ເດືອນກຸມພາປີ 2021, ໃນພິທີສະຫຼຸບຜົນການລຶບລ້າງຄວາມທຸກຍາກທົ່ວປະເທດຈີນ, ທ່ານສີຈິ້ນຜິງປະທານປະເທດຈີນໄດ້ປະກາດວ່າ: ການລຶບລ້າງຄວາມທຸກຍາກຂອງຈີນໄດ້ຮັບໄຊຊະນະຢ່າງຮອບດ້ານ. ແຕ່ໃນຂະນະດຽວກັນ, ທ່ານສີຈິ້ນຜິງກໍໄດ້ຊີ້ໃຫ້ເຫັນຢ່າງເຄັ່ງຂຶມວ່າ: “ການທີ່ໄດ້ຮັບໄຊຊະນະບໍ່ແມ່ນເລື່ອງຍາກທີ່ສຸດ, ການຮັກສາ ແລະເສີມຂະຫຍາຍໝາກຜົນຈຶ່ງແມ່ນເລື່ອງຍາກທີ່ສຸດ. ພວກເຮົາຕ້ອງປະຕິບັດວຽກງານດ້ານຕ່າງໆໃນການເຊື່ອມສານການປັບປຸງໝາກຜົນແຫ່ງການລຶບລ້າງຄວາມທຸກຍາກເຂົ້າກັບການພັດທະນາຊົນນະບົດໃຫ້ຈະເລີນຮຸ່ງເຮືອງຢ່າງມີປະສິດທິຜົນ, ເຮັດໃຫ້ພື້ນຖານຂອງການລຶບລ້າງຄວາມທຸກຍາກມີຄວາມໜັກແໜ້ນກວ່າເກົ່າ ແລະມີປະສິດທິຜົນທີ່ຍືນຍາວກວ່າເກົ່າ.” ໃນນັ້ນ, “ການຊຸກຍູ້ການປະກອບອາຊີບຜ່ານຫຼາຍຊ່ອງທາງ” ແມ່ນມາດຕະການສຳຄັນເພື່ອສະໜັບສະໜູນປະຊາຊົນຫຼັງຈາກຍົກຍ້າຍໄປຢູ່ບ່ອນທີ່ເໝາະສົມເພື່ອລຶບລ້າງຄວາມທຸກຍາກ.
ໃນປີ 2021 ນີ້, ທ່ານສີຈິ້ນຜິງໄດ້ເອົາໃຈໃສ່ຕິດຕາມບົດບາດຊຸກດັນຂອງການພັດທະນາອຸດສາຫະກຳທີ່ມີຕໍ່ການປະກອບອາຊີບ.
ວັນທີ 7 ມິຖຸນາປີ 2021, ໃນເວລາທ່ານສີຈິ້ນຜິງເດີນທາງໄປສຳຫຼວດກວດກາກຸ່ມບໍລິສັດຜ້າພົມເຊີ້ງຢວນແຂວງຊິ່ງໄຫຂອງຈີນ, ຜູ້ຮັບຜິດຊອບຂອງບໍລິສັດດັ່ງກ່າວແນະນຳໃຫ້ທ່ານສີຈິ້ນຜິງຮູ້ວ່າ: “ມີແມ່ຍິງຈຳນວນຫຼາຍທີ່ອາໄສຢູ່ບໍລິເວນໃກ້ຄຽງ, ໄດ້ຮັບການຝຶກອົບຮົມທີ່ຈັດໂດຍບໍລິສັດຂອງຕົນ, ຜ່ານເວລາບໍ່ເທົ່າໃດປີກໍສາມາດກາຍເປັນກຳມະກອນທີ່ຊຳນານງານ, ສະເລ່ຍແລ້ວເຂົາເຈົ້າໄດ້ເງິນເດືອນ 4000-5000 ຢວນຕໍ່ຄົນຕໍ່ເດືອນ.” ທ່ານສີຈິ້ນຜິງໄດ້ສະແດງຄວາມຍິນດີຕໍ່ເລື່ອງນີ້ວ່າ: “ການພັດທະນາອຸດສາຫະກຳຕ້ອງຊຸກຍູ້ການປະກອບອາຊີບ. ເມື່ອເບິ່ງຈາກດ້ານນີ້ແລ້ວ, ອຸດສາຫະກຳຜະລິດຜ້າພົມຕິເບດບໍ່ພຽງແຕ່ມີບົດບາດໃນການຫຼຸດຜ່ອນຄວາມທຸກຍາກ, ສ້າງລາຍຮັບໃຫ້ກັບປະຊາຊົນ ແລະຊຸກຊູ້ການພັດທະນາຂອງເຂດຊົນນະບົດເທົ່ານັ້ນ, ຍັງມີບົດບາດທີ່ຊຸກຍູ້ຄວາມສາມັກຄີແລະຄວາມປອງດອງຂອງຊົນເຜົ່າອີກດ້ວຍ.”
ໃນຊຸມປີມໍ່ໆມານີ້, ອຸດສາຫະກຳຜະລິດເຄື່ອງປັກແສ່ວເຜົ່າມົ້ງເມືອງປີ້ເຈແຂວງກຸ້ຍໂຈ່, ອາຫານພື້ນເມືອງເມືອງຊ່າຊ້ຽນແຂວງຟູຈ້ຽນ, ເຝີຫອຍລິວໂຈ່ເຂດກວາງຊີ ແລະ ຜະລິດຕະພັນອື່ນໆໄດ້ຮັບການພັດທະນາຢ່າງວ່ອງໄວ, ຢູ່ເບື້ອງຫຼັງແຫ່ງຄວາມຈະເລີນຮຸ່ງເຮືອງຂອງອຸດສາຫະກຳຂະໜາດນ້ອຍເຫຼົ່ານີ້, ໄດ້ສ່ອງແສງໃຫ້ເຫັນເຖິງພຶດຕິກຳຕົວຈິງທີ່ແຫ່ງຕ່າງໆຂອງຈີນໄດ້ປະສົມປະສານການບົ່ມເພາະອຸດສາຫະກຳ ແລະພັດທະນາວິສາຫະກິດເຂົ້າກັບການຊຸກຍູ້ການປະກອບອາຊີບຂອງປະຊາຊົນ,ພັດທະນາເຂດຊົນນະບົດໃຫ້ຈະເລີນຮຸ່ງເຮືອງ ແລະພັດທະນາເສດຖະກິດຮູບປະທຳຢ່າງມີການປະສານສົມທົບ ແລະຊ່ວຍຊູຍູ້ໜູນກັນ.
ໃນເດືອນພຶດສະພາປີ 2021, ໃນເວລາລົງເຄື່ອນໄຫວເຮັດວຽກຢູ່ບ້ານໂຈ່ຈ່ວງ ເມືອງຊີ່ຊ່ວນ ນະຄອນນານຢາງ ແຂວງເຫີນານ ທີ່ຢູ່ສາຍກາງຂອງໂຄງການສົ່ງນໍ້າພາກໃຕ້ໄປພາກເໜືອຈີນ, ທ່ານ ສີຈິ້ນຜິງ ກ່າວເນັ້ນຫນັກວ່າ: ຕ້ອງສືບຕໍ່ປະຕິບັດວຽກງານຊ່ວຍເຫຼືອປະຊາຊົນຜູ້ຍົກຍ້າຍຖິ່ນຖານ,ຊຸກຍູ້ການພັດທະນາຊົນນະບົດຢ່າງຮອບດ້ານ, ກຳແໜ້ນວຽກງານປູກຝັງ, ການຊອກວຽກເຮັດງານທຳຢູ່ຕ່າງຖິ່ນ ແລະ ພັດທະນາອຸດສາຫະກຳແບບໃໝ່ຢ່າງມີການປະສານສົມທົບກັນ, ນໍາໃຊ້ຫຼາຍມາດຕະກຳພ້ອມກັນເພື່ອສ້າງລາຍຮັບຜ່ານຫຼາຍຊ່ອງທາງ, ຮັບປະກັນໃຫ້ປະຊາຊົນຜູ້ຍົກຍ້າຍຖິ່ນຖານສາມາດດຳລົງຊີວິດຢ່າງມີຄວາມໝັ້ນທ່ຽງ, ສາມາດພັດທະນາ ແລະ ສ້າງຄວາມຮັ່ງມີຂຶ້ນໄດ້.
ໃນເວລາເປັນປະທານຈັດການຮ່ຳຮຽນຮ່ວມຄັ້ງທີ 28 ຂອງກົມການເມືອງສູນກາງພັກກອມມູນິດຈີນ, ທ່ານສີຈິ້ນຜິງໄດ້ກ່າວເນັ້ນຫນັກຕື່ມວ່າ: “ຕ້ອງປັບປຸງລະບຽບການກ່ຽວກັບແຮງງານຈາກຊົນນະບົດ, ຜູ້ປະກອບອາຊີບແບບບໍ່ຄົງທີ່, ແລະ ຜູ້ປະກອບອາຊີບໃນຂະແໜງການທີ່ເກີດຂຶ້ນໃໝ່ໄດ້ເຂົ້າຮ່ວມການປະກັນສັງຄົມໃຫ້ສົມບູນຂຶ້ນ.”
ຄືດັ່ງທີ່ສຸພາສິດຈີນລະບຸໄວ້ວ່າ: “ສາມາດກຳຖ້ວຍເຂົ້າໄດ້ໜັກແໜ້ນ, ພື້ນຖານແຫ່ງຊີວິດການເປັນຢູ່ຈຶ່ງຈະມີຄວາມໜັກແໜ້ນ.”
ນັບແຕ່ຕົ້ນປີ 2021 ນີ້ເປັນຕົ້ນມາ, ສະພາບການປະກອບອາຊີບຂອງຈີນໄດ້ຮັກສາທ່ວງທ່າທີ່ໝັ້ນທ່ຽງ, ຈຳນວນຜູ້ປະກອບອາຊີບໄດ້ເພີ່ມຂຶ້ນຢ່າງຕໍ່ເນື່ອງ, ໂຄງປະກອບດ້ານການປະກອບອາຊີບໄດ້ຮັບການປັບປຸງດີຂຶ້ນ, ຄຸນນະພາບແຫ່ງການປະກອບອາຊີບໄດ້ເພີ່ມຂຶ້ນຢ່າງພົ້ນເດັ່ນ. ນັບແຕ່ເດືອນມັງກອນ ຫາ ເດືອນຕຸລາປີນີ້, ຈຳນວນຜູ້ປະກອບອາຊີບທີ່ເພີ່ມໃໝ່ໃນຕົວເມືອງມີ 11,33 ລ້ານຄົນ, ເຊິ່ງໄດ້ສຳເລັດໜ້າທີ່ ແລະເປົ້າໝາຍຂອງໝົດປີ. ໃນທ້າຍໄຕມາດທີ 3, ແຮງງານຊົນນະບົດທີ່ໄປຊອກວຽກເຮັດງານທຳຢູ່ຕ່າງຖິ່ນມີຫຼາຍກວ່າ 183 ລ້ານຄົນ, ເພີ່ມຂຶ້ນ 2% ເມື່ອທຽບກັບໄລຍະດຽວກັນຂອງປີ 2020, ເຊິ່ງໄດ້ຟື້ນຟູຄືນສູ່ລະດັບເທົ່າກັບໄລຍະກ່ອນການແຜ່ລະບາດຂອງພະຍາດໂຄວິດ-19 ໂດຍພື້ນຖານ.
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |