ເຜີຍແຜ່ນະໂຍບາຍແຫ່ງຊາດດ້ານປະຊາກອນ ແລະການພັດທະນາ

 ກະຊວງແຜນການ ແລະການລົງທຶນ (ຜທ) ຮ່ວມກັບອົງການສະຫະປະຊາຊາດກອງທຶນສໍາລັບປະຊາກອນ(UNFPA) ປະຈໍາ ສປປ ລາວ ເຜີຍແຜ່ນະໂຍບາຍແຫ່ງຊາດດ້ານປະຊາກອນ ແລະການພັດທະນາ (2019-2030) ໃຫ້ບັນດາແຂວງພາກເໜືອ ຄື: ແຂວງຫຼວງພະບາງ, ບໍ່ແກ້ວ, ຫຼວງນໍ້າທາ, ໄຊຍະບູລີ, ອຸດົມໄຊ ແລະຜົ້ງສາລີ ເຜີຍແຜ່ໂດຍຜ່ານລະບົບວິດີໂອທາງໄກໃນວັນທີ 22 ທັນວາ 2021, ເປັນປະທານຮ່ວມໂດຍທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງ ຜທ, ທ່ານ ນາງ ສິລິພອນ ສຸພັນທອງ ຮອງເຈົ້າແຂວງຫຼວງພະບາງ ແລະທ່ານ ວິກເຕີ ເວລດິວີໂຊ (Victor Valdi vieso) ຮອງຜູ້ຕາງໜ້າອົງການ UNFPA ປະຈຳ ສປປ ລາວ.

ຜ່ານມາໄດ້ເຜີຍແຜ່ໃຫ້ບັນດາຂະແໜງການຂັ້ນສູນກາງ ແລະບັນດາແຂວງພາກກາງ ແລະພາກໃຕ້ແລ້ວ ແລະກອງປະຊຸມຄັ້ງນີ້ກໍ່ໄດ້ເນັ້ນໜັກ ແລະໃຫ້ຄວາມສໍາຄັນ ຂອງການເຊື່ອມສານນະໂຍບາຍແຫ່ງຊາດດ້ານປະຊາກອນ ແລະການພັດທະນາເຂົ້າໃນແຜນພັດທະນາຂອງຂະແໜງການ ແລະທ້ອງຖິ່ນໂດຍສະເພາະແມ່ນການສຸມໃສ່ພັດທະນາປະຊາກອນໜຸ່ມຊຶ່ງ ສປປ ລາວ ມີປະຊາກອນໜຸ່ມກວມຫຼາຍກວ່າເຄິ່ງໜຶ່ງຂອງປະຊາກອນທັງໝົດ; ຖ້າລັດຖະບານພັດທະນາກຸ່ມຄົນເຫຼົ່ານີ້ໃຫ້ກາຍເປັນກໍາລັງແຮງງານທີ່ມີຄຸນນະພາບຈະເຮັດໃຫ້ສາມາດໄດ້ຜົນປະໂຫຍດສູງສຸດໃນ ການປະກອບສ່ວນຊຸກຍູ້ການພັດທະນາເສດຖະກິດ-ສັງຄົມຂອງປະເທດ.

ນະໂຍບາຍແຫ່ງຊາດດ້ານປະຊາກອນ (NPDP) ສະບັບປັບປຸງ 2019-2030 ແມ່ນແນໃສ່ແກ້ໄຂ 8 ບັນຫາສໍາຄັນຄື: 1). ຄວາມແຕກໂຕນຂອງອັດຕາການຕາຍຂອງແມ່ ແລະອັດຕາການເກີດລະຫວ່າງຕົວເມືອງ ແລະຊົນນະບົດ, 2). ການແຕ່ງງານແຕ່ອາຍຸຍັງນ້ອຍ ແລະການຖືພາກ່ອນໄວອັນຄວນ, 3), ປະຊາກອນໜຸ່ມທີ່ມີທ່າແຮງທີ່ຈະໄດ້ຮັບຜົນປະໂຫຍດຈາກຜົນປະໂຫຍດດ້ານປະຊາກອນ, 4). ການປົກປ້ອງທາງສັງຄົມສໍາລັບຜູ້ສູງອາຍຸ, 5). ການເຄື່ອນຍ້າຍ ແລະການວາງແຜນ ການເປັນຕົວເມືອງ, 6), ການສ້າງຄວາມເຂັ້ມແຂງດ້ານຂໍ້ມູນປະຊາກອນ, 7). ການເຊື່ອມສານ ການປ່ຽນແປງດ້ານປະຊາກອນເຂົ້າໃນແຜນພັດທະນາແຫ່ງຊາດ, ແຜນຂັ້ນແຂວງ ແລະແຜນຂອງຂະແໜງການ, 8). ການສ້າງຄວາມເຂັ້ມແຂງໃຫ້ແມ່ຍິງ ແລະສົ່ງເສີມສຸຂະພາບທາງເພດ ແລະສຸຂະພາບຈະເລີນພັນ.

ຜູ້ຕາງໜ້າອົງການ UNFPA ປະຈຳ ສປປ ລາວ ໄດ້ກ່າວວ່າ: ສປປ ລາວ ຢູ່ໃນຈຸດທີ່ຕັ້ງຂອງຄວາມກ້າວໜ້າທາງດ້ານປະຊາກອນ, ການລົງທຶນໃສ່ຊາວໜຸ່ມ ແລະໄວໜຸ່ມແມ່ນມີຄວາມຈຳເປັນ ແລະມີຄວາມສຳຄັນຕໍ່ການພັດທະນາປະເທດ, ການເຊື່ອມສານບັນຫາປະຊາກອນເຫຼົ່ານີ້ເຂົ້າໃນນະໂຍບາຍໃນຂັ້ນສູນກາງ, ການວາງ ແຜນຂອງຂະແໜງການ ແລະແຜນຂອງບັນດາແຂວງຈະຊ່ວຍເລັ່ງລັດການພັດທະນາເສດຖະກິດ-ສັງຄົມແບບຍືນຍົງ ແລະຟື້ນຟູຜົນກະທົບຈາກການລະບາດຂອງພະຍາດໂຄວິດ-19.

ຂ່າວ: ອົງການສະຫະປະຊາຊາດ

แชร์