ຫາລືປັບປຸງເນື້ອໃນຮ່າງຍຸດທະສາດແກ້ໄຂບັນຫາ ລບຕ

ກອງປະຊຸມປັບປຸງຮ່າງຍຸດທະສາດວ່າດ້ວຍການແກ້ໄຂບັນຫາລະເບີດບໍ່ທັນແຕກ (ລບຕ) ທີ່ຕົກຄ້າງຢູ່ ສປປ ລາວ ໃນຫົວຂໍ້ “ ເສັ້ນທາງກ້າວສູ່ຄວາມປອດໄພ III ” ໄລຍະ 2021–2030 ໄດ້ຈັດຂຶ້ນໃນວັນທີ 17 ທັນວາຜ່ານມາທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະສະຫວັກດີການສັງຄົມ, ຮອງປະທານຄະນະກໍາມາທິການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ), ມີບັນດາຫົວໜ້າຫ້ອງການ ຄຊກລ, ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.


ທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການ ຄຊກລ ໄດ້ກ່າວສັງລວມເນື້ອໃນໂດຍຫຍໍ້ວ່າ: ຮ່າງຍຸດທະສາດວ່າດ້ວຍການແກ້ໄຂບັນຫາລະເບີດບໍ່ທັນແຕກທີ່ ຕົກຄ້າງຢູ່ ສປປ ລາວ ໃນຫົວຂໍ້ “ ເສັ້ນທາງກ້າວສູ່ຄວາມປອດໄພ III ” ໄລຍະ 2021–2030 ປະກອບມີ 4 ພາກຄື: ພາກສະເໜີ, ສະພາບການແກ້ໄຂບັນຫາລະເບີດບໍ່ທັນແຕກ, ຍຸດທະສາດການແກ້ໄຂບັນ ຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ແລະມາດຕະການຈັດຕັ້ງປະຕິບັດໃນນັ້ນແມ່ນໄດ້ເວົ້າເຖິງປະຫວັດຄວາມເປັນມາ, ອະທິບາຍບັນດາຄຳສັ່ງຕ່າງໆ, ພາລະບົດບາດຂອບເຂດສິດໜ້າທີ່, ກຳນົດລະບຽບການ, ຫຼັກການ , ນິຕິກຳ, ຍຸດທະສາດ ແລະແຜນພັດທະນາຂະແໜງການທີ່ກ່ຽວຂ້ອງຂອງພາກພື້ນ ແລະສາກົນ, ຜົນສຳເລັດ, ຂໍ້ຄົງຄ້າງ, ບັນຫາສິ່ງທ້າທາຍ ແລະບາງບົດຮຽນທີ່ຖອດຖອນໄດ້, ພ້ອມນີ້ຍັງກຳນົດເປົ້າໝາຍ, ວິໄສທັດ, ການປະສານງານ, ງົບປະມານ, ການລະດົມທຶນສະໜັບສະໜູນການຈັດຕັ້ງປະຕິບັດ, ຄູ່ຮ່ວມພັດທະນາ ແລະການຕິດຕາມປະເມີນຜົນ.
ກອງປະຊຸມຄັ້ງນີ້, ຍັງໄດ້ພ້ອມກັນສືບຕໍ່ປຶກສາຫາລື, ປະກອບຄຳເຫັນປັບປຸງເນື້ອໃນໃສ່ຮ່າງຍຸດທະສາດວ່າດ້ວຍການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໃນຫົວຂໍ້ “ ເສັ້ນທາງກ້າວສູ່ຄວາມປອດໄພ III ” ໄລຍະ 2021–2030 ເພື່ອຮັບຮອງໃນກອງປະຊຸມຄະນະນຳກະຊວງໃນອະນາຄົດອັນໃກ້ນີ້ອີກດ້ວຍ.

แชร์