IMF ຄາດວ່າປີໜ້າເສດຖະກິດລາວຈະເຕີບໂຕ 3%

ເສດຖະກິດຂອງ ສປປ ລາວ ກໍ່ຄືຫຼາຍປະເທດໃນທົ່ວໂລກເເມ່ນໄດ້ຮັບຜົນກະທົບຈາກການເເຜ່ລະບາດໂຄວິດ-19 ສົ່ງຜົນໃຫ້ການຂະຫຍາຍຕົວຂອງເສດ ຖະກິດມີຈັງຫວະທີ່ຊ້າລົງ ຂະນະທີ່ປີ 2021 ນີ້ IMF ຄາດວ່າ ເສດຖະກິດ ສປປ ລາວ ຈະຂະຫຍາຍຕົວໃນອັດຕາ 2,1% ແລະຈະເພີ່ມເປັນ 3% ໃນປີ 2022 ໂດຍມີຂະເເໜງກະສິກໍາ ແລະອຸດສາຫະກໍາເປັນຕົວຂັບເຄື່ອນການຂະຫຍາຍຕົວ.
ໃນວັນທີ 21-22 ທັນວາ 2021 ຜ່ານມາ, ຄະນະຜູ້ວ່າການທະນາຄານແຫ່ງ ສປປ ລາວ ນໍາໂດຍທ່ານ ສອນໄຊ ສິດພະໄຊ, ຜູ້ວ່າການທະນາຄານແຫ່ງ ສປປ ລາວ, ພ້ອມດ້ວຍຄະນະນໍາຈາກຂະແໜງ ການທີ່ກ່ຽວຂ້ອງໄດ້ສໍາເລັດການເຂົ້າ ຮ່ວມຮັບຟັງຜົນການປະເມີນເສດຖະກິດ ມະຫາພາກຂອງ ສປປ ລາວ ພາຍໃຕ້ມາດຕາ IV ຂອງກອງທຶນການເງິນ ສາກົນປະຈຳປີ 2021 ຜ່ານລະບົບ ທາງໄກ (IMF Article IV Consultation 2021).
ການປະເມີນເສດຖະກິດມະຫາພາກ ສປປ ລາວ ໃນປີ 2021 ໄດ້ຈັດຂຶ້ນຜ່ານກອງປະຊຸມທາງໄກໃນ ລະຫວ່າງວັນທີ 6-21 ທັນວາ 2021 ທີ່ຜ່ານມາ, ໃນນັ້ນ, ຄະນະຂອງ IMF ນໍາ ທີມໂດຍທ່ານ Alasdair Scott, ຫົວ ໜ້າທີມປະເມີນເສດຖະກິດມະຫາພາກ ຂອງ ສປປ ລາວ ຕາງໜ້າຈາກຫ້ອງການ IMF ສຳນັກງານໃຫຍ່ໄດ້ພົບປະ ເຮັດວຽກກັບພາກສ່ວນປິ່ນອ້ອມເສດ ຖະກິດມະຫາພາກຂອງ ສປປ ລາວ ເປັນຕົ້ນເເມ່ນທະນາຄານແຫ່ງ ສປປ ລາວ, ກະຊວງການເງິນ, ກະຊວງເເຜນການ ແລະການລົງທຶນ, ກະຊວງອຸດສາຫະກໍາ ແລະການຄ້າ, ກະຊວງພະລັງງານ ແລະບໍ່ແຮ່ ແລະບັນດາທະນາຄານທຸລະກິດ ຈໍານວນໜຶ່ງ ເພື່ອຕິດຕາມຄວາມຄືບໜ້າ ຂອງການຈັດຕັ້ງປະຕິບັດໜ້າວຽກຂອງ ແຕ່ລະພາກສ່ວນທີ່ໄດ້ປະກອບສ່ວນໃຫ້ ແກ່ການພັດທະນາເສດຖະກິດໂດຍລວມ ຂອງ ສປປ ລາວ.
