະຊາຊົນປະຕິວັດລາວໂດຍການເຂົ້າຮ່ວມຂອງ ທ່ານ ນາງ ສິຣິກິດ ບຸບຜາ ຮອງປະທານສູນກາງສະຫະພັນແມ່ຍິງລາວພ້ອມດ້ວຍຜູ້ຊົງຄຸນວຸດທິແຂກຖືກເຊີນຜູ້ໃຫ້ການສະໜັບສະໜູນ ແລະພາກສ່ວນທີ່ກ່ຽວຂ້ອງ.


ນາງ ທິດາຈັນ ວິສີສົມບັດ ນາງສາວລາວ ປະຈຳປີ 2021 ໂດດເດັ່ນດ້ວຍຄວາມງາມທີ່ເປັນເອກະລັກມີຄວາມຮູ້ຄວາມສາມາດ ແລະກ້າສະແດງອອກຈິ່ງສາມາດເອົາຊະນະໃຈກຳມະການ ແລະຄວ້າໄດ້ຕຳແໜ່ງແຫ່ງກຽດຕິຍົດມາຄອງສຳລັບຮອງອັນດັບທີ 1 ໄດ້ແກ່ ML8 ນາງ ກັນລະຍາ ໂຄດໂຍທາ ຮອງອັນດັບທີ 2 ໄດ້ແກ່ ML13 ນາງ ເມກຂະຫຼາ ຈະເລີນໄຊ ຮອງອັນດັບທີ 3 ໄດ້ແກ່ ML2 ນາງ ພອນສະຫວັນ ກັນຫາໄຊ ແລະຮອງອັນ ດັບທີ 4 ໄດ້ແກ່ ML 30 ນາງ ພິລະໜິງ ພູມມີ.


ນອກຈາກຕຳແໜ່ງນາງສາວລາວ ປະຈຳປີ 2021 ແລະຮອງທັງ 4 ແລ້ວ ຍັງມີລາງວັນພິເສດອີກຫຼວງຫຼາຍຊຶ່ງໜຶ່ງໃນລາງວັນທີ່ສຳຄັນນັ້ນກໍຄືຊຸດປະຈຳແຂວງດີເດັ່ນ ຊຶ່ງຈັດປະກວດຂຶ້ນໃນຄໍ່າຄືນຂອງວັນທີ 24 ທັນວາ 2021 ສຳລັບຊຸດທີ່ຊະນະເລີດໄດ້ແກ່ ML15 ຊຸດ ສະຕີມົ້ງແຫ່ງຍຸກສະໄໝ ແຂວງໄຊສົມບູນ ML25 ຊຸດສາວເມີ້ຍງາມໂສພາ ແຂວງບໍລິຄຳໄຊ ML30 ຊຸດຫຼວງພະບາງເມືອງງາມ ແຂວງຫຼວງພຣະບາງ ML10 ຊຸດທິດາຜາສາດເຜິ້ງ ນະຄອນຫຼວງວຽງຈັນ ML12 ຊຸດຜ້າຄາມງາມສະຫວັນ ສະຫວັນນະເຂດ ML18 ຊຸດເອກະລັກເຜົ່າກຣຽງລືນາມ ແຂວງເຊກອງ ຊຶ່ງຊຸດທີ່ຊະນະແມ່ນໄດ້ຮັບລາງວັນຊຸດລະ 5 ລ້ານກີບ ຈາກທະນາຄານ ພັດທະນາລາວ (LDB) ນອກນັ້ນຍັງມີອີກ 8 ຊຸດທີ່ໄດ້ຮັບລາງວັນຊົມເຊີຍຊຸດປະຈຳແຂວງດີເດັ່ນຊຶ່ງໄດ້ຮັບເງິນລາງ ວັນ 1,5 ລ້ານກີບ ຈາກຜູ້ໃຫ້ການສະໜັບ ສະໜູນ.

แชร์