ປີໜ້າລາວຕັ້ງເປົ້າເກັບລາຍຮັບ 31.593 ຕື້ກີບ

ລັດຖະບານໄດ້ວາງຄາດໝາຍແຜນງົບປະມານແຫ່ງລັດ ປີ 2022 ໂດຍແຜນລາຍຮັບທັງໝົດ 31.593 ຕື້ກີບ ເທົ່າກັບ 16,44% ຂອງລວມຍອດຜະລິດຕະພັນພາຍໃນ ຫຼື GDP ສ່ວນແຜນລາຍຈ່າຍທັງໝົດ 34.691 ຕື້ກີບ ເທົ່າກັບ 18,05% ຂອງ GDP ຂະນະທີ່ຕົວເລກ ຂາດດູນງົບປະມານ 3.098 ຕື້ກີບ ເທົ່າກັບ 1,61% ຂອງ GDP: (ມູນຄ່າ GDP ເທົ່າກັບ 192.145 ຕື້ກີບ).
ແນວໃດກໍ່ດີເພື່ອຈັດຕັ້ງຜັນຂະຫຍາຍມະຕິຂອງສະພາແຫ່ງຊາດ ແລະດຳລັດຂອງນາຍົກລັດຖະມົນຕີວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນງົບປະມານແຫ່ງລັດປະຈຳປີ 2022 ໃຫ້ປາກົດຜົນເປັນຈິງ ແລະສາມາດບັນລຸໄດ້ຕາມຄາດໝາຍ, ບົນຈິດໃຈປະຢັດມັດທະຍັດ ແລະມີປະສິດທິຜົນສູງສຸດ; ເພີ່ມທະວີການປະຕິບັດວິໄນການເງິນຢ່າງເຂັ້ມງວດແນໃສ່ຜ່ອນຄາຍສະພາບຄວາມຫຍຸ້ງຍາກທາງດ້ານການເງິນ-ງົບປະມານ, ສ້າງຄວາມໝັ້ນທ່ຽງໃຫ້ ການເງິນແຫ່ງລັດ ແລະເສດຖະກິດມະຫາພາກ, ພ້ອມທັງເປັນບ່ອນອີງໃນການຈັດຕັ້ງປະຕິບັດແຜນງົບປະມານແຫ່ງລັດໃຫ້ມີຄວາມເປັນເອກະພາບໃນຂອບເຂດທົ່ວປະເທດລັດຖະມົນຕີກະຊວງການເງິນໄດ້ອອກວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2022 ສະບັບເລກທີ 58 80 /ກງ ລົງວັນທີ 22 ພະຈິກ 2021.
ສຳລັບມາດຕະການຈັດຕັ້ງປະຕິບັດດ້ານການຄຸ້ມຄອງເກັບລາຍຮັບຂະແໜງການຂັ້ນສູນກາງ ແລະທ້ອງຖິ່ນຍົກສູງຄວາມຮັບຜິດຊອບໃນການຊຸກຍູ້, ຕິດຕາມ, ກວດກາບັນດາຖານລາຍຮັບທີ່ນອນໃນຄວາມຮັບຜິດຊອບຂອງຕົນໃຫ້ຄົບຖ້ວນ ແລະ ຖືກຕ້ອງຕາມຕົວຈິງ, ພ້ອມທັງສົມທົບກັບຂະແໜງການເງິນອອກມາດຕະການໃນການຂະຫຍາຍ ແລະສ້າງຖານລາຍຮັບໃໝ່ໃຫ້ເປັນແຫຼ່ງທີ່ໝັ້ນຄົງໃນຕໍ່ໜ້າ; ເລັ່ງທວງເກັບຄືນພັນທະຕ່າງໆ ທີ່ຄ້າມອບ ແລະເກັບກູ້ຄືນຈາກການກວດເຫັນເພີ່ມຕາມຜົນກວດສອບ-ກວດກາທີ່ຍັງຄ້າງນໍາຫົວໜ່ວຍງົບປະມານໃຫ້ຄົບຖ້ວນ ຕາມກົດໝາຍ ແລະລະບຽບການ;ໃຫ້ບັນດາຂະແໜງການທີ່ມີລາຍຮັບຄ່າບໍລິການທາງດ້ານວິຊາ ການ ແລະກອງທຶນຂອງລັດເອົາໃຈໃສ່ຈັດຕັ້ງປະຕິບັດຕາມຄໍາແນະນໍາ ສະບັບ ເລກທີ 0016/ກງ ລົງວັນທີ 03 ມັງກອນ 2019. ສໍາລັບຂະແໜງສາຍຕັ້ງໃຫ້ມອບ ລາຍຮັບຂອງຕົນເຂົ້າບັນຊີສູນກາງທີ່ເປີດໄວ້ຢູ່ຄັງເງິນແຫ່ງຊາດປະຈໍາທ້ອງຖິ່ນໂດຍບໍ່ອະນຸຍາດໃຫ້ມອບເຂົ້າເປັນລາຍຮັບຂອງທ້ອງຖິ່ນ.

แชร์