11 ເດືອນ ທ່າແຕງ ຈັດເກັບລາຍຮັບໄດ້ 89%

ໄລຍະ 11 ເດືອນຂອງປີ 2021 ເມືອງທ່າແຕງ ແຂວງເຊກອງ ຈັດເກັບລາຍຮັບໄດ້ພຽງ 31,4 ຕື້ກີບ ທຽບໃສ່ແຜນປີປະຕິບັດໄດ້ 89% ທັງນີ້ກໍເນື່ອງມາຈາກຫຼາຍ ສາຍເຫດ, ທ່ານ ສຸວັນ ສ້ອຍທະວົງສາ ຫົວໜ້າຫ້ອງການ-ການເງິນເມືອງທ່າແຕງໄດ້ໃຫ້ສຳພາດຕໍ່ນັກຂ່າວເມື່ອວັນທີ 15 ທັນວາ 2021 ວ່າ: ຕະຫຼອດໄລຍະ 11 ເດືອນຜ່ານມາຫ້ອງການ-ການ ເງິນເມືອງທ່າແຕງໄດ້ມີຄວາມພະຍາຍາມຈັດເກັບລາຍຮັບເຂົ້າງົບປະມານແຫ່ງລັດດ້ວຍຄວາມຮັບຜິດຊອບສູງເຊິ່ງໄດ້ເອົາໃຈໃສ່ຊຸກຍູ້ບັນ ດາຫົວໜ່ວຍທຸລະກິດ ແລະຜູ້ປະກອບການ, ປະຊາຊົນບັນດາເຜົ່າຊ່ວຍມອບພັນທະຕ່າງໆໃຫ້ຖືກຕ້ອງ ແລະສອດຄ່ອງຕໍ່ລະບຽບກົດໝາຍດ້ວຍຄວາມວ່ອງໄວ, ໂປ່ງໃສ ຢ່າງເປັນຮູບປະທໍາ ແລະສຸມທຸກກຳລັງແຮງສະຕິປັນຍາ, ເພີ່ມທະວີຄວາມເປັນເຈົ້າການໃນການປະຕິບັດໜ້າທີ່ວຽກງານວິຊາສະເພາະເປັນຕົ້ນການຄຸ້ມຄອງລາຍຈ່າຍ ແຜນງົບປະມານທີ່ດຳນົດໄວ້, ຂຸດຄົ້ນແຫຼ່ງລາຍຮັບທີ່ບໍ່ທັນບົ່ງຊ້ອນ, ເກັບລາຍຮັບມອບເຂົ້າງົບປະມານ ແຫ່ງລັດຖືກຕ້ອງ, ຄົບຖ້ວນ, ທັນເວລາຕາມລະບຽບກົດໝາຍທີ່ກໍານົດໄວ້.


ແນວໃດກໍດີໃນໄລຍະ 11ເດືອນ ຂອງປີນີ້ສາມາດຈັດເກັບລາຍຮັບໄດ້ພຽງ 31,4 ຕື້ກີບ ໃນນີ້ລາຍຮັບດຸ່ນດ່ຽງ 27,91 ຕື້ກີບ ແລະລາຍຮັບພາຍໃນເມືອງໂດຍສະເພາະລາຍຮັບສ່ວຍສາອາກອນ, ຄ່າທໍານຽມ, ຄ່າບໍລິການແລະລາຍຮັບຊັບສິນຂອງລັດລວມ 3,5 ຕື້ກີບ.
ທ່ານ ສຸວັນ ສ້ອຍທະວົງສາ ຫົວໜ້າຫ້ອງການ-ການເງິນເມືອງທ່າແຕງໃຫ້ຮູ້ຕື່ມວ່າ: ການຈັດເກັບລາຍຮັບເຂົ້າງົບປະມານແຫ່ງລັດບໍ່ບັນລຸແຜນສ່ວນໜຶ່ງແມ່ນເນື່ອງມາຈາກການແຜ່ລະບາດຂອງພະຍາດໂຄວິດ-19,ການຍົກເວັ້ນອາກອນລາຍໄດ້ຈາກເງິນເດືອນ, ຈຸລະວິສາຫາກິດ 3 ເດືອນແຕ່ເດືອນ 4- ເດືອນ 6, ນອກຈາກນີ້ບຸກຄົນນິຕິບຸກທຸກຊັ້ນຄົນບໍ່ທັນເປັນເຈົ້າການໃນການແຈ້ງເສຍອາກອນ, ຍັງມີການເຊື່ອງອຳ, ຫຼົບຫຼີກບວກກັບພໍ່ແມ່ປະຊາຊົນບໍ່ທັນມີຄວາມຕື່ນຕົວໃນການແຈ້ງເສຍຄ່າທຳນຽມພາສີທີ່ດິນແລະເສຍອາກອນລາຍໄດ້ຈາກການໂອນສິດໂດຍຍັງມີການປົກປິດ.


ສໍາລັບທິດທາງເດືອນມ້ວນທ້າຍຂອງປີ 2021 ຕ້ອງເອົາໃຈໃສ່ປະຕິບັດແຜນພັດທະນາເສດຖະກິດ-ສັງຄົມ, ຄົ້ນຄວ້າຊອກຈັດເກັບລາຍຮັບຕາມແຫຼ່ງລາຍຮັບທີ່ໄດ້ ຈັດຕັ້ງປະຕິບັດໃຫ້ບັນລຸຕາມແຜນການ ແລະວາລະແຫ່ງຊາດແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ບັນລຸຕາມແຜນການທີ່ວາງໄວ້ດ້ວຍການຊຸກຍູ້ສົ່ງເສີມ, ຍາດແຍ່ງດຶງດູດບັນດາຜູ້ປະກອບການ, ຫົວໜ່ວຍທຸລະກິດຂະໜາດນ້ອຍ-ຂະໜາດກາງ ທັງພາຍໃນ ແລະຕ່າງປະເທດ, ປັບປຸງ-ແກ້ໄຂກົນໄກທີ່ກົດໜ່ວງທ່ວງດຶງເພື່ອເຮັດໃຫ້ເສດຖະກິດມີການຂະຫຍາຍຕົວຢ່າງເປັນລະບົບຕໍ່ເນື່ອງ ແລະຍຶນຍົງ ສູ້ຊົນຈັດເກັບລາຍຮັບເຂົ້າງົບປະມານ ໃຫ້ບັນລຸ 3,75 ຕື້ກີບ ທຽບໃສ່ແຜນປີໃຫ້ໄດ້ 100% ແລະຄຸ້ມຄອງລາຍຈ່າຍໃຫ້ຖືກຕ້ອງຕາມລະບຽບວິໄນການເງິນຢ່າງເຂັ້ມງວດ.

แชร์