ສຳລັບຜົນການປະເມີນເສດຖະກິດມະຫາພາກຂອງ ສປປ ລາວ ໃນຄັ້ງນີ້, IMF ໄດ້ສະຫຼຸບວ່າ: ເສດຖະກິດຂອງ ສປປ ລາວ ກໍ່ຄືຫຼາຍປະເທດໃນທົ່ວໂລກ ແມ່ນໄດ້ຮັບຜົນກະທົບຈາກການເເຜ່ລະ ບາດໂຄວິດ-19 ສົ່ງຜົນໃຫ້ການຂະຫຍາຍຕົວຂອງເສດຖະກິດມີຈັງຫວະທີ່ ຊ້າລົງ. ໃນປີ 2021, IMF ຄາດວ່າເສດ ຖະກິດ ສປປ ລາວ ຈະຂະຫຍາຍຕົວໃນ ອັດຕາ 2,1% ແລະຈະເພີ່ມເປັນ 3% ໃນປີ 2022 ໂດຍມີຂະເເໜງກະສິກໍາ ແລະອຸດສາຫະກໍາເປັນຕົວຂັບເຂື່ອນການ ຂະຫຍາຍຕົວ.
ພ້ອມນີ້, IMF ກໍ່ຍັງເຫັນວ່າການຂະຫຍາຍຕົວຂອງເສດຖະກິດ ສປປ ລາວ ຍັງມີບາງຄວາມສ່ຽງຈາກພາຍໃນ ແລະ ພາຍນອກທີ່ອາດສົ່ງຜົນຕໍ່ການຂະຫຍາຍ ຕົວຂອງເສດຖະກິດໃນໄລຍະຍາວເປັນ ຕົ້ນເເມ່ນອັດຕາເງິນເຟີ້ທີ່ເພີ່ມຂຶ້ນ, ອັດຕາ ເເລກປ່ຽນທີ່ມີຄວາມຜັນຜວນ ແລະອື່ນໆ.
ໃນໂອກາດນີ້, ທ່ານຜູ້ວ່າການທະນາຄານແຫ່ງ ສປປ ລາວ ກໍ່ໄດ້ສະເເດງທັດສະນະຢ່າງໜັກເເໜ້ນຕໍ່ກັບຄວາມຕັ້ງໃຈຂອງລັດຖະບານ ສປປ ລາວ ເວົ້າລວມ ເວົ້າສະເພາະກໍ່ຄືກະຊວງກ່ຽວຂ້ອງໃນ ການຮັບມືກັບບັນດາຄວາມສ່ຽງໃນດ້ານ ຕ່າງໆ ໂດຍສະເພາະແມ່ນການກຳນົດວາລະແຫ່ງຊາດ ເພື່ອຮັບປະກັນໃຫ້ການຂະ ຫຍາຍຕົວຂອງເສດຖະກິດດໍາເນີນໄປ ດ້ວຍຄວາມເຂັ້ມແຂງ ແລະຍືນຍົງທັງນີ້ ກໍ່ເພື່ອສ້າງຄວາມເຊື່ອໝັ້ນໃຫ້ສາກົນກໍ່ ຄືນັກລົງທຶນທັງພາຍໃນ ແລະຕ່າງປະ ເທດ.
ໃນທ້າຍກອງປະຊຸມ ທ່ານຜູ້ວ່າການ ທະນາຄານແຫ່ງ ສປປ ລາວ ໄດ້ກ່າວ ຄຳຂອບໃຈຕໍ່ທາງຫ້ອງການ IMF ພ້ອມດ້ວຍຄະນະທີ່ໄດ້ເອົາໃຈໃສ່ໃນການຕິດຕາມປະເມີນ ແລະໃຫ້ຄຳແນະນຳໃນການ ພັດທະນາເສດຖະກິດມະຫາພາກຂອງ ສປປ ລາວ, ພ້ອມທັງຕີລາຄາສູງກ່ຽວກັບການຊ່ວຍເຫຼືອທາງດ້ານວິຊາການ ຈາກກອງທຶນການເງິນສາກົນ ເພື່ອຂ້າງ ຂີດຄວາມອາດສາມາດໃນວຽກງານເສດ ຖະກິດມະຫາພາກໃນໄລຍະຜ່ານມາ.
ການມາປະເມີນສະພາບເສດຖະກິດ ພາຍໃຕ້ມາດຕາ IV ຂອງກອງທຶນການ ເງິນສາກົນແມ່ນວາລະສໍາຄັນທີ່ໄດ້ຈັດ ຕັ້ງປະຕິບັດໃນແຕ່ລະປີ ເພື່ອປະເມີນສະ ພາບເສດຖະກິດມະຫາພາກຂອງປະ ເທດສະມາຊິກ ພ້ອມທັງໃຫ້ຄໍາແນະນໍາ ໃນການສ້າງເຄື່ອງມື ແລະວາງນະໂຍ ບາຍຄຸ້ມຄອງເສດຖະກິດມະຫາພາກ ຂອງປະເທດໃຫ້ມີຄວາມເຂັ້ມແຂງ.

แชร์