ຮອງປະທານປະເທດ ເຄື່ອນໄຫວວຽກຢູ່ຜົ້ງສາລີ

ທ່ານ ບຸນທອງ ຈິດມະນີ ຮອງປະທານປະເທດແຫ່ງ ສປປ ລາວ ໄດ້ລົງເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຜົ້ງສາລີ, ໂດຍມີທ່ານ ຄຳພອຍ ວັນນະສານ ເຈົ້າແຂວງຜົ້ງສາລີ, ມີບັນດາການນຳແຂວງ ແລະພາກສ່ວນກ່ຽວຂ້ອງໃຫ້ການຕ້ອນຮັບ.
ໃນໂອກາດຢ້ຽມຢາມແຂວງຜົ້ງສາລີໃນວັນທີ 21 ທັນວາ 2021 ນີ້, ທ່ານ ບຸນທອງ ຈິດມະນີ ໄດ້ໃຫ້ກຽດໂອ້ລົມການນຳ ແລະພະນັກງານຫຼັກແຫຼ່ງຂອງແຂວງທີ່ສະໂມສອນຂອງແຂວງ, ຊຶ່ງທ່ານ ຄຳພອຍ ວັນນະສານ ໄດ້ລາຍງານການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກຕິດພັນກັບມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງຜົ້ງສາລີ, ແຜນພັດທະນາເສດຖະກິດ-ສັງຄົມຂອງແຂວງຜົ້ງສາລີ, ການປະຕິບັດມາດຕະການປ້ອງກັນພະຍາດໂຄວິດ-19 ແລະການຈັດຕັ້ງປະຕິບັດ 2 ວາລະແຫ່ງຊາດຂອງແຂວງໂດຍສັງເຂບ.
ລວມຍອດຜະລິດຕະພັນພາຍໃນ (GDP) ປີ 2021 ບັນລຸ 2.043,43 ຕື້ກີບ, ເທົ່າກັບ 98,79% ຂອງແຜນການ (ແຜນການ 2.068,53 ຕື້ກີບ) ທຽບໃສ່ປີ 2020 ເພີ່ມຂຶ້ນ 4,51%, ແຜນການ 5,17% .ໃນນັ້ນ, ກະສິກຳ-ປ່າໄມ້ ເພີ່ມຂຶ້ນ 2,74%, ອຸດສາຫະກຳ-ຫັດຖະກໍາ ເພີ່ມຂຶ້ນ 5,37%, ການບໍລິການ ເພີ່ມຂຶ້ນ 4,68% ແລະພາສີອາກອນຜະລິດຕະພັນ-ຂາເຂົ້າ ສຸດທິເພີ່ມຂຶ້ນ 19,05%, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນບັນລຸ 1.106 ໂດລາສະຫະລັດ ຫຼືເທົ່າກັບ 10,46 ລ້ານກີບ, ອັດຕາແລກປ່ຽນສະເລ່ຍ 1 ໂດລາເທົ່າກັບ 9.457 ກີບ), ທຽບໃສ່ ປີ 2020 ເພີ່ມຂຶ້ນ 118 ໂດລາ,
ໃນໂອກາດດັ່ງກ່າວ, ທ່ານ ບຸນທອງ ຈິດມະນີ ໄດ້ເນັ້ນໜັກຫຼາຍບັນຫາສໍາຄັນເປັນຕົ້ນໃຫ້ອົງຄະນະພັກແຂວງຜົ້ງສາລີເອົາໃຈໃສ່ຫັນວຽກງານກົງຈັກພັກ-ພະນັກງານ ໃຫ້ເຂົ້າສູ່ລວງເລິກ ແລະ ມີການຫັນປ່ຽນຢ່າງຈະແຈ້ງ, ສືບຕໍ່ຊີ້ນໍາ-ນໍາພາ ການພັດທະນາເສດຖະກິດ-ສັງຄົມ ຕິດພັນກັບການປະຕິບັດ 2 ວາລະແຫ່ງຊາດທີ່ລັດຖະບານສຸມໃສ່ຄື: ວາລະ ວ່າດ້ວຍການແກ້ໄຂບັນຫາຄວາມຫຍຸ້ງ ຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດໃຫ້ບັນລຸຕາມຄາດໝາຍຂອງແຜນການທີ່ວາງໄວ້; ສືບຕໍ່ເຂັ້ມງວດໃນວຽກງານ ປ້ອງກັນຊາດ-ປ້ອງກັນຄວາມສະຫງົບໃຫ້ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍໂດຍພື້ນຖານ; ຫັນເອົາການຄຸ້ມຄອງການເກັບລາຍຮັບໄປສູ່ຄວາມທັນສະໄໝ; ດຶງດູດການລົງທຶນຂອງລັດ, ເອກະຊົນພາຍໃນ ແລະ ຕ່າງປະເທດເຂົ້າໃນການພັດທະນາ ພື້ນຖານໂຄງລ່າງ ເພື່ອສ້າງເງື່ອນໄຂ ແລະ ສິ່ງອໍານວຍຄວາມສະດວກຕ່າງໆ ໃຫ້ແກ່ການດໍາລົງຊີວິດຂອງປະຊາຊົນ; ຊຸກຍູ້ສົ່ງເສີມປະຊາຊົນເຮັດການຜະລິດກະສິກໍາໃຫ້ກາຍເປັນສິນຄ້າຕາມທ່າ ແຮງບົ່ມຊ້ອນຂອງປະຊາຊົນໃຫ້ຫຼາຍຂຶ້ນ, ສືບຕໍ່ປົກປັກຮັກສາ ແລະສົ່ງເສີມມູນເຊື້ອວັດທະນະທໍາ ແລະຮີດຄອງປະເພນີອັນດີງາມຂອງຊາດ ແລະຂອງທ້ອງຖິ່ນໃຫ້ຫຼາຍຂຶ້ນ, ເພື່ອສ້າງຄວາມເຂັ້ມແຂງໃຫ້ແກ່ການພັດທະນາເສດຖະກິດ-ສັງຄົມ ໃຫ້ມີຄວາມເຂັ້ມແຂງ ແລະຍືນຍົງ.

แชร์