ຮອງປະທານປະເທດເຄື່ອນໄຫວວຽກທີ່ຫຼວງນໍ້າທາ

ຂ່າວ: ຫ້ອງວ່າການສູນກາງພັກ


ທ່ານ ບຸນທອງ ຈິດມະນີ ຮອງ ປະທານປະເທດ ພ້ອມຄະນະໄດ້ໄປເຄື່ອນ ໄຫວຢ້ຽມຢາມ ແລະເຮັດວຽກຢູ່ແຂວງ ຫຼວງນໍ້າທາ ໃນວັນທີ 22 ທັນວາຜ່ານ ມາ ໂດຍມີທ່ານ ຄຳໄຫຼ ສີປະເສີດ ເຈົ້າແຂວງຫຼວງນໍ້າທາ, ພ້ອມທັງການນຳ ຂອງແຂວງໃຫ້ການຕ້ອນຮັບ.
ໃນການຢ້ຽມຢາມແຂວງຫຼວງນໍ້າທາຄັ້ງນີ້ ທ່ານ ບຸນທອງ ຈິດມະນີ ໄດ້ໃຫ້ກຽດໂອ້ລົມການນຳ ແລະພະນັກງານ ຫຼັກແຫຼ່ງຂອງແຂວງ ຊຶ່ງທ່ານ ຄຳໄຫຼ ສີປະເສີດ ໄດ້ລາຍງານ ສະພາບການພັດທະນາຂອງແຂວງໂດຍຫຍໍ້ ໂດຍສະເພາະແຜນພັດທະນາເສດ ຖະກິດ-ສັງຄົມ ຈະໄດ້ສຸມໃສ່ຈັດຕັ້ງປະ ຕິບັດເປົ້າໝາຍຕົ້ນຕໍ, ວຽກງານຈຸດສຸມ, ການຈັດຕັ້ງຜັນຂະຫຍາຍ 2 ວາລະ ແຫ່ງຊາດຄື: ການແກ້ໄຂຄວາມຫຍຸ້ງ ຍາກດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດ.
ສ່ວນວຽກງານພັກ-ພະນັກງານ ແລະວຽກງານກວດກາພາຍຫຼັງສໍາເລັດການ ດໍາເນີນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ໄດ້ສຸມໃສ່ປັບປຸງກົງຈັກການຈັດຕັ້ງ, ປັບປຸງ-ກໍ່ສ້າງພັກ, ຄົ້ນຄວ້າບັນຈຸສັບຊ້ອນໜ້າທີ່ວຽກງານເປັນຕົ້ນແມ່ນໄດ້ສ້າງຕັ້ງຄະນະພັກ ຮາກຖານໃໝ່, ສ້າງຕັ້ງໜ່ວຍພັກເອກະ ລາດ ແລະໜ່ວຍພັກຂຶ້ນກັບຄະນະພັກ ຮາກຖານຈໍານວນໜຶ່ງ.
ມາຮອດປະຈຸບັນ, ແຂວງຫຼວງນໍ້າທາ ມີ 5 ອົງຄະນະພັກເມືອງ, 2 ຄະນະພັກ ກອງບັນຊາການ ປກຊ-ປກສ ແຂວງ, ມີ 90 ຄະນະພັກຮາກຖານ, 677 ໜ່ວຍພັກ; ມີສະມາຊິກພັກທັງໝົດ 12.833 ສະຫາຍ ຍິງ 3.583 ສະຫາຍ, ທຽບໃສ່ປີ 2020 ເພີ່ມຂຶ້ນ 101 ສະຫາຍ ຍິງ 28 ສະຫາຍ; ມີໜ່ວຍພັກປອດໃສ, ເຂັ້ມແຂງ, ໜັກແໜ້ນ 557 ໜ່ວຍພັກ ເທົ່າກັບ 83% ຂອງຈໍານວນໜ່ວຍພັກທັງໝົດ.
ໃນໂອກາດນີ້ ທ່ານ ບຸນທອງ ຈິດມະນີ ໄດ້ໃຫ້ທິດຊີ້ນຳ ໂດຍໄດ້ເນັ້ນໃຫ້ຄະນະພັກຄະນະນຳຂອງແຂວງຕ້ອງເປັນ ຫົວຈັກຫຼັກແຫຼ່ງເພື່ອຊີ້ນຳ-ນຳພາ ໃຫ້ແທດເຖິງໃນທຸກຂົງເຂດວຽກງານ, ສືບຕໍ່ເອົາໃຈໃສ່ໃນວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອເຮັດໃຫ້ສັງ ຄົມມີຄວາມສະຫງົບໜັກແໜ້ນ, ເອົາໃຈ ໃສ່ຈັດຕັ້ງປະຕິບັດວາລະແຫ່ງຊາດວ່າ ດ້ວຍການແກ້ໄຂບັນຫາຢາເສບຕິດ, ແກ້ໃຫ້ໄດ້ຕໍ່ກັບຜູ້ຜະລິດ, ຜູ້ຂາຍ, ຜູ້ເສບ ແລະຜູ້ມີສ່ວນຮູ້ຮ່ວມຄິດໃນຂະບວນການ ຄ້າ-ຂາຍຢາເສບຕິດ, ສືບຕໍ່ເອົາໃຈໃສ່ ວຽກງານປັບປຸງກຳລັງທະຫານ ຕຳຫຼວດ ແລະກຳລັງສຳຮອງ, ເອົາໃຈໃສ່ ວຽກງານການພັດທະນາດ້ານເສດຖະກິດ ນັ້ນກໍຄືສືບຕໍ່ເຊື່ອມຊຶມຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມ ຫຍຸ້ງຍາກທາງດ້ານເສດຖະກິດ ການເງິນ, ໂດຍຍູ້ແຮງການຜລິດເປັນສິນຄ້າ ແລະນຳໃຊ້ທ່າແຮງບົ່ມຊ້ອນທີ່ມີໃນທ້ອງຖິ່ນ.
ໃນໂອກາດັ່ງກ່າວນີ້ທ່ານ ບຸນທອງ ຈິດມະນີ ໄດ້ມອບອຸປະກອນການຮຽນ ລວມມີ ຖົງ, ສໍດຳ, ປຶ້ມການຮຽນ-ການສອນ, ລົດຖີບໃຫ້ແຂວງ ເພື່ອນຳໄປມອບ ຕໍ່ໃຫ້ບັນດາໂຮງຮຽນທີ່ຍັງຂາດເຂີນ, ພ້ອມທັງມອບຜ້າຫົ່ມ ແລະອຸປະກອນຮັບໃຊ້ໃນການປ້ອງກັນພະຍາດໂຄວິດ-19 ນຳອີກ.
ໃນໂອກາດຢ້ຽມຢາມແຂວງຫຼວງນໍ້າທາຄັ້ງນີ້ທ່ານ ບຸນທອງ ຈິດມະນີ ພ້ອມຄະນະ ໄດ້ໄປຢ້ຽມດ່ານສາກົນບໍ່ເຕ່ນ (ຈຸດກວດກາດ່ານເຂົ້າ-ອອກ), ສູນຈຳກັດບໍລິເວນ ແລະໂຮງໝໍພາກສະໜາມ ໃຊ້ປິ່ນປົວຜູ້ຕິດເຊື້ອໂຄ-19 ແລະຢ້ຽມ ຊົມສະຖານີລົດໄຟບໍ່ເຕ່ນຕື່ມອີກ.

แชร์