ນະຄອນປາກເຊທຳລາຍສີນຄ້າໝົດອາຍຸ

ຂ່າວ:  ໂພທິລາດ

ຫ້ອງການອຸດສາຫະກໍາ ແລະການຄ້າ ນະຄອນປາກເຊ ແຂວງຈໍາປາສັກ ສືບຕໍ່ປະຕິບັດໜ້າທີ່ຢ່າງເຂັ້ມງວດໃນການກວດກາສິນຄ້າທີ່ມີຄວາມສ່ຽງຕໍ່ຜູ້ບໍລິໂພກເມື່ອຫລ້າສຸດໄດ້ຈັດພິທີທໍາລາຍສິນຄ້າໝົດອາຍຸທີ່ຢຶດມາໄດ້ຖິ້ມ ລວມມູນຄ້າ 7 ລ້ານກວ່າກີບ.

ໃນຕອນແລງຂອງວັນທີ 21 ທັນວາ 2021 ຫ້ອງການອຸດສາຫະກໍາ ແລະການຄ້ານະຄອນປາກເຊໄດ້ຈັດພິທີສີນຄ້າໝົດອາຍຸຂຶ້ນທີ່ສໍານັກງານອົງການປົກຄອງນະຄອນປາກເຊ, ໂດຍການເຂົ້າຮ່ວມເປັນສັກຂີພິຍານຂອງທ່ານ ບຸນເນົາ ຟອງຄໍາແດງ ຮອງເຈົ້າຄອງນະຄອນປາກເຊ, ມີທ່ານ ແກ້ວເພັດ ພັນທະມານ ຫົວໜ້າຫ້ອງການອຸດສາຫະກໍາ ແລະການຄ້ານະຄອນປາກເຊ ແລະບັນດາທ່ານທີ່ກ່ຽວຂ້ອງເຂົ້າຮ່ວມ.

ເຄື່ອງບໍລິໂພກທີ່ນໍາມາທໍາລາຍຖິ້ມໃນຄັ້ງນີ້ແມ່ນໄດ້ມາຈາກການລົງກວດຕາມຮ້ານຄ້າຕ່າງໆທົ່ວນະຄອນປາກເຊຂອງເຈົ້າໜ້າທີ່ການຄ້າຄະຄອນປາກເຊທີ່ໄດ້ລົງເຄື່ອນ ໄຫວແຕ່ວັນທີ 24 ມິຖຸນາ 2021 ຈົນມາຮອດປະຈຸບັນ, ຊຶ່ງໄດ້ ພົບສິນຄ້າໝົດອາຍຸເປັນຕົ້ນ: ແມ່ນເຄື່ອງ ບໍລິໂພກ-ອຸປະໂພກ ລວມມູນຄ່າ 7 ລ້ານກວ່າກີບ, ການທໍາລາຍຖິ້ມດັ່ງກ່າວແມ່ນເພື່ອເປັນການປະຕິບັດຕາມພາລະບົດບາດ, ສິດ ແລະໜ້າທີ່ຄວາມຮັບຜິດຊອບ, ຄວາມປອດໄພທາງດ້ານສຸຂະພາບຂອງຜູ້ບໍລິໂພກ ແລະອຸປະໂພກໃຫ້ໄດ້ຊົມໃຊ້ສິນຄ້າທີ່ມີຄຸນນະພາບ, ໄດ້ມາດຕາຖານ, ຖືກຕ້ອງ ແລະສອດຄ່ອງກັບລະບຽບກົດໝາຍ, ແນໃສ່ໃສ່ເຮັດໃຫ້ສັງຄົມມີຄວາມສະຫງົບປອດໄພ.

แชร์