ສຳຫຼວດພົບລາວມີ 6 ແສນກວ່າຄົວເຮືອນປູກພືດຂາຍ

ຂ່າວ: ອ່ຽງຄຳ ວິລະສັກ


ການສໍາຫຼວດສະຖິຕິກະສິກໍາຄັ້ງທີ 3 ແມ່ນໄດ້ຖືກພັດທະນາລະບອບ ວິທີເປັນລະບົບເຫັນວ່າ ສປປ ລາວ ມີ ຄົວເຮືອນກະສິກໍາທັງໝົດ 644 ພັນຄົວ ເຮືອນທີ່ປູກພືດສ່ວນຫຼາຍແມ່ນເພື່ອກິນເອງ ແລະຂາຍຂຶ້ນກັບປະເພດຂອງພືດ.
ອີງຕາມການລາຍງານຂອງທ່ານ ນາງ ເພັດສະໝອນ ສອນ ຮອງຫົວໜ້າສູນສະຖິຕິແຫ່ງຊາດກ່ຽວກັບຜົນການສຳຫຼວດສະຖິຕິກະສິກຳທົ່ວປະເທດຄັ້ງທີ III ປີ 2019-2020 ຕໍ່ກອງປະຊຸມປະກາດຜົນຂອງການສຳຫຼວດດັ່ງກ່າວທີ່ຈັດຂຶ້ນໃນວັນທີ 21 ທັນວາຜ່ານມາທີ່ກະຊວງແຜນການ ແລະການລົງທຶນ ວ່າ: ການສໍາຫຼວດສະຖິຕິກະສິກໍາ ຄັ້ງທີ 3 ແມ່ນໄດ້ຖືກພັດທະນາລະບອບວິທີເປັນ ລະບົບສົມທຽບກັບສອງຄັ້ງຜ່ານມາຊຶ່ງໄດ້ພັດທະນາການໂດຍນໍາໃຊ້ແທັບເລັດເຂົ້າໃນການເກັບກໍາຂໍ້ມູນຜ່ານການຈັດ ຕັ້ງປະຕິບັດການສໍາຫຼວດຄັ້ງນີ້ເຫັນວ່າ ຄົວເຮືອນກະສິກໍາມີທັງໝົດ 644 ພັນຄົວເຮືອນ ຊຶ່ງເກັບກໍາໄດ້ໃນໄລຍະຂຶ້ນບັນຊີ, ຫຼັງຈາກນັ້ນໄດ້ສໍາຫຼວດແບບຕົວແທນ 40 ພັນຄົວເຮືອນ (6,3%) ຂອງຄົວເຮືອນກະສິກໍາທັງໝົດ ເພື່ອເກັບກໍາເອົາຂໍ້ມູນລະອຽດ.
ສໍາລັບຂໍ້ມູນບ້ານແມ່ນໄດ້ເກັບກໍາເອົາຂໍ້ມູນທັງໝົດ 8.416 ບ້ານທັງໝົດ ໃນຂອບເຂດທົ່ວປະເທດ, ການແຈກຢາຍຂອງການຄອບຄອງດິນຂອງຊາວກະສິກອນໃນ ສປປ ລາວ ແມ່ນມີລັກສະນະຄ້າຍຄືກັນ ແລະແຕກຕ່າງກັນໄປຕາມຂົງເຂດ ແລະແຂວງ, ປະມານ 22% ຂອງຄົວເຮືອນກະສິກໍາມີເນື້ອທີ່ດິນຕໍ່າກວ່າ 1 ເຮັກຕາ, 31% ຂອງຊາວກະສິກອນມີດິນ 1-2 ເຮັກຕາ ແລະ 22% ຂອງຊາວກະສິກອນຄອບຄອງດິນຫຼາຍກວ່າ 3 ເຮັກຕາ.
ຖ້າເບິ່ງຕາມພາກແມ່ນຊາວກະສິກອນຢູ່ພາກໃຕ້ຄອບຄອງດິນຂະໜາດ ກາງ ແລະໃຫຍ່ຫຼາຍກວ່າພາກກາງ ແລະພາກເໜືອ, ສ່ວນຜູ້ຄອບຄອງດິນໜ້ອຍກວ່າໜຶ່ງເຮັກຕາ ແມ່ນມີອັດຕາສ່ວນໜ້ອຍໃນແຂວງສະຫວັນນະເຂດ, ໃນຂະນະທີ່ ແຂວງຫົວພັນແມ່ນແຂວງທີ່ມີອັດຕາສ່ວນຜູ້ຄອບຄອງດິນໜ້ອຍກວ່າ 1 ເຮັກຕາ ຫຼາຍກວ່າໝູ່ (56%). ແຂວງທີ່ມີການຄອບຄອງດິນຂະໜາດໃຫຍ່ຫຼາຍກວ່າ 3 ເຮັກຕາ ແມ່ນແຂວງສະຫວັນນະເຂດ, ແຕ່ຖ້າເບິ່ງອັດຕາສ່ວນເນື້ອທີ່ຕໍ່ຄົວເຮືອນແມ່ນແຂວງໄຊສົມບູນ.
ສຳລັບການປູກພືດສ່ວນຫຼາຍແມ່ນເພື່ອກິນເອງ ແລະຂາຍຂຶ້ນກັບປະເພດຂອງພືດ, ພືດສ່ວນຫຼາຍແມ່ນຜະລິດເພື່ອຂາຍໃນປີ 2019-2020, ຢາສູບ, ເຫັດ ແລະຜັກບົ້ງແມ່ນປູກເພື່ອຂາຍພຽງຢ່າງດຽວ, ສ່ວນພືດອື່ນໆເຊັ່ນ: ສາລີແຂງ, ຖົ່ວເຫຼືອງ, ອ້ອຍ, ໝາກໂມ, ກະລໍາປີ, ໝາກນັດ, ສະຫຼັດ, ຖົ່ວແດງ, ຝ້າຍ, ຂີງ, ຖົ່ວດໍາ, ຖົ່ວຂຽວ ແລະໝາກງາ ແມ່ນຜະລິດເພື່ອຂາຍເປັນສ່ວນໃຫຍ່. ພືດຢືນຕົ້ນເຊັ່ນ: ກາເຟ, ຊາ, ໝາກນາວ ແມ່ນປູກເພື່ອຂາຍເປັນສ່ວນໃຫຍ່ໃນຂະນະທີ່ໝາກມ່ວງແມ່ນປູກ ເພື່ອກິນເອງ ແລະຂາຍ.
ໃນປີ 2019-2020, ຄົວເຮຶອນກະສິກໍາ 168.484 ຄົວເຮືອນ (26% ຂອງຄົວເຮືອນກະສິກໍາທັງໝົດ) ໄດ້ມີການກູ້ຢຶມເພື່ອຜະລິດກະສິກໍາ, ອັດຕາສ່ວນຄົວເຮືອນກະສິກໍາທີ່ກູ້ຢືມຫຼາຍເຖິງ 66% (ແຂວງອຸດົມໄຊ) ຫາຕໍ່າສຸດ 9% (ແຂວງສະຫວັນນະເຂດ). ຄົວເຮືອນ ກະສິກໍາ ສ່ວນໃຫຍ່ແມ່ນກູ້ຢືມຈາກທະນາຄານນະໂຍບາຍ, ກອງທຶນບ້ານ, ທະ ນາຄານສົ່ງເສິມກະສິກໍາ, ທະນາຄານ ອື່ນໆ, ສະຖາບັນການເງິນຈຸລະພາກ ແລະແຫຼ່ງອື່ນໆອີກ, ໂດຍພື້ນຖານແລ້ວ, ຄົວເຮືອນກະສິກໍາກູ້ຢືມ ເພື່ອຊື້ປັດໄຈການ ຜະລິດກະສິກໍາ, ເຄື່ອງມືກະສິກໍາ, ສັດລ້ຽງ, ດິນ, ແລະ ສ້າງຟາມ ແລະໂຄງລ່າງ ພື້ນຖານ, ຄົວເຮືອນກະສິກໍາສ່ວນໃຫຍ່ ແມ່ນເພື່ອຊື້ສັດລ້ຽງ ແລະຊື້ແນວພັນພືດ.
ການສໍາຫຼວດສະຖິຕິກະສິກໍາ 2019- 2020 ສະແດງໃຫ້ເຫັນວ່າສັດລ້ຽງແມ່ນກິດຈະກໍາຕົ້ນຕໍຂອງຂະແໜງການກະສິກໍາ, ຮອງຈາກການປູກພຶດ, ມີ 515.554 ຄົວເຮືອນ ຫຼື (80%) ມີສັດລ້ຽງ ຫຼືສັດປີກ, ອັດຕາສ່ວນຂອງຄົວເຮືອນລ້ຽງສັດ ຫຼືສັດປີກແບ່ງຕາມແຂວງເຫັນວ່າແຕກຕ່າງກັນເລີ່ມຈາກ 65% ຫາ 93% ຊຶ່ງ ສັດລ້ຽງສ່ວນໃຫຍ່ແມ່ນປະເພດງົວ, ຄວາຍ, ແບ້, ໝູ ແມ່ນສັດລ້ຽງຕົ້ນຕໍທີ່ຄົວເຮືອນນິຍົມ, ສ່ວນ ໄກ່, ເປັດ ແມ່ນສັດປີກຕົ້ນຕໍທີ່ນິຍົມລ້ຽງ.
ໃນການສໍາຫຼວດຄັ້ງທີ່ xiii ໄດ້ສະແດງໃຫ້ເຫັນວ່າຄົວເຮືອນກະສິກໍາປູກປ່າໄມ້ ໃນປີ 2019, ສ່ວນຫຼາຍນິຍົມປູກຢາງ ພາລາ ຮອງລົງມາແມ່ນໄມ້ສັກ, ຄົວເຮືອນກະສິກໍາ 52.611 ຄົວເຮືອນປູກຢາງພາລານໍາໃຊ້ດິນທັງໝົດ 91.852 ເຮັກຕາ ແລະມີຄົວເຮືອນ 18.845 ຄົວເຮືອນ ທີ່ປູກໄມ້ສັກນໍາໃຊ້ເນື້ອທີ່ 11.611 ເຮັກຕາ ໃນປີ 2019-2020.

แชร